期待已久
四日三夜的黃金之旅終於來到啦啦啦
今天湯米提早來到幫傻一整電腦
因為之前傻一個 msn 中咗毒呀
之前仲因為呢件事同湯米搞到唔係咁開心
好彩多得湯米幫傻一整番好咋
湯米仲買咗熱香餅同薯餅俾傻一做早餐
好味呀

今朝仲發生咗一件小插曲
老豆同媽咪出咗去返工
佢哋竟然反鎖咗個鐵閘
激死我啦啦啦

之後就同湯米出發入屯門喇
但係之前要去上環買啲嘢先
係九月公司 New Hires Training 要用的工具
買完嘢經過舊公司附近見到 0081 啱啱喺公司落嚟食晏
但係佢見我唔到

跟住就同湯米搭巴士喇
傻一想搭 962B
因為 962B 可以睇多啲海
感覺好啲

入到去麥記食咗啲嘢
就去 check-in 喇
本來佢哋 upgrade 咗一間大啲
同埋有露台的房俾我哋
但係間房喺一樓
睇唔到海
所以湯米想換過一間高啲樓數的房
搞咗一陣
最後我哋的房間號碼係 903
呢間房冇露台
同埋細啲
但係可以望到海
好靚
傻一都覺得好舒服

夜晚湯米同傻一出咗去食嘢
去咗一間黑店食飯
笨咗
之後去買咗啲水果
零食同飲品就返酒店喇
跟住抖吓
沖涼睇吓電視
輕輕鬆鬆又過咗一日喇
可能太攰
傻一好快就瞓著咗喇

呢個係開心樂園餐送的公仔
唔知佢叫咩名
但係傻一覺得幾得意
有啲似彈珠人

望住出面個海好舒服架

今日返咗公司拎啲嘢
因為聽朝早要去中環睇個 Course 先
呢排發覺自己真係冇乜記性呢
哈哈

今日係傻一同湯米第一次
去摩理臣山泳池游水
感覺上都係九龍公園好啲
起碼九龍公園個更衣室有冷氣
又乾淨啲
曬太陽的地方又多啲好啲

今晚傻一去咗剪髮
湯米就返咗屋企食飯
今次係阿樂同我洗頭
佢啲按摩手勢真係好好架
好舒服

今朝早九點幾就起咗身
因為要去洗牙
其實傻一好怕去睇牙醫
因為好怕聽到洗牙時啲聲
又唔知牙醫喺我個口入面整咩喎
但係每年都要檢查一次啲牙

傻一每年都係諗住洗完牙
啲牙就會白晒同乾淨晒
咁就會冇咁驚架喇

下晝湯米出 Camp 喇
我哋去咗西環食下午茶
本來去咗一間叫加記的東西食嘢
但係坐低之後發覺啲人態度好差
所以傻一同湯米就起身走人
最後都係食番綠野仙跡

之後去咗銅鑼灣唱 K
一唱就三個鐘喇
之後行咗一陣
就返屋企喇
今日開始湯米放大假喇

今日個天仍然係繼續落雨
落雨天出街真係好唔方便呢
又要拎遮
又驚整濕褲腳

今日做尖好似夠力咗
但係跳 BS(1) 時又好攰
同埋又好熱
仲有開始覺得啲 steps 跳到好悶

今日帶咗條褲等做完尖換嚟著
點知唔記得帶皮帶
條褲又好鬆
條褲成日就嚟跌落嚟咁
搞到都冇心情行街
於是湯米就話不如早啲返屋企喇

呢個週末好似瞓得唔係好好
好想快啲到下星期放假
但係又唔想咁快到下星期四
因為期待假期的心情係最開心的
做人真係矛盾

前陣子傻一成日都好病
有時候流鼻水
有時候又會咳
又會好容易覺得攰
總之覺得周身唔舒服
大迷信傻一當然歸咎於
係因為屬猴的傻一
今年犯太歲之故啦啦啦
其實六七月真係睇過好多次醫生喇
甚至連中醫都睇過
經過調理後又真係好似好咗少少
希望之後都 Keep 住健健康康
精精神神啦