感覺做少了 gym 好多呀，一星期去到一次已經係好難得嘅事喇，去完台灣之後，湯米話睇番自己啲相，覺得自己肥咗好多，所以湯米話要開始減肥喇，湯米宜家去跳 BS(1) 之前，都會跑十五至二十分鐘機，反而傻一就覺得自己太瘦，影相時塊面好似冇肉咁，湯米都覺得咁樣唔好睇，要傻一增肥，就係咁，傻一之後就可以大吃大喝喇，話之佢死啦，食咗先算，但係千祈唔好只係肥喺個肚度呀呀呀！！！

今晚係 IHRM 做 Presentation 的日子，喺公司偷偷哋執埋個 PowerPoint，今次我哋係第一組 present，都好嘅，快啲做完輕鬆啲，同埋未睇其他組的 present，冇比較，壓力冇咁大，今晚的表現中規中矩啦，自己都幾緊張，又食縲絲，幸好 Q&A session 都順利過關，但係完咗今晚的 present，又要為下一份的功課而忙碌喇！呼！

由台北飛番香港之後，湯米同傻一各自趕返屋企放低行李，因為夜晚要去 Star Hall 睇憶蓮 concert，原來湯米一早喺九展訂咗枱食 buffet 同傻一食生日飯，又係估唔到呢！湯米仲特登唔帶袋，咁湯米同傻一就可以一齊出去攞嘢食，唔使要是旦一個坐喺位度看嘢喇！可惜的是時間實在太趕，唔能夠食到好多嘢，嘥咗湯米的心思去安排呢餐生日飯！

八點半喇，入場喇，呢場係尾場，湯米同傻一今晚坐樓下，但係前面有好多個頭呀，睇得好辛苦呢！可能係尾場的關係，觀眾都特別投入，憶蓮唱第二首歌時大家已經企晒起身，湯米同傻一當然係企埋一份啦，幸好身邊的觀眾都好 high，大家一齊大叫，氣氛真係好好架！對於傻一嚟講，今晚都有幾多驚喜，好似聽到再見悲哀、早晨，仲有 encore 的微涼、為你我受冷風吹，當然要加埋大家一齊跳一齊嗌嘅傾斜、Fans 大合唱的依然，最後唱埋沒結果就非常完美喇！今晚的確係好難忘，今年的生日 Super 開心！

音樂會散場已經係十一點半喇，送咗湯米返屋企傻一都搭 101 返屋企喇！

多謝陳慧琳、陳慧蘭、問米婆同周大雄
同我慶祝生日
我哋去咗小南國食飯
呢晚陳慧琳同問米婆成日都大笑
問米婆仲笑到喊
好似失咗控咁
周大雄都冇佢哋咁好氣
陳慧蘭個樣好病
冇晒精神咁
我哋講講吓佢同奶奶啲嘢
佢仲講到喊
搞到佢喊我哋真係冇心架
(陳慧蘭你都唔使覺得唔好意思啦)
佢哋仲送咗 Clinique 啲護膚品俾我
多謝晒
食完飯問米婆同周大雄走先
陳慧琳同陳慧蘭同我就去咗 Causeway Place 扭蛋
係 Nokia 公仔電話繩
傻一抽咗兩個
湯米一個
傻一一個
嘻嘻

十月廿五日
星期四
雖然功課仍未完成
但係放咗工都去咗銅鑼灣同朋友食飯
為補祝 Gloria 生日
阿單同 Raymond 都有到
我哋去咗意粉屋食飯
叫咗兩個二人餐
但係兩個餐都唔係咁好食
搞到我都冇乜胃口食
傾傾講講又到十點幾
係時候返屋企做功課喇
返到屋企做功課做到兩點先做完
不過都係自己預算的時間之內完成
一上床唔使十秒就瞓著咗
不醒人事！