今日 lunch 同夜晚都係食 Buffet
Lunch Shanice 請我哋去灣仔維景酒店食晏
雖然酒店外表唔係太起眼
但係入面啲裝修都幾靚
又乾淨
又多嘢食
最重要係有好多甜品呀
唔錯唔錯

Tea Time 又有 Mandarin 蛋糕食
因為有個 HR 同事要走喇
啲女同事個個都塞俾我食
搞到傻一食咗妤多 Cakes

夜晚同湯米去咗灣仔國際賓館食 Buffet
因為貪方便
食完就可以行過隔離睇 Drama
啲嘢食都 OK
但唔多嘢食
傻一覺得呢度啲裝修
好似八十年代電影入面的餐廳咁

今日湯米請咗病假
特登去咗排隊幫傻一買憶蓮演唱會飛
但係原來今日係賣陳奕迅加最後一場的飛
未有得賣 Sandy 住
其實湯米本來都諗住排開
不如買埋陳奕迅
但係未排到去啲飛已經賣晒 LU
激死咗湯米

今日返工 OK 順利喎
lunch 約咗 C&M Winnie 食飯
大家雖然唔同部門
但係都幾啱傾
有時我哋對某啲事的睇法都幾相似
好似特別投契咁
今日去咗食雞公煲
都幾好食呀
但係俾啲汁彈咗落件恤衫都唔知
真係失策

夜晚約咗 Trevor 食飯
我哋去咗尖咀糖朝
搬咗鋪位之後第一次去
感覺以前靚啲
舒服啲
啲嘢食又冇以前咁好食
但係啲服務態度好咗
我哋都算食咗好多嘢
今次 Trevor 請食飯
真係客氣
多謝晒

食完飯周圍行
一路行一路傾
最後行到去油麻地各自歸家
傾咗好多嘢
講咗一啲大家對某啲事的睇法
今晚都諗到好多嘢
其實同 Trevor 傾偈真係好舒服

今朝八點半就俾 Edith 打電話嚟嘈醒咗
話 Training Room 入面啲機嘅 setting 俾人搞過
好彩喺電話度教佢都識整返
如果唔係要我飛返去
我就真係死俾你睇呀
但係之後我就瞓唔返喇
之後上吓網
跟住刷牙洗面沖涼
仲有時間做埋個磨砂同 Mask
超舒服呀呀呀
跟住就同湯米去咗曬太陽
今日又係好好太陽喎
跟住游咗一陣水就走喇

湯米話想去食板前壽司
其實今次都係傻一第一次去食板前
因為每次經過門口都係好多人喺度排緊隊
所以每次都唔會等
寧願唔食
但係今次未夠六點就去到
所以唔使等就食得喇
但係食完都冇想像中咁好食
好似都係峰壽司同埋一壽司好食好多
可能元氣都仲好食過佢
啲服務態度又唔係咁好
總之就係好一般啦
都唔知點解咁多人會去等架
莫名奇妙

今日收到老細的信
終於都加咗人工
升咗職同埋月尾會有花紅派
人工加咗 13%
雖然係我出嚟做嘢之後
人工加得最多的一次
開心係有
但同樣地都有唔多唔少的失望
其實呢個 % 和自己心目中預期的增幅仍然係少咗好多
我知道其他同 Grade 的同事人工冇咁少
其實我都有諗過
點解會咁呢
眼見其他人的 education background 又低過自己
做嘅嘢又少過自己
點解人工會高啲呢
呢啲係咪叫唔公平
其實係咪真係要自己去爭取呢
自己一路都冇諗過要爭啲咩返嚟
一路都以為只要自己做嘢做得好
老細有眼見
到年尾加人工或者升職
都會有合比例的回報
但係宜家會知道
有啲人會用把口去做嘢
講一啲奉承的說話去擦老細鞋
結果得番嚟的
比自己辛辛苦苦去做去賺番嚟的還要多
有時做嘢做到咁真係好心灰意冷
但係呢個就係活生生的社會
宜家起碼加咗人工
title 轉咗
日後搵工轉工自己個 bargaining power 都大啲
同事問我覺得點
我話 OK 啦
雖然係唔滿意
但係對住同事唔可以表現出唔開心
免得別人覺得自己自視過高同埋唔知足
我亦都真心多謝 Shanice 為我做咗好多嘢
先爭取到呢啲嘢返嚟
返而個Bonus 比我預期中多
算係少少安慰

今日傻一忍住唔同湯米講加咗人工呢件事
因為傻一想今晚親自搵湯米話俾佢知
所以夜晚過咗去觀塘搵湯米
嚇咗佢一跳
係咪好驚喜呢？！

今日放工準時即閃

好似好難得咁準時放工
返咗學校交功課
本來諗住 send e-mail 交架
但係因為要幫個同學交埋
好似 send e-mail 又唔係好安全
所以都係返去行一趟
順便可以去百利拎衫
同埋幫湯米去 RF 攞西褲
嘩！真係一舉幾得呀
跟住就返屋企食飯喇