沒特別的一天，仍然係起身刷牙洗面，飲茶。返屋企打牌打左陣，去左睇惡作劇，咁就一個上午。

我搭下午５點半果班船返黎。３點幾搭車去碼頭，表姐送我地去到搭車既地方，車到，大家就分道揚鑣。千里送君．終需一別。

船上，起航無耐就撞到暴風雨。搭係架暴風雨中既船，望出窗外面會睇到乜，我終於都有得試下。
不過感謝神，我地好安全咁返到中港碼頭。

無咩特別事了，朋友們想知詳細就搵方法問我吧。
－－－－－－－－－－－－－－－－－－－－－－－－－－－－－－－－－－－－－－－－－－－
記錄：
將係大陸影到既相（除長隆）掉曬上相簿度（共３１張）
－－－－－－－－－－－－－－－－－－－－－－－－－－－－－－－－－－－－－－－－－－－
每日隨想：
今日遇到既事真係多，每次返大陸到要離開果一刻都有Ｄ傷感，畢竟呢個係我長大既地方，呢度每一個人都比起我身邊好多人黎得重要。

人承受心靈傷害始終會有個限度，因人而異．．．我能夠受到幾大既傷害呢．．．？賭一下吧。

坐過山車會令你打從心底發出恐懼既聲音果段時間，並唔係架車由幾十米衝落地下既時間，而係當架車係一個唔應該停底既地方停左落黎，你就會真真正正感到恐懼。如果將而家既我比喻成呢班人亦都不為過。

假如我既人生只係得返愛情同友情．．．毫無疑問我會選擇友情．．．

我累了．．．真的累了．．．誰可以給我一個安靜的地方休息一下．．．？
－－－－－－－－－－－－－－－－－－－－－－－－－－－－－－－－－－－－－－－－－－－|
Ｅｘｔｒａ：
唯一一個完全清楚我既人只有我自己．．．但此刻連我自己都唔清楚．．．今日聽到呢個消息之後．．．我知道我既精神已經去到極限．．．唔知點算好．．．我應該點做．．．我種果棵．．．唯一既果樹．．．枯死左．．．我無傷心或者感到難過，不過我既感受絕對可以媲美地獄。
－－－－－－－－－－－－－－－－－－－－－－－－－－－－－－－－－－－－－－－－－－－
Ｅｘｔｒａ　Ｐａｒｔ２：
沖完個涼，個人完全冷靜落黎。諗返起岩岩同ｄ人講既野真係想打自己幾巴。諗唔到我都會俾ｄ我一早就預料到既事打亂陣腳．．．真係諷刺。或者我真係好在乎呢件事發生既時間，不過既然發生左，我亦都樂於去接受。我永不放棄．．．因為我仍有希望．．．代表盼望的火光沒有熄滅．．．代表我心靈的火光亦不會熄滅。

Ｉ’ｌｌ　Ｂｅ　Ｆｉｎｅ　Ｉｎ　Ｔｈｅ　Ｆｕｔｕｒｅ．．．Ｅｖｅｒｌａｓｔｉｎｇ！！
－－－－－－－－－－－－－－－－－－－－－－－－－－－－－－－－－－－－－－－－－－－

 陽光唔錯既一日，因為聖帕先生最後都係無黎到，行程照舊，目的地：長隆歡樂世界

第一次去長隆歡樂世界玩，一入到去第一時間玩既係個叫急流勇進既物體，不過就同急流拉唔上關係。同海洋公園既滑浪飛船可以話完全一樣，路軌短左，過癮程度高左，畢竟坐係車上撞起ｄ浪既高度完全唔係海洋可以媲美（好有海嘯打埋黎果個感覺）好有衝動想坐係架車上面等佢撞起Ｄ浪果下即刻影相，不過為左部相機既安全都係放棄

跟住就係等我表姐同標哥玩完龍卷風暴行出黎，基本上玩乜都好，都係等１個鐘玩１分鐘（過山車類連１分鐘都無）揸住部相機，影極都影唔到佢地２個既我，最後俾我玩到部機無電都未影到一張似樣。

然後走左去玩個叫摩托過山車既物體，最大賣點在於速度，由架車射出去果一下開始速度大部分時間都保持係７０∼８０ｋｍ／ｈ，落斜果陣仲爽，不過路軌單調左ｄ而且短

跟住就係十環過山車，淨係外面睇都夠曬刺激，睇下睇下都諗返起當年玩模擬樂園既日子，估唔到當年我地起既過山車設計會出現係我眼前，仲搭埋上去。下次我諗玩呢個之前一定要帶返套盔甲，事關真係撞到手痛腳痛頭痛．．．之前未感受過３６０大環，今日終於都試到，個人完全係押左落個位度郁唔到。今日玩得最爽既絕對係十環，想去長隆既你地一定要試試

然後我就再無玩野，一路影相。之前可能係過山車為最刺激既玩意，不過長隆就將呢句野完全毀滅，跟住我睇表姐佢地玩既係一樣叫Ｕ型滑版既玩意，全園離心力最大。淨係企係下面睇都知過癮，細膽既我自然無玩到。

然後就係睇佢地玩今日最後一樣玩意，都係綜合刺激指數最高既野，鐘擺一個，被命名為超級大擺錘。淨係睇都過癮，飛到４２米高，擺動角度２４０，再加張凳識得轉，又暈又驚（個人評價）不過要影呢樣野張相就慘，超難影。記得呢度控制台個姐姐把聲好正，最記得佢講某幾句野：
「如果害怕的話就深呼吸一下吧」
「你們的叫聲在哪裡！？」
「恭喜你們挑戰成功」（Ｐ.Ｓ　普通話）

跟住去睇左個特技表演，就係呢場表演令我覺得即使我全日都唔玩仍然唔會浪費。一開始最抵死，表姐拎住部相機諗住影相果陣，有條友拎住桶水行埋黎，默數１．２．３，淋水！表姐即場濕曬，好彩部相機無事。場表演既故事背景我唔知（事關聽唔切）淨係知有班工人想走佬。動作好似真既一樣，拳打腳踢果陣喇叭仲有配音。Ｄ鎗射出黎既唔係子彈，不過仍然會好似真既咁射到某Ｄ地方就有火花，射油桶會爆。

跟住返左屋企，真係好累，即場訓著左，到７點出發去姨媽屋企食飯。食完之後就睇一擲千金，睇住條肥佬２４萬唔要要１００蚊，又諗到好多野。

之後返屋企，好早就沖涼，訓覺。

（Ｐ.Ｓ　琴日太累所以打到一半就乜都無）

－－－－－－－－－－－－－－－－－－－－－－－－－－－－
記錄：
Ｎ／Ａ
－－－－－－－－－－－－－－－－－－－－－－－－－－－－
每日隨想：

賭博真係一件相當不錯既玩意，不過前提係你要有捉夠既底牌先好同人晒冷。有Ｄ時候唔到我唔賭．．．明知自己成功既機會難過中六合彩，不過仍然要去．．．因為唔去既話我失去既就唔止係我既賭本咁少野。

抱住貪心既態度去賭定然係失敗，見好即收，我既路將會好行好多，畢竟撞彩既情況出現與否並唔係我可以控制到。
－－－－－－－－－－－－－－－－－－－－－－－－－－－－

今日好神奇咁無懶床，一醒醒左．．．雖然我真係唔想醒．．．因為個夢太正。

久違了既太陽今日終於都見返佢，不過似乎黎得唔多合時．．．行去茶樓既路上真係多得佢唔少．．
早餐仍然係果Ｄ野，係度就不再提啦

返到屋企，大家安頓一下之後就開枱打牌，由於又係反傳統既關係（只可以食自模＆食幾多番都係得２蚊）一開始打得好唔就手，仲要同老豆借６蚊黎打（輸１場都唔知夠唔夠）仲有隻叫「馬仔」既野．．．到而家完場我都唔識計，不過靠住馬仔我贏到可以俾返６蚊俾老豆之餘仲有錢可以自己袋．．．神奇呢

下午閃左去玩中國勁舞，３.１版好多Ｙｕｉ既ＢｅａｔＵＰ歌，不過．．．難度就．．．半睡半醒我諗都唔會ＭＩＳＳ果隻。

呢度勁舞世界之星之上果Ｄ稱號係：

（Ｆｏｒ唔識簡體字既人－－＞ｄ稱號由低至高分別係：舞魂，舞神，舞聖，舞尊，舞之精靈，舞之天使，勁舞之星）
勁舞城既世界，乜野「世界明星」「舞神」通通可以返屋企訓下覺，不過到底返到香港會係咩景象都要等頭果幾條友升到上去呢Ｄ　Ｌｖ先知道

晚上最重點既節目係睇叮王爭霸，又係Ｓｅａｓｏｎ　Ｇｒｏｕｐ既天下．．．預左
然後上左黎打野，仲咁岩俾我聽到首粗口歌，而家諗返起我都狂笑．．．
大概係下午打牌輸多過贏既關係，我而家都無咩落去既意願（雖然就算我輸幾多都唔駛我出錢，老爸老媽幫我俾曬）不過唔緊要．．．情場得意賭場失意，我一路都信呢句野．．．嘿嘿嘿
準備一下聽日招呼某先生（佢專搞破壞）

－－－－－－－－－－－－－－－－－－－－－－－－－－－－
記錄：
Ｎ／Ａ
－－－－－－－－－－－－－－－－－－－－－－－－－－－－
每日隨想：
真係好神奇．．．唔通地脈真係會影響一個人既運程．．．？
今日我就試過唔止一次將Ｄ賭本輸曬．．．

我仍生存，就意味著，我仍然有我既路要走，即使賭上我既一切
我都要走完呢一條路

－－－－－－－－－－－－－－－－－－－－－－－－－－－－

琴晚同山哥一齊訓，一起身佢問左我一條問題：「點解你訓覺ｄ姿勢咁搞笑」．．．．．．？？唔識答

刷完牙洗完面，又要出發去飲早茶，今朝試下著對新鞋先。相當之好著，不過表姐一直話我著左對鞋隻腳好似長左好多咁．．．Ｏｒｚ。對襪又係一個笑場，明明係船襪黎，不過唔知到底係我扯得太長，定係對襪本身太長，我著左落去同著短襪一ｄ分別都無．．．

一路上我都係周圍觀察下，順手見到ｄ過癮既野就影下相，去到茶樓幾乎日日都係食果ｄ野，唔太特別
（Ｐ.Ｓ　相我返到香港會一次過掉曬去相簿果邊）

返到屋企，無咩做，去研究左陣中國既勁舞．．．舊過香港，先係３.０，而且ＢEATＵＰ仲未有新版（４００ＣＯＭ，ＲＣ）冬季戀曲．．．唔錯唔錯。不過最大賣點仍然係高耀太既ＴOGETHER，即使未係ＢeatＵＰ歌。
係時候做正經野

下午開完飯有咩做呢．．．作業＜－－好努力咁完成曬所有中文閱讀理解練習，終於都可以「大覺訓」．．．

做完作業之後走左落去鋤Ｄｅｅ。我地既賭本都算史無前例，輸既人要食大蕉一大隻，到底邊個食得最多我都唔記得左，根據口供似乎係每人食左２隻（輸一場食１／３隻，每隻蕉大約２／３隻手臂咁長，你個拳頭咁粗，當然前提你個拳頭唔似沙煲）

記得第一個食左１隻蕉既人係山哥，最快去廁所既人都係佢，跟住表姐後來居上，第２個去廁所。

晚上出去食飯，綠怡居．．．都去過好多次。一行到入去見到好多來歷不明既人仕，最有興趣既係某女性，因為佢個樣實在好似Ｔａｍｉ，問過好多人都唔知係邊個，走去問阿媽，口氣好肯定咁答我係姨媽既契女，人人都哦一聲，就係猜測就快結束果陣，佢講多左句話「我估架詐」．．．全場倒地。
食既野都差唔多，唔同既係今次上菜速度真係夠曬快，筷子都未拎起就上黎．．．菜都仲係果ｄ，最記得夾起條尤魚一咬，咸死．．．講到好味就碟京都骨，數量好少，不過我都食左幾舊，似乎就係咁我果枱既人唔係個個都食過。

返到屋企，無人鋤Ｄｅｅ無人打牌，又唔想睇電視，唯有就走去搵周公捉棋解悶。１１點鐘，見到個桃係眼前「浮下浮下」，即刻彈起身，原因不明。

都係時候休息下
－－－－－－－－－－－－－－－－－－－－－－－－－－－－
記錄：
Ｎ／Ａ
－－－－－－－－－－－－－－－－－－－－－－－－－－－－
每日隨想：
我無時無刻都發夢，到底邊個夢係真實，邊個夢係幻，我都唔清楚．．．
在這些日子裡，無知就是最大的幸福

－－－－－－－－－－－－－－－－－－－－－－－－－－－－

今朝８點醒左，懶床６分鐘後落去換衫刷牙洗面著鞋，去茶樓飲早茶，都好耐無食呢度既野。我地既選擇係行去，早上天陰無乜太陽，風都唔細，即使行到茶樓都唔覺熱。一路上我周圍望下，一路聽下表姐同山哥哥傾計，某程度上佢地都係細路，講Ｄ野都有少少唔符合佢地教師既身份。

食完大約９點半，出發去廣州，目的係乜其實我都唔知．．．不過我一個仙都唔駛俾就有得食有得買有得玩．．．緊係去。不過預想不到既係，上到巴士，迫滿人，公路上，迫滿車．．．ＯＭＧ．．．到底咩事今日只係星期四詐喎，咁多人唔駛返工去廣州玩？

去到廣州，一落車做既事係擰下條頸．．．好鬼痛。跟住行左去狀元坊，老實講我感覺唔到同狀元有咩關係．．．賣衫賣鞋，甚至連寵物都有得賣．．．咩狀元黎架．．．唔理，最緊要搵返個殼俾我部手機先，水晶殼同膠套我簡左水晶殼．．．感覺上更加可以保護到部手機。睇我表姐買野同我完全係一個對比．．．

食晏，去左一間叫ＢＡＷ（藍與白）既餐廳，再一次體會到水撈飯既味道，食食下果陣，聽到右手邊笑聲幾大，睇左下，有２個７歲唔夠既小妹妹係度，跟住後尾唔知點解山哥哥會同佢地傾計．．．當中記得表姐問２個小妹妹話「呢個哥哥似唔似教師」佢２個諗都唔諗就答唔似．．．隨左笑之後我無俾到第個反應

食完之後去左買鞋．．．哈，＄２６８既一對鞋一個仙都唔駛就到手．．．多謝表姐先

返到屋企，休息一下之後上黎執返Ｄ手尾，做下報告

一餐十分之不錯既晚餐－－＞成枱餃子，我係房執緊ｄ野，遲左２個字落去開餐，不過除左ｄ餃凍左少少之外問題不大，因為到我地完場為止枱面仲有大把餃子任食．．．

食完野之後同人鋤Ｄｅｅ鋤左半粒鐘，輸左幾蚊雞．．．都未試過同一場居然有２個人渣住同花順．．．Ｏｒｚ

然後又要做作業．．．今晚做左３篇．．．名義上做作業，實質上我發緊夢，睇完篇文章就係睇電視．．．有篇文章講跳舞既意義，我特別睇多幾次去細味下（原因不明）

沖完個涼之後上黎做埋第３Ｐａｒｔ，又係時候去搵人捉下棋
－－－－－－－－－－－－－－－－－－－－－－－－－－－－－－－－－－－－－－－－－－－
記錄：
Ｎ／Ａ
－－－－－－－－－－－－－－－－－－－－－－－－－－－－－－－－－－－－－－－－－－－
每日隨想：
今日又同雨水有個親密接觸，感覺十分之好。十分之開心雨水經常黎探我，帶住受佢洗淨過既風

望住表姐同山哥哥既互動，打打鬧鬧咁，好有趣

－－－－－－－－－－－－－－－－－－－－－－－－－－－－－－－－－－－－－－－－－－－