渣打馬拉松唔經唔覺都已經11年啦!當中跑死人既有,中暑頭暈身子不適既多的是,事實上呢d咁既3月春既天氣,的確係好易令人病,就以我小弟為例,早個日已經發燒加咳,可以話慘!早排老婆仔都病左,咁好明顯地呢個已經係一個警號!好可惜我最後都係要帶病上陣!
今朝真係晨咁早起身,3點半!真係仲爽過去晨運!我其實都冇咩點訓,因為主要都係等老婆仔電話,咁岩老婆仔頭痛,我最後等到頂唔順,足之打左比佢,聽到佢把聲,唉!又係擔心啦!
傾完電話,訓得一個鐘都冇,之後就換左衫,就咁樣我就出左去搭火車!火車站平日就5點鐘先至頭班車,今日破格4點鐘開,分外覺得有趣!平日火車站多人到仆街仲要中門大開,今朝就拉左大閘,我係等個時,我就諗如果第時做火車站職員,都要好早起身就返工,都幾辛苦!
4點個時,鐵閘一開,好多住上水既有玩渣打既人包括埋我都走哂入去!我去到月台,我就冇意中見到江sir同埋佢個堆屋企人,不過就唔見佢老婆江太啦!可能江太工作太忙了...
搭火車個時,落住少少春雨,我開始擔心啦!天雨路滑,令跑鞋既咬地力大減,令發力困難左!而且會令呢個危險性增加左,因為萬一有人仆街,或者自己仆,都好金!係尖東火車站,我咁大個人首次見到男廁都會排長龍既奇蹟,江sir就拿拿聲拍底佢,我就冇咁既閒情了,事關我好急呢...係尖東車站,我同江sir要分開,因為我要去太空館個邊做寄託服務,即係由尖嘴sd d野去灣仔運動場,會展係終點嘛!
去到美麗華酒店個邊,嘩!真係好多人,我同起點果個架都相差約200米!企我就圍個d個個都係阿姑或者係個d好少運動既「魚腩」,一起步,我就係咁上位,基本上一開波都過左成200幾個人位,去到西隧口,無意中又比我搵到江sir,江sir佢個排位幾靚,跑得幾舒服!
不過係隧道跑,並非係一件開心事,雖然好有灣岸feel,不過內量有成萬人係一條隧道入面,都咪話唔焗束,一人放一個屁又或者呼吸一下,都已經夠哂焗,我見到有d小朋友頂唔順,企埋係d 民安隊哥哥就抬哂走,有d搞笑地暈倒之餘d人又唔會踩到或踢到佢...我係隧道就一路諗幾時有水站,事關我喉嚨痛,自己手上又冇水,真係好辛苦,個人又乾!好可惜出到隧道出面,都係未見有水站!即係都未有5公里...
5公里既水站,我見到有水水飲,當然就飲啦!有d白癡仔係個到玩水互淋,有d小朋友仲攞成幾廿隻杯,玩starwar!o 撚哂嘴..
係港島d馬路,比較多起伏,跑起黎都幾辛苦...好彩d海風吹埋黎!途經添馬,又見到AIA個攤位,有個大大個摩天輪令我諗起日本橫濱既太陽之輪...
埋尾去到中環個邊,見到會展,真係幾令人覺得開心,個個人都開始開turbo,咁我都唔例行,我就揀左pitch跑法,即細細步摩打腳!咁都過左唔少人,都成50幾人!埋尾500米,當然谷到爆哂啦!江sir係我前面,快我大約1分鐘啦,我就1個鐘7分鐘完成,有病在身,係咁上下的...
咁我係比賽入面就見識到好多野啦!有好多勁人老外,又有好多勁既情侶檔啦!老夫老妻既又有,呢d都可以話係愛情長跑啦!如果第時叫埋老婆仔一齊玩渣扛,到時拖手一齊跑,羨慕死人lor!又夠浪漫wo!掂! |
