今日係放榜日，所得分數雖無法原校升上中六，但慶幸中英文合格(其實有d意外，人地最擔心係英文，而我反而係中文，因為口試果日真係做得好差，以為自己應該得level1，但最後都有level2，更喜出望外的是綜合卷有level4，所以拉一拉中文最終有level3)，

不過有D難以置信係數學竟然得「E」?真係……

不過應考7科都合格，都係一張Full cert呀!

喊就一定有架啦，當阿媽用電話問我幾多分，我都答唔出口  但佢話盡咗力就算啦，之後係原校留多一陣，都係決定報IVE(原本係想報hktt，都係讀旅遊，不過miss話始終IVE既課程經政府評審過，假若想做到管理層的工作，IVE認受性點都高d，所以最後都係揀IVE)

未拎份成績單既時候，我仲同黃雯艷講，係唔係都拎咗IVE個籌先啦，用唔著就另一回事啦(因為我真係有諗過用唔著個籌)，但最後都……

同阿媽搭輕鐵去屯門IVE報名，先前網上拎籌，排636，去到已經可以坐喺戶外帳篷等入Hall，但今日天氣好熱，仲要坐最尾一行，曬到我……

等入hall既過程中，要填一份綠色選科表，填個人資料、會考分數，同埋8個choice，我差唔多都填晒d同旅遊/酒店有關既課程；當我填完先發現，原來d課程名要用英文填，我用咗中文填，所以只好叫阿媽拎過份畀我填。

等左半個鐘頭多d，終於可以入hall啦! 入到去，都幾多人下，我地跟住工作人員既指示行，當COUNTER既人舉起數字牌，即表示可以過去登記。而Hall放咗一台電視機同一個大screen，顯示已額滿的科目，慶幸我想報既課程(1st choice)果陣仲未full，所以我都成功拎到個學位 —— 三年制旅遊業務高級文憑。

登記果陣，我只係畀左個身分證、選科表同之前網上拎既籌佢，咁就搞點，CE張成績表都冇睇過，咁點知夠唔夠分呀?d人報大數咪好唔公平(後尾先知，原來所有應屆會考生的成績都已經save左佢地既電腦度，所以誇大分數係呃唔到佢地既)

離開個hall，同阿媽會合，本來係可以即場交$5000，不過阿媽話我仲可以考慮下，所以就冇即刻交錢。

之後，同阿媽返屋企lu~

沒錯，我今日剩係去撲IVE姐! 所以比起其他應屆會考生，我都算幾輕鬆!

P.S. 離開學校之前，係Hall遇到鍾寶珍老師，佢話專登搵我，問我成績點，我答升唔到原校，佢就問都喺Hall既副校長可以有咩出路，副校長話我呢個成績報邊間副學士(HKU SPACE、中大東華等)都收，不過我最後都係揀左IVE，原因係咩? 下回揭曉。