放榜第二日，基於昨日冇即刻交$5000畀IVE，所以個心開始15/16，今日下午去咗一間私校報名。

果時自己心諗我都達到考A-level既最低要求，點解唔試下升中六? 因此打電話問遵理問下理科仲有冇位，佢話有，就同阿媽去咗柏麗間分校面試。

去到分校，就埋去counter諗住報名，但原來報名填表係課室入面，咁就行去報名啦，都係填d個人資料同埋選科啦，自己揀咗化學+生物+數學與統計學(全部用英文讀)。

填完就等面試，面試個陣係一個教生物既阿sir in我，其實我真係好多謝佢，因為佢講咗一d事實畀我知……

佢好坦白咁同我講，如果我盡咗力都係得咁成績，升上中六其實唔太好，因為14分升到U既機會率都唔係多，更何況我唔係，而且兩個主科都係僅僅合格，中文都只係合格多少少，因為A-level既野深好多，會考個底都打唔好，加上我要求用英文讀，咁樣勉強升上去只會做炮灰(實情佢冇講過「炮灰」呢兩個字，但意思相近，都係話盞墊人地底)，之後佢問我阿媽對我有咩期望，我聽聽下已經喊咗出來，詳細講過咩唔係好記得，但總之聽到我想喊啦

其實阿sir曾經問過我點解唔轉讀334，主要因為冇A-level咁深，自己的會考成績亦應該可以handle到。咁我都好直接答佢，d課程內容不同咗，尤其係通識(其實我曾經讀過，但我掌握唔到)，現時為止都冇一間中學夠膽話自己通識教得好，不想花時間適應，一年追咁多野會好吃力，倒不如揀A-level。

面完試，最後都收咗我，但都係要畀咗錢先留位畀我，不過我都係冇即刻交錢，因為我當時既心正係諗緊個阿sir講既野 —— A-level好深……

我同阿媽走咗去荃惠同大眾搵A-level既past paper，果然，我拎咗一份A-level化學卷(中文)睇下，心諗：「嘩?咩嚟架?咁深既?」

死唔死呀，睇中文都唔係好明佢講咩?d專有名詞完全同會考果d完全係兩回事(我本身化學用中文讀)

結果，我最後都係冇報遵理，始終覺得花2年時間去追A-level，升到大學就話值得姐；升唔到，得個中七學歷有鬼用咩?

再講，中七先再駁IVE，仲浪費錢同時間啦(中五IVE=三年，預科+IVE=4年；中五IVE=約$70000，預科+IVE=約$100000)

讀中七都係多張A-level cert姐，但將來投身社會工作，大多數老闆看重既係會考成績單，A-level成績單相對較少

更現實的是，雖然拎住高級文憑唔代表一定搵到工，但就業率應該比拎中七學歷既人好!

加上，喺IVE我可以讀我想讀既科目，實在唔希望再行冤枉路同浪費屋企人錢，所以我最後都係決定放棄遵理中六的學位。

對於我阿媽來講，能夠升中六就升，但佢都好尊重我決定，感謝神賜予我一個明白事理的親人，亦特別多謝喺遵理in我果位生物阿sir，佢至少比起我原校的老師，更願意同我講老實說話，只係……付出的代價係$50報名費呀 (感覺好似係我畀錢個阿sir，叫佢講d野畀我聽，但佢講得都有道理，令到一個迷茫人知道中六這條路未必適合自己)

這一切一切，我相信都是神所安排，指引一條適合我走的路。將來條路係點，我唔知，但我知道—— 上帝早已預備。