Day 1: HK > 沖繩 > 那霸酒店check in > lunch@第一牧志公設市場 > 首里+玉陵 > Dinner@ sam's > 國際通 > 住JAL
由於早機既關係, 零晨時分就要起身, 搭的士去機場, 早一晚已約定的士, 今早都落過雨, 地下都濕哂, 希望沖繩天氣不太差 (出發前上網睇過沖繩天氣麻麻地)
好彩做左網上CHECK IN, 去到只係搞寄倉行李, 如果已做網上CHECK IN 排既隊係唔同,我見到未CHECK IN 個條隊都幾長, 我地都只係5分鐘左右就搞掂 , 搞掂就去食個早餐先。
影返張必影相片先
係飛機度都有個豬肉包食, 雖然唔係話好好食, 不過都唔太難食既, 我就幾鐘意佢個包既口感
眨下眼就去到, 唉.....落雨tim.....
入境既地方不大, 好彩我地排左條好隊, 好快就搞掂過關, 行李都好快拎到, 搞掂哂就要行返去國內機場個邊先可以搭到單軌,行過去都好快好方便。
去到單軌有個職員企係度,唔識買可以搵佢幫手,佢都好好人,好樂意,因為今日主力都會搭單軌,明天先租車,所以我地買左1日票,一日票任搭,只係660円,真係好鬼抵。
我地間酒店係國際通條街裡面,由單軌行過去都好快,由縣廳前站或牧志站行過去都差唔多,今次我地揀左牧志站落車
我地頭3晚會住係呢間房間不大不過算5臟俱全既 JAL CITY NANA 酒店, 我知道日本既市內酒店通常比較細,不過呢間都叫做可以一次過開哂2個喼,都算係咁。
 
準備出發去食我地第一餐LUNCH, 去第一牧志公設市場食海鮮, 旅遊書及網上都有好多人介紹,但因為夜晚就比較早收,而地點又好近我地酒店,所以選擇LUNCH食。
我地揀左呢檔,因為個男仔都幾靚仔梗係唔係啦,因為佢識講中文,仲要講得好叻TIM, 因為溝通到,所以揀佢佢仲介紹左我食大眼雞刺身,都幾得意WOR。
我地既刺身船,超豐富,仲試左超大隻既夜光貝。
 
差唔多有我2隻手咁長既大蝦800円一隻,熟左都好大隻,仲要係蝦頭勁多膏。
 
呢個就係大眼雞2食, 一邊刺身,一邊煎來食, 都幾特別!呢餐食左14950円
 
醫好肚,我地就搭單軌去首里城,雖然係首里站落車,但其實都同首里城有D距離,我地都花左D時間搵,都要問下路咁,先去到,不過我發現係日本唔係市區既地方,唔知點解條街冇乜人,真係有時想搵人問下路都有D困難,幾經努力,終於去到。可能下雨既關係,上到來真係又大風,又凍。
今日兒童節,兒童免費入館,不過冇我地份
行完就搭單軌返國際通個邊食晚飯,我地好搞笑咁研究架單軌其實係點樣行,因佢真係來回都係單軌,咁同一時間有幾多架車係度行,架車點樣轉線返轉頭,其實真係好無聊,不過我又覺得佢好先進,條路軌會咁樣轉線,冇諗過咁大舊野都可以咁樣變左S型轉線。
搭返轉頭時我地就係縣廳前站落車,呢個站好近國際通既入口。
御菓子御殿是買手信既地方,野食可以任試,不過我地今日未買住,呢間野好多分店,反正之後都仲有機會,唔洗咁急住。
行左陣國際通就去醫肚先, 今晚係SAM'S RESTAURANT食鐵板燒,呢間野既員工係全部著水手裝,幾特別! 消費11880円
食飯前每人都要著圍裙
呢間野最特別既地方係叫特色飲品佢會用好得意既杯裝上,而呢隻杯係會送一隻新既比你,檯上隻鯊魚杯同獅子杯已比我帶左回家。
 
今日仲試左非常有名既鹽味雪糕,仲可以自己另加上不同既調味料,都幾特別。
第一天行程完結~ 去第2天
戀戀沖繩自駕遊6日之旅 DAY 2
戀戀沖繩自駕遊6日之旅 DAY 3
戀戀沖繩自駕遊6日之旅 DAY 4
戀戀沖繩自駕遊6日之旅 DAY 5
戀戀沖繩自駕遊6日之旅 DAY 6
|
