2015年2月3日 下午

終於到左科英布拉(Coimbra)啦~~

大巴放低我地係Avenida Dias da Silva之後,

三個人六件行李,寒風中夾雜毛毛細雨,

係無聯絡方式ge情況下尋找房東,

唔知係唔係有人黑住, 我地一開波就行錯左,

落左個斜坡, 跟住睇個地圖先知唔洗落, 

落斜唔緊要, 但係d路係同新馬路一樣ge石仔路,

d行李又大又重, 仲要一人兩件, 細雨又開始轉大雨,

好彩有個超好ge人黎幫我推行李,

但係非常不幸地, 揾到房東婆婆之後先知間屋未入得,無水無電無煤,

而且佢架車只可以比兩個人+兩個喼上,

我只能同幫手推行李ge先生一齊去個咖啡店避雨,

期間佢知道我地無地方住, 幫我地揾埋屋,

但係我地最後都係決定住青年旅館,

同時, 另外兩個同學都因為租唔到屋都同我地一齊住青年旅館,

好心ge房東婆婆約我地第二日睇房..

入住青年旅館ge第一晚,

大家都因為長時ge飛行同不幸ge遭遇而感到百般疲累,

人生地不熟加上天黑, 我地唔敢出外就餐, 只好將我帶黎ge杯面一次清晒,

葡萄牙ge氣温真唔係講笑, 尤其是夜晚真係凍到死, 

傻仔ge我地唔知原來被同枕頭都放左係櫃到,成晚凍到痴左線,

唔知係唔係時差ge關係, 大家都五點左右醒,葡萄牙比澳門慢八個鐘

第二日食完豐富ge早餐之後,坐房東婆婆ge車去睇房,

但係婆婆知道我地要讀ge學院隔離住屋好遠,所以勸我地再揾過第二間屋,

好彩我地一早約左幾間屋, 最後都係揀左一間近百貨公司ge五人房,

但係因為未汁好,所以大家就要住多一晚青年旅館,

今次我地懷住唔同ge心情入住,因為我地已經揾到屋la!!

下午去左學院報到,但係無人,就番左去休息

夜晚我地去左近我地租屋ge百貨Dolce Vita食晚餐,

我地去左pizza hut, 但係點餐戈度就同澳門非常唔同,

澳門係有套餐, 呢度就要由前菜開始點到甜品,

因為金錢有限, 我地要求只係單點一個批,

食完之後大家坐上的士番青年旅舍.

(下回待續)