| «‹ June 2026 ›» | | S | M | T | W | T | F | S | | 1 | 2 | 3 | 4 | 5 | 6 | | 7 | 8 | 9 | 10 | 11 | 12 | 13 | | 14 | 15 | 16 | 17 | 18 | 19 | 20 | | 21 | 22 | 23 | 24 | 25 | 26 | 27 | | 28 | 29 | 30 | |
|
2013 年 8 月 19 日 星期一  |
粗口點黎？  |
分類: 作既野 |
今日就不如講下粗口點黎啦。
粗口呢樣野，係中國人地方難以公然討論，情況有如討論「性」一樣，不過大多數人都唔肯面對或正面提及，其實兩樣野都好正常！傾就必要以正經的心態，帶有歪念只會顯得無知。其實我地有必要去面對，皆因現在港人粗口真係何其多，有啲好難聽，有啲唔理乜場合都講，有啲小學就已經滿口成文，我地係要正視問題，你越唔講越去逃避，佢地就越講得勁。
香港既粗口基本上等於廣東粗口，但並唔完全相等於廣東粗口。廣東粗口適用於講粵語既地方，包括華南地區、香港、澳門、及海外唐人街等地...特別係單字有時會放係正常語句中以加強語氣用作「助語詞」。果啲每人都出現係廣東人香港人圈子既廣東粗口/香港粗口，係有音既，但隻字點寫就毫無準則。原因就係政府、學界及社會壓力，教科書及老師不教不傳、商業機構出版比學生同學界既字典都無印到，、現時電腦字庫都無包含，以至正字日漸失傳，使廣東粗口以及俗語等多數有音無字。故此近代有人以「門」做部首，並內加同音字去表示。
粵語粗口既變化仲多，鬧人既意思都更加下流，刁鑽得黎又煩，所以中國北方人亦唔太鍾意南方人，其一就係佢地話南方人比較粗魯，講說話特別唔乾淨。但此等「門」氏(「尸」氏)部首字未必為香港獨創，因為早於二十世紀三四十年代已經出現，而且暫時未能考證係邊個諗出黎，但因為係二戰之後香港社會非常流行使用此等字，及後當時港英政府收錄係官方字庫，所以佢地每個都「獨當一面」，各自有其意思及用法，而且可以互相配搭或交換使用，可謂粗口中既皇者！因此粗口可謂五花八門，有粗到不能入耳，都有輕描淡寫，更有狠毒詛咒，亦有不明所以...Orz
點解小弟無啦啦講「粗口」呢？皆因其實粗口係廣東話黎講真係好加強到語氣，令到句子意思更加能夠發洩到佢既真正意思，而且講粗口唔一定係「唔好人」、「衰人」等等......
因為上次同小偉傾到，無粗口果陣係用咩字代替？由有第一個粗口果陣，係邊個定義佢為粗口？同埋又係邊個講出第一句粗口呢？呢樣真係偉大既創意黎ＸＤ
最後引用愛出貓既一句：「粗口，係一種文化，要認真對待。」
|
| 發表時間：2013-08-19 06:59 PM [ 訪客留言(0) ] [ 編輯日誌 ] [ 分享至FACEBOOK ] |
| 個人對警察的感覺....... |
分類: 作既野 |
因為小弟實在身同感受，所以先大費周章黎嘔呢篇野出黎，記得有次就剪完頭毛，無啦啦比三位便裝叫開左，仲屈埋去死角，正常地出示身份證問幾罷了...結果原來係好唔同，記得當時對話如下：
A警：你叫乜名呀？
我：ＸＸＸ(真名)
A警：你玩野呀？問你跟邊個呀Hi Auntie！
我：.......
B警：呢張咩黎架？
我：街機卡(車卡)
B警：你準備落機鋪咩？
我：唔係呀，返屋企咋
B警：你唔落機鋪帶張証出黎做乜Seven野呀！
我：.......
C警：放左佢啦，令仔黎姐。
仲有一次只係我落完街幫阿媽送啲野，送完野緊係想快?返屋企，天口咁熱，點知又中伏。
A警：做乜唔帶身份證呀？(果陣我15歲)
我：我15歲姐，再講我都只係落落街幫屋企人送野......
B警：咁我諗你都唔記得自己身份證係乜啦！
我：唔係呀，我記得呀，YXXXXXX(X)
A警：死令仔，咁向左走向右走串，等陣啦！
B警：算啦，睇佢都係無料，放佢走啦。
我更係無投訴啦，世途險惡，深知官字兩個口，你唔通報警咩？口同鼻拗，唯有忍，而當時感覺真係比一班更黑社會既黑社會夾住黎兇...
點解我提返起呢件事呢？就因為近年警方醜聞越黎越多，係警車入面煲煙、仲要係警局強姦都夠膽死，雖然唔可以咁武斷一竹竿打一船人，但係無可否認警隊質素正在下降！又例如，上星期五放工，都不過係樓下附近，放工時間，大把人趕住返屋企，一個唔好彩同警察個眼神對望，咁就知道奶野啦...有人就係討論區講，話依家警察做?乜？分析左好耐，結論係佢地只係識查身份證！可能我本身樣衰又好，個款衰都好，有人成世都未比差人查過，但係我返工只係返左幾個星期，就查過兩次囉...你查唔緊要，以前細個深夜流連街上，差人都同你傾下計了解下你乜事，不過比較後生一輩既差人，查你身份證唔會問你任何野，點解？咁佢為咩查你？顯示佢權力，因為佢覺得唔妥你囉，好簡單！咁好啦，你唔係懷疑我先查架咩？你唔問下我野又要查，咁你懷疑?咩？為左交功課叫有做過野？最慘係大部份人都認同，查人身份證既後生差人態度都係非常之惡劣！我承認我個款望上去係幾衰，12歲著校服返學，即係無校章果?，咁都要比四個藍帽子搜身，仲搞到我差?遲到！有次留長左少少指甲，就比四個藍帽子圍住問我係咪想用指甲行兇呀...！
不過肯定既係仲有好多好差人，最起碼以前教我體育同英文既阿sir就真係阿sir黎...(輔警)，我諗我同差人結下不解緣，有次我隔離班有人打架，我又會係被懷疑既一個囉，不過阿sir都好有禮貌，仲唔好意思添，職責所在我無怪佢∼
講真依家考差人既要求實在係降低左！連我中學同學都話讀完某課程唔知邊幾科合格就得，無人話唔係為左錢而做差人，係人都要出糧，但係果種權力高高在上既心態真係會使人腐化。如果香港無ICAC，我相信我地依家仲係行緊五、六十年代既路！以上發生咁多事，小弟係完全無所謂串哄哄既態度同佢地講野，不過唔明佢地做咩係都要對良好市民惡言相向。警察有善助人既形象，已經在小弟心中熜滅了......
或者小弟應該返屋企對住塊鏡自我檢討，點解生得咁樣衰，對唔住呀差人哥哥，一日都係我個樣累事，我係好人黎架！＞＜ |
| 發表時間：2013-08-19 12:32 AM [ 訪客留言(0) ] [ 編輯日誌 ] [ 分享至FACEBOOK ] |
« | 222 | 223 | 224 | 225 | 226 | 227 | 228 | 229 | 230 | 231 | ... | 426 | »
|
