今日就係派試卷嘅重要日子,未踏入學校門前,我個心已經跳下跳下,唔知自己考成點,數學會唔會唔合格,英文又唔知攞唔攞到A。

   上到課室,第一堂係中文堂,中文老師派中文閱讀同埋中文聆聽卷,其實閱讀卷我都唔係太有信心,因為我知有幾個標點符號錯咗,同埋排句成段都錯咗。

    老師首先派中文閱讀卷,我打開份試卷,係──86分,嘩!攞到A呀!我諗我生平閱讀卷攞到A炸!我同第二d同學交換分數,直到老師叫我地安靜先收口。老師同我地對晒成份卷,都花咗唔少時間,當老師對晒卷後,我地又開始吵起上嚟,開始講起分數。

    接著,老師又派咗聆聽卷,89分,都唔錯呀!又攞到個A。好彩呢份卷都兩頁,所以好快就對晒,當全班嘅聲浪又高起嚟時,鐘聲啱啱響起。

    跟著係英文堂,老師話我地嘅G.E卷考得幾好,有好多人攞到A,更有一個攞到100分,我隔離個位話我英文咁好,一定就係攞100分個個,或者係嗰個新嚟嘅插班生攞,但我認為應該係個位插班生,因為我知道我有一題過去式串錯咗。果然,我只係攞到90分,都幾好呀!攞唔到100分,都攞到90分,都係A啫。個位插班果然不負眾望,攞咗個100分。

    對完G.E卷後,就要對聆聽卷,我對呢份聆聽卷十分之有信心,就算攞唔到100,都可以攞到A,果然,我攞到100分,但呢個100分,睇嚟好多位同學都攞到,所以我都唔係咁高興。

    一個小息後,就係數學堂,老師一開始要罵一位經常性唔返學嘅同學,罵咗十五分鐘後,終於派卷,當份卷落到我張枱時,我真係好緊張,怕打開試卷後,見到一個唔合格嘅分數,但醜婦總須見家翁,我打開份卷,攞到個81分,即係B,都唔錯呀,起碼冇唔合格。

    有一分鐘,我幾乎以為老師改錯卷,俾少咗10分,但係後來發現係自己嘅錯覺,俾隔離笑到肚痛。

    跟著係普通話堂,普通話我冇唔敢話有好大把握,順應天意吧!當然,神好庇佑我,攞到個92分,太好啦!又多咗個A。

    跟著本來係體育堂,但常識老師借咗嚟對卷,因為常識堂係下午上,但係因為今日係上半日學,所以以無法上到常識堂,就改咗係體育堂上面上。老師派試卷後,我發現我自己攞到90分,算吧!都幾好!老師開始對卷,平時呢一刻我知道咗分數後,就會倒在枱上,乜都唔理。但呢一刻,直覺話俾我聽,我要留心聽老師改卷。

    當去到第四頁時,有一題老師改錯咗,呢一題係兩分,又可以為自己攞返兩分,真開心!!!!