各位!!!真係有d抱歉,咁耐都冇打blog,經過朋友既提醒,我決定係我既有生之年,一定會繼續打落去!
係冇打blog個段日子裡面,我經歷咗好多事,但唔想再係度再提,總之,我已經畢咗業,每日係屋企唔係睇電視就係瞓覺,過住一d好無聊既日子。琴日係六年級放榜既大日子,呢個日子證實我入咗一間叫"基朗"既中學,呢間學校話好唔好,話壞唔壞,但呀媽話聽人講呢間學校都唔錯。
講返今日,因為約咗媽既朋友去大埔打羽毛球,book咗8點,由天水圍去大埔,車程最少要一個鐘,所以琴晚好早就瞓,但係今朝一起身,就發覺已經7點半,我即刻跑去媽間房,問佢點解仲唔喊我起身,佢好耐心咁話我聽因為今朝黃雨,所以可能會遲d去,我不停咁向佢發牢騷,最後佢終於肯起程出發。
我地首先搭巴士然後再轉火車,當我地到達大埔既時候,已經9點3啦,我地約咗媽個朋友係客務中心等,結果佢竟然遲到,攪到我地幾乎上搭十先入到book咗個羽毛球場,冇辦法啦,剩返兩個字都要繼續打落去,當到十點時,我媽既朋友建議繼續book落去。唔知係咪幸運之神既眷顧,好奇蹟咁,竟然冇人book十點至十一個段時間,於是我地繼續打落去,打到十一點,大家都話唔夠"皮", 於是又繼續book落去,又再一次受到幸運之神既眷顧,又好奇蹟咁打到十二點。最後,到十二點時,大家都話好累,於是就金盆收手。
之後,我地同媽既朋友一齊去食飯,食到二點,我地跟媽既朋友道別, 因為我地要去中學註冊,個位朋友帶領我地搭一架可以去到元朗既巴士,之後就搭巴士走lu!
當我地到達個間中學時,我見到好多唔同學校既六年級生,於是就跟佢地沿著樓梯步去呢一間中學,當我地去到一樓時,已經有兩個老師同同學企係度等我地,佢地既職責就係負責檢查我地有冇帶漏野,琴晚我地已經做去準備,所以當然冇事啦!果然,佢地好草率咁檢查我地d野就放我地上多一層。一上到二樓,就有個呢間中學既學生俾咗張中一記錄表(大概係咁叫)俾我地填,之後請我地去一間課室裏面填,入到課室,已經有幾個家長同佢地既孩子係度填緊個張野,於是我地都搵咗個位,開始填。
係我地填既同時,有更多既家長同佢地既孩子都入黎填個張野,過咗十分鐘之後,成個課室d座位都滿了。當所有人填好個張野後,呢間中學既校長就入咗黎,同我地講咗一番語重心長既說話,比如話我地唔應該睇咁多電視、對咁多電腦,同埋電腦就應該鎖密碼咁,我發現佢既手法就同我呀媽冇咩分別,最後,當佢偉大既演講講完後,我地去咗第二個室別,去將個張升中個張野俾佢地核對,成個過程分咗十分鐘既時間,最可恨既,就係要做佢地派既暑期作業,最後佢派咗張成個暑期要返黎呢間學校既時間既表,最後就放我地走。
唉~~升中學仲以為好好玩添,點之原來要咁忙,早之我留級啦!!!!!
