大年初一！！！

尋晚訓得好舒服，電話響都嘈唔醒我，到九點幾都唔願起身，又係賴下床咁。之後起身梳洗，換衫同父親母親大人拜個早年收埋紅包就出門了！個時都仲係未訓醒咁…不過已經訓左成八個幾九個鐘！

入左麻麻度，差已經人齊了，年年都係我地最尾…^^周圍去逗利是！之後十點幾就食飯了，早餐都未食…今日食齋，好肚餓呢！食完坐下，睇下電視咁，播龍咁威2…睇返有D 位真係幾好笑！睇完又食下年糕、蘿蔔糕…之後睇下英文，不過都背唔得幾多，仲整到成本Notes 濕晒…-_-"之後就返房訓左陣，訓到三點幾就走了

之後去左婆婆度…上到去都無叫人，係咁恭喜發財！收左好多利是…^^細妹就當然比人訓話喇，而我就食下糖果、蛋糕咁…之後睇老豆打牌…好悶！到左大表哥同埋二表哥黎左就可以鋤下D…上到婆婆度真係好似去左賭場咁，兩枱麻雀，另一邊就鋤D。我地鋤左四十幾局之後埋數…我有成二百隻，第二！好彩，唔駛輸…

之後就去食盆菜了，好多餸，食唔停咁…食完就同大表哥、二表哥同埋細姨打衛生麻雀…都係玩下咁！之後佢地大人食完就比返佢地了，而我就無野好做…其他人都走了，而我就Hea 到十點半就走了，落左金威玩返幾手…咁岩撞到Penis、B樂、阿鵬佢地！頭文剛剛有兩個位，好似係度等緊我咁，哈哈！無用Card 玩，因為輸多過贏…^^

到十一點半就走了，因為爸爸媽媽唔知我去左打機，之後搭輕鐵，等車等左好耐，真係激氣…由元朗返屋企用左40-45分鐘，早知等埋阿鵬佢地坐佢地車仲好喇…返到屋企又未有人，佢地仲係婆婆度打緊牌，之後沖涼玩電腦打日記去到點幾兩點先去訓，到我訓佢地先係剛剛返！唉…

婆婆的貓貓

麻麻新養的狗狗-->     <--Tiger

都係Tiger 得意好多…>_<