忙就忙嫁啦，但都要抽啲時間打下blog，冇錯，我仲有打blog，近期識我嘅人可能未必知
仲有blog fans (講下姐XD)，其實都係記錄近況，比大家知我對而家生活有咩感受姐，都係一個比我喺度介紹自己嘅平台，幾時都話文字係我最好嘅表達工具，加上而家啲人睇我blog多過聯絡我，唉，什麼是科技，唔講呢啲啦，講返正題
呢段期間經歷嘅嘢實在太多，只係短短四個月，我嘅圈子就起咗好多變化，識多咗人就唔洗講啦，但同時都lost唔少嘢，愛情仍然係0進展，唔係0嘅，有郁過，但最後都原地踏步姐，唔洗叫我加油了，冇用的，仲有，人性嘅醜惡咩都出唒嚟，嘩，太多嘢講，等我慢慢打先
拿，是咁的，其實我差不多成個暑假都係返景嶺，即係我都講過話我喺我以前畢業嗰間中學做Part Time，都差唔多成年，但今年個暑假真係好多嘢做，話說我上年個School Gala到而家都未加好字幕。老師換機過程順利搞掂，不過好多嘢應該都要慢慢適應，新系統新操作，相信都慢慢上軌道，其次係八達通點名系統、E-Booking等等，時間上都要慢慢遷就。人事職位變動，唔講太多了，總之好彩嘅係好快同新同事夾得埋，唔錯唔錯
係啦，話說之前都有個練大隻大計，除咗時不時跑吓步(不過而家忙到冇咩點跑)之外，暑假上咗康文暑搞嗰啲咩教人做gym班，而家我終於可以用到體育館啲健身室，但我仲未plan我幾時開始做、做幾多嗰啲，但相信好快要定嫁啦，因為真心想練，起碼應該會keep一年到，再睇睇自己練成咩身型，再作調整，教練教得好就唔洗講啦，最緊要知道自己想做到咩地步，跟住個plan行就得，我要加油!
打鼓打鼓打鼓，我好想打呀!跟住有啲friend就喺度問，點解無啦啦想學打鼓嘅。其實就咁，我由中學開始就已經好想學嫁啦，只係一直冇落實，到咗而家，我真係忍唔到，一黎打鼓好型、二黎其實我好怪，好鍾意連續打相同嘅節拍，好過癮。有諗過係跟出面正正式式咁學，但最後有個friend知道我想學之後，決定教我，不過我仲未開始，但聽人講要學識好易、學精就難，所以我希望可以好快上手，打到流行曲我都已經好滿足了。
呢個暑假第二忙嘅嘢就係我入了一隊新crew，名叫弦影攝製，本身其實是想幫手，因為佢地差一個cam man，咁我本來就係拍開片的，加上拍片係我強項，又比過人讚我拍片定(係咪好自大XD?)，所以就入了去啦，本來想兩面crews兩邊走(同時幫原來隊crew同新crew)，但因為某啲原因，我而家根本完完整整地入了佢地度。呢邊啲人真係好有決心，雖然個個都唔係正常(包括我在內)，但就比人一個好pro的感覺，從開會諗idea到最尾檢討大會，個個環節大家都好投入好努力，雖然錯誤甩漏撞板就一定有，而且好多，但睇到大家想將呢隊crew慢慢發大嚟搞，我就感到前路一片光明。
由大至監製導演、細至場記雜務，每個崗位都好重要，一個都不能少，所以由一開始加入，我已經私底下同唔識嗰啲溝通溝通(包括演員同上套片嘅成員)，希望盡快同大家夾到，到真係見面嗰時已經係有講有笑一齊玩(可能我了解每一個成員嘅嘢比起一早係弦影成員嘅人所了解嘅仲更加深入清楚)。喺磨合過程中大家都難免會有意見不合，有時又唔知點解會發生啲意外，亦都比人鬧過、話過、批評過，不過到最後大家都係笑住咁完咗成件事，最重要係過程中學到啲咩。喺我加入新crew後，我圈子又擴闊了，人都長大了，又得到好多得著，對世事又有另一個諗法，喺隊crew度，我搵到一個寄託。其實，拍微電影最享受嗰下唔係頒獎典禮，而係見到自己落手落腳比心機去完成每個Shots，跟住得到隊員認同、讚賞，什至其他朋友、拍攝場地嘅老細、路人嘅鼓勵，嗰份滿足感真係唔係用字可以形容，所以，每當導演叫完Cut之後，我好高興我地又完成一個Shot，但另一方面又覺得我用咗一次表演自己技術嘅機會，所以有冇獎真係其次，最緊要自己玩得開心。
我唔知道每段片嘅製作班底(包括核心成員)係咪每次都一樣，我唔知道演員完咗件事之後會唔會同我繼續保持聯絡，我都唔知到我幾時會離開呢隊crew(但短期內都唔會走)，我只係知道，我確確實實完完全全的的確確冇後悔入咗「弦影攝製」。不過我最想講嘅，就係呢兩個月內，相信大家都知我係一個咩人，性格上我係有啲所謂智障，成日都無無聊聊煩住大家，但內裡其實我唔係咁幼稚，我認真喺上黎真係唔係同你玩玩下。當然，亦都感謝大家對小弟嘅照顧，真心，其實你地個個都好細個。所以呢，大家一齊努力去做好呢件事，第時我地要做生意了!
上面講咗話我加入新crew，咁我點樣面對我舊crew呢，起初，舊crew某成員係完全接受唔到我幫第二隊crew的，亦因為咁，本來好好嘅朋友關係就開始破損，原因係佢話我原本應承了，以後都喺原來嘅crew唔可以走，但我想講，我真係完全冇咁講過，我起初都有諗過補救(例如諗下，突然退出新crew)，我再重申，我唔係想離開你，而係想增加自己經驗，我都問過好多朋友意見，認為這是基於觀點問題，自己不用計較太多，亦唔好為呢件事而唔開心。不過而家講咩都冇用啦，大局已定，最起碼大家都可以做返朋友，見到面都可以好似以前咁玩，我唔知道，經過呢件事之後，我地關係有冇密切到，但我知道，大家嘅關係係基於彼此尊重同支持而建立。只能說，可能我地會避談拍片嘅事，但大家仲係可以出來玩出來hea的。真的想講句，我唔想因為咁又冇咗一個好朋友。
我唔係講笑，其實我某程度上都可以算係毒X，因為我冇女朋友，仲有…我間中會打機的，所以歡迎大家話我「你個死毒X」。打咩機，打LOL囉，不過，我又唔係真係完完全全只係打機，因為，我識到所謂嘅網友。其實都唔係我主動去識嫁啦，係有次打打下，佢地要求用MIC打，咁自自然然咪識咗，而家去到嘅地步係大家晚晚準時Online(當然我忙到咁，一星期On一兩次咋)，仲要開埋Whatsapp Group，有男有女，10個人，我地講嘅已經唔係局限於點打機，而係乜Q嘢都講一餐。有啲都幾熟，大家都身懷絕技(唔係指打機)，小至中學生、大至返工人士，咁呢，想問幾時出一出來大家食餐飯玩下HEA下咁呢? 希望呢個圈子可以Keep到，我都想睇住大家成長，特別忠告某幾位: 讀書啦，打咁多做乜，到時好似我咁就辛苦啦!
過渡段，大家睇到呢度，就會明白我點解成日話忙，因為我真係好多嘢搞(又返學又返工又拍片又做GYM又打鼓又打機)，不過，時間係自己安排的，唔夠用咪排過個時間表排到夠用囉，唔而家忙等幾時忙，辛苦就辛苦嫁啦，不過其實真心覺得充實，因為，你根本冇時間HEA，但有啲人應該仲忙過我。
黎到呢度，我又講返朋友，係想講一直到而家都Keep到嘅朋友，我真心感謝你地可以陪我行到呢度，因為Keep到真係唔易，你地亦都係最了解我最容忍我最清楚我嘅嗰批人，雖然唔知下年呢個時候仲係唔係朋友，但我都希望大家係可以Keep住落去，感謝你地每一餐飯都聽我細說我嘅近況，每一次嘅提點每一次嘅鼓勵對我黎講，真係一舊錢袋落我袋。Thanks so much! 唔多講啦，反正我喺Blog嘅嘢你地都知唔少。
故仔時間，幾時都講，感情嘅事真係要諗清諗楚、清清楚楚，最忌係模模糊糊搞唔清。以下嘅事，我唔敢話我好清楚，但從以下件事，我諗到啲嘢。話說a鐘意b，b起初都有啲冧a，但b相處之後決定唔接受a，之後a就講哂粗口狂鬧b，b表示無奈加憤怒。首先，我不是當時人，加上我冇立場，但因為呢件事牽涉到我朋友圈子，所以又想講下，不過以下嘅嘢睇下就算，唔好駁我。
(1) 其實雙方都冇錯冇啱，只係處理事情上出現問題
(2) b真係諗清楚先決定啦，到頭來傷嘅真心係自己，雖然話感覺黎到就咩都冇理咁多，講就易做就難。但算啦，唔知衰仲點會提防下次，經一事，長一智
(3) 作為男士，我明你真係好難受，覺得哂時間，但女方可以點，好好考慮自己要一個咩人吧，始終講真嗰句，男士講粗口鬧女士真係好唔掂，比返少少風度啦
(4) 感情沒對沒錯，最緊要係自己點處理，別自毀形象，雙方都係
講完，仲有好多唔多講了，反正人地嘅事，其實其他人冇咩資格講咁多，最幫到你地嘅，其實係你地自己
講到愛情，大家又開定花生啦，不過唔好意思，今次真係冇咩講，因為我近排真係空白，你見我忙到咁邊得閒搞呢家嘢。講咁多都假嘅，點會完全冇，只能說，不斷落空，想知自己成唔成功，其實唔係表白嗰一刻，而係平常大家點相處。老實講，感覺就最基本，但就變得好快，或者我自己都仲未知，講真，識咁多人，點會冇Feel，但其實好多嘢我都做到好出面，不過人地收唔收到，或者接唔接受，就係另一回事，所以我見唔係好對路，就收手了，因為傷嘅唔係普普通通一段關係，而係自己嘅自尊
自上次打Blog後，有人鍾意過我，亦都有人比我鐘意過，但係每一次嘅決定，我都一定要諗清諗楚，因為亂咁黎，係一定會有後果的，可能有啲人唔認同，覺得開始咗再算啦，但我發覺，我過唔到自己嗰關。
講咗咁耐，其實咪又係想講我又衰咗。車!講咁多嘢咪又係鋪設之後講嘅嘢，說話技巧吧!! 詳細唔講啦，總之就係一直自己誤會，會錯唒意，咁點好? 放棄囉，死纏爛打都唔會有用，不過就講清講楚，冇一直拖落去，好彩都真係冇事，可以繼續見面一齊玩。有機會再詳談啦，呢啲太私隱唔想講太多，講多廢事傷心。
最後想講，其實都唔係自誇，大家話啦，我係咪好人先? 唔知點解，自中四五起，一直都有人搵我求助，傾心事，又嗰樣解決唔到，又呢樣唔開心，男男女女，通通咩問題都有，其實都幾開心，知道自己都識安慰人，都識幫人解決好多嘢，最後就聽到句多謝你，係出自真心嗰句，助人為快樂之本，原來係真，唔係厄人的，不過都係嗰句，希望大家都唔好太多問題啦，如果唔係人人都悲哀。我好人，但呢個社會唔係個個都好，有人什至同我講，你好人過頭啦，要顧下自己嫁，我就係咁，呢度幫下，嗰度幫下，大小二事一手包辦，到最後，佢地一句唔該唒嘅滿足感就會大過我幫佢地嘅辛苦，做人，大方啲好，唔好咁自私，因為，你有困難嘅時候，人地都會幫返你，support你。咁我幫過/安慰過咁多人，我有事都唔驚啦，係咪先?
5句講哂，我對未來充滿希望，自己都要Keep住改變同進步，去達成自己嘅心願，大家都要加油! 分享完畢!
|
