|
|
| 今年的候選歌+8月近況 |
自從04年兒禮後, 跟住幾年都無用心留意候選歌 (05,06,07) ,
今年有心留意返, 但都只限八月前放學icu推出的歌,
因為自從奧運開始後, 我個心就放左大半o係奧運, 得閒就盡量睇比賽, 話晒四年一度,
兼且特別著緊香港隊同中國隊的比賽.
仲有, 我亦對黎緊立法會選舉都好留意, 不斷追新聞.
當然, 無線的plug歌方法亦係令我無咁熟d 歌的主因啦, 之前一個星期一首, 幾好丫,
一星期兩首都ok, 慢慢聽, 用心聽.
但後期一星期plug 幾首, 真係消化唔切. 仲要撞正兩項四年一度的盛事, 我實在有心無力.
而家變左早期plug 的歌就熟, 後期的就唔熟, 好怪, 哈哈.
|
| 刊登時間︰2008-08-22 04:25 PM [ 訪客留言(0) ] [ 編輯日誌 ] [ 分享至FACEBOOK ] |
| 2008 兒禮(一) 改日期 , (二) 候選歌資料 |
今年兒禮, 聽聞由於要讓路給中國奧運選手來港的有關節目, 改為星期六 30/8 錄影, 星期日 31/8 播出.
記憶中, 呢次係兒禮首次錄播, 兒禮以前年年都係直播.
若果網友想睇兒禮時保持神秘同緊張感, 星期日就唔好睇報紙娛樂版住喇.
今年18號先至plug晒D候選歌, 希望出年會早d 啦.
我睇now.com時, 好多時連新歌第一次播都播唔晒成首, 我估電視播都差唔多, 真無奈.
有時now.com仲cut 埋首新歌, 如微微笑同奧運精神添, 想喊~~
好在今年最特別係tvb.com 的兒歌點唱機比ICU更早出晒31首新歌,
http://event.tvb.com/kids2008/song/index.html
仲要係16:9 兼完整版, 若果唔係我無都機會欣賞晒全部歌同MTV.
我亦都更新左今年的資料:
http://www.freewebtown.com/election/08/08.html
(2010 年補充 - 新網址:
http://users1.jabry.com/election/08/08.html )
資料來源除左mtv, tvb周刊同tvb.com外, 亦有一d 兒歌歌手, 熊熊, 李紫昕, 陳美鳳的個人網站,
仲有去維基同埋youtube查埋動畫主題曲的日本原曲作曲者,
無線的mtv慣左唔寫, 唔知點解我今年咁有心機查返.
仲有多謝各方好友提供資料, 或者連結等.
|
| 刊登時間︰2008-08-22 03:56 PM [ 訪客留言(0) ] [ 編輯日誌 ] [ 分享至FACEBOOK ] |
| 08 兒禮 - 候選名單 |
一共有三十一首候選歌, 出乎意料的多!
http://www.freewebtown.com/election/08/08.html
最初仲估得得廿一二首, 而家plug左一半都無,
或者遲d 要一日一新歌都唔定.
未Plug的就未有詳細資料, 搵到的再加,歡迎網友補充或指正.
|
| 刊登時間︰2008-07-26 09:49 PM [ 訪客留言(0) ] [ 編輯日誌 ] [ 分享至FACEBOOK ] |
| 08 書展 - 兒歌專輯 + 兒童節目 |
昨日去了書展, 非常多人, 很辛苦.
我在書展中找到自己有興趣的兒歌或兒童節目產品越來越少了.
連小人國同環星都只有教材同翻唱兒歌.
循例講下見到的相關產品
Hall 1
C22 音樂2000 : 志安哥哥的新舊兒歌作品,部份為宗教兒歌,
http://www.ze-on.net
第一代的兒歌谷谷友應該會記得佢卦?
L24 26 雅樂坊: 港台第一代小時候dvd,
一套5隻39集(唔係齊晒44集) $275
http://www.rthk.org.hk/classicschannel/70s_tv_0004_13.htm
Hall 2 - 無
Grand hall
D16 18 現代音像: 2007兒禮dvd (老孩子推介!!)
$68 八折 = $54.4 (抵買!)
E19 洲立影視 :
港台第一代小時候dvd, 一套5隻39集(唔係齊晒44集) $260 (平過Hall 1)
99年小時候vcd, 每隻$10
99年小時候dvd, 一套$115
Hall 5
A20 22 B 19 21: 熊熊
新出品: 《水果愛美麗》+《快樂樹》雙CD兒童音樂劇原聲大碟 ->即係黎緊8月演出的音樂劇
當然仲有量新舊兒歌產啦,
另外, 唔見派熊熊雙月刊, 係咪唔再出呢?
忘了攤位位置: 陳以誠 的新舊 醫生叔叔 兒歌產品 |
| 刊登時間︰2008-07-25 01:15 AM [ 訪客留言(0) ] [ 編輯日誌 ] [ 分享至FACEBOOK ] |
| 08 兒歌 選評 |
先講下今年其中三首我鐘意的兒歌:
1."幪面超人響鬼"
首歌好聽之餘, 我特別鐘意歌詞的安排,第二段"奏樂傳似是迴響....大戰急召現身" 好特別,
當中一兩句係用返第一節, 跟住一兩句又係新的, 非常考記性, 難怪關楚耀唱Live錯晒, 哈哈:
http://hk.youtube.com/watch?v=gPGu-WyLV-E
同o個d ABABC, ACBC 等的編曲相比, 呢首好有新鮮感.
2."彩雲國物語"
非常好聽, 尤其鐘意配樂中的二胡聲,
但歌詞中太多"看"字, 除非同動畫內容好有關, 若果唔係用吓其他字代替無咁悶.
3. "童話之夢"
好輕快, 雖然唔多留意歌詞講乜, 但聽完好開心,
mtv 亦拍得熱鬧, 小公主變大, 再二合一o個度幾型,
唔知係咪同動畫內容有關,若係就更加抵讚,
係差在有我最怕的搖彷鏡頭.
但始終細味或認真評價一首動畫歌, 都係睇過動畫先得,
但07-08都無乜追動晝, 包括以上三套都無睇.
唯一追的,係死亡筆記, 其實上年"忍者變法"都可以做候選歌,
咁今年plug埋死亡筆記都得啦, 哈哈! 我都好鐘意麥浚龍唱的呢首歌, 可惜仲未搵到完整版.
講開爭議的歌曲, 今年裕美首"戀愛是嗎"亦令我嚇一跳,比得上上年的"忍者變法".
首歌我都覺得好聽,但估唔到一首以"戀愛"為主題的動畫主題曲都可以成為兒禮候選歌.
印象中上一首以"愛情"為題的中文動畫主題曲, 係差唔多廿年前的"相聚一刻",
但當年"相聚一刻"都無做兒禮候選歌, 但都好多時俾tvb 當兒歌處理.
另外,"象棋王"都有國語的主題曲同插曲, 若果做埋候選歌就正,夠晒突破!!
http://hk.knowledge.yahoo.com/question/question?qid=7008071500685 |
| 刊登時間︰2008-07-20 10:42 PM [ 訪客留言(0) ] [ 編輯日誌 ] [ 分享至FACEBOOK ] |
| 08 兒歌 - 暫時情況 |
由於識左位留意新兒歌的網友, 俾佢帶動下, 今年有Keep住留意新兒歌.
今年的兒歌好遲先正式Plug, 成4月中先開始, 好似d 兒歌mtv 係為左兒禮先拍咁.
暫時得十四五首歌, 而仲有一個星期左右 (28/7)就開始兒禮投票,
睇黎今年又趕唔切在投票期前plug 晒d 歌, 真係唔公平.
而家仲要擔心候選歌太少, 希望最少有廿首,
若果唔係有獎的多過無獎, 變左好似大家選(踢走)d唔鐘意的兒歌,感覺唔好.
雖然只得十四五首歌,但係裕美同馮曦妤各有兩首歌,
一d 常見的歌手仲未出現,例如李紫昕,薜家燕,唐韋琪,陳以誠.
而李紫昕的網站已經有新一首兒歌<天空與夢想>的歌詞同埋試聽, 睇黎應該都會plug做候選歌:
http://www.purplelee.com.hk/
而以上講到十四五首,其實未包括一d 新動畫/兒童節目的主題曲,
例如火影忍者新一首主題曲,新宇宙飛龍, 同大受歡迎的"彩雲國物語"等 |
| 刊登時間︰2008-07-20 10:16 PM [ 訪客留言(0) ] [ 編輯日誌 ] [ 分享至FACEBOOK ] |
| 08 TVB 兒童節及兒禮 簡介 |
TVB 兒童節開始左都差唔多成個月, 其實我最關心的都係兒禮,有關今年兒歌會另開文講.
http://event.tvb.com/kids2008/ambassador/index.html
今年tvb網暫時無兒歌點唱機,希望遲d 會加返.
tvb 兒童節的主題 "開心Ja Jumbo" 好似d節目名咁中英夾雜,我唔鐘意.
我寧願中英對照"開心尋珍寶" 加 "Happy Ja Jumbo"
其他節目方面, 好開心有小丸子真人版睇, 逢星期日上午十一時至十二時.
必看!!
另外, 鐘意捉棋的我, 都錄左頭幾集"象棋王"黎睇, 但真係覺得唔掂,
鬼咁多重播的回憶片段, 雖然好在睇帶有得飛,但都煩,
另外d 棋局又亂黎,而且有乜理由隻將軍俾人食左, 先至突然知自己輸, 太奇怪.
仲有每行一步後, d 棋成日都講兩句押韻野, 好煩.
我睇完五集已經無再追, 雖然無預計可以好似棋魂咁正,但都唔係差到咁卦? |
| 刊登時間︰2008-07-20 09:51 PM [ 訪客留言(0) ] [ 編輯日誌 ] [ 分享至FACEBOOK ] |
| 港台兒童劇 |
最近睇到一個網誌的博客話要搵港台的兒童劇資料.
http://hejnom.blogspot.com/2008/07/7-11fri.html
我都有留意同搜集呢方面資料,尤其係d 主題曲, 咁我就唐突咁去主動幫下人,
其實佢o係blog 度提過我個網站, 但我地就未曾有任何直接對話.
下面係我整理左之後張貼的資料, 或者其他網友都有興趣:
參考資料:
當然有youtube,圖書館網站,
港台經典頻道:http://www.rthk.org.hk/classicschannel/main_tv_drama.htm
港台節目資料庫:http://www.rthk.org.hk/channel/tv/tvarchivecatalog/
其實去圖書館同港台都可以睇返好多港台節目.
特別推介:
經典情未了. 相識在童年
2003
在本集節目中，主持張堅庭和林超榮將與觀眾回顧多部港台精彩的兒童劇片段，並會走訪多位童星。77年《小時候》的路家敏、王書麒，90年代的《柏林周記》的柏林仔固然是大家耳熟能詳的經典人物，另外80年代《好時光》、《陽光下的孩子》、《晴天雨天孩子天》的眾多天真活潑小孩，當中又有幾多是你喜愛的角色？而幕後創作精英更會暢談拍攝兒童劇的箇中苦樂。除了兒童劇，港台多年來亦製作了一系列有趣的兒童節目，如79年的《快活谷》就破天荒以兒童''做live''，主持現場直播電視節目。本集主持更會走訪曾主持《點蟲蟲》和《小荳芽》系列等兒童節目超過十年的Harry哥哥，又請教應付細路仔的必勝攻略。
(可以去港台, 或者有多媒體工作站的圖書館睇)
下面係我記得/搵到的個別節目, 應該仲有其他:
小時候 (44集)
1977-78
港台的皇牌及經典兒童劇
http://www.rthk.org.hk/classicschannel/70s_tv_0004_13.htm
圖書館有其中43集,唔知無左邊集.
而家亦有一套5隻的dvd賣,但得39集:
http://www.hmv.com.hk/ch/product/dvd.asp?sku=33980
主題曲:小時候
電視版主唱:黃大仙兒童合唱團
另一個流行的版本由路家敏主唱
好時光
81-82
主題曲:好時光
唱:曾路得
陽光下的孩子
84-85
主題曲:陽光下的孩子
唱:麥潔文 亦有份演出,做主角的媽媽
93年陳松齡翻唱呢首兒歌,上兒歌榜同做兒禮候選歌,
可能芒姐聽過呢的係呢個翻唱版.
其實當年陳松齡咁多首兒歌,真係唔明點解無線要安排岈蔑? (雖然當年好流行咁做)
晴天雨天孩子天
86-87
主題曲:晴天雨天孩子天
唱:張學友
親親孩子天
89
鄭柏林出道
主題曲:親親孩子天
唱:林保怡 , 亦有份演出,做主角的爸爸
我們是這樣長大的
90
主題曲:親親小手 (無線有拍兒歌MTV)
唱:鍾鎮濤
柏林週記
90-93
港台兒童劇另一代表作
電視播的主題曲:柏林週記
唱:關正傑,鄭柏林
另一首主題曲:問到尾
未見電視播過,只係O係唱片度搵到,主唱者都係關正傑,鄭柏林
CYC家族
大約93 (不肯定)
梁家仁演三女之單親爸爸,其中一個女係唐寧(江麗娜), 亦有鄭柏林
主題曲:萬個夢兒
唱:周慧敏,鄭柏林
乖乖不得了
96-97
單元劇
小時候
99
舊一輯的王書麒同路家敏O係呢一輯已經長大成人, 劇中王書麒係新一對兄妹的爸爸,
而路家敏就自然係姑姐,最後一集亦有潘志文出場.
另一特點係劇中加播舊版小時候的片段.
主題曲:小時候(99年版)
唱:陳慧琳,熊熊兒童合唱團
天地孩子
03
屬於戲劇創作外判計劃,係單元劇.
主題曲:孩子
唱:黃貫中
小時候
05
77年的復刻版,但故事同人物都係全新,同前兩輯無關連.
主題曲:小時候
主唱:好似係兒童合唱團
小時候 - 小小亞細亞
06
人物同故事源自上一輯05年版. |
| 刊登時間︰2008-07-20 09:26 PM [ 訪客留言(1) ] [ 編輯日誌 ] [ 分享至FACEBOOK ] |
| 08年年中報告 |
轉眼又到七月中, 暑假同埋TVB 兒童節又開始, 我又潛返上黎.
過去半年, 都仲係忙, 似乎退休前都好難唔忙.
老孩子兒歌網的重建全無進展, 只係間中更正吓資料, 改吓別字等.
呢個Blog 亦無寫過.
最勤力的係年頭時喺Yahoo知識度答網友問題, 因為可以重拾當年幫網友搵歌曲歌詞資料, 解答問題等的樂趣, 又有得升級好似打RPG咁, 所以玩得好投入. 可惜好境不常, 自從某冤鬼又開始玩, 又黎阻左晒, 不斷檢舉我. 跟住, Yahoo 知識的管理員就開始亂黎, 真係懷疑佢地係咪佢的盟友. 唔俾提供歌曲檔案都算喇, 但連貼歌詞都話侵犯版權, 或者介紹網友去圖書館借碟黎聽又話唔得, 真係無晒癮, 所以而家已經無再玩.
講開呢個冤鬼又要講: 本來有個論壇我同佢都經常去, 我仲會出下文, 咁自然又成日同佢 "辯論" (即係又塞錢入佢袋啦). 估唔到佢居然做到版主, 唉......唯有祝壇主好運. 而我就無再去o個度出文, 免煩.
呢半年都有去Youtube 尋寶, 或者收到網友傳黎的連結, 多謝晒. |
| 刊登時間︰2008-07-20 12:54 PM [ 訪客留言(0) ] [ 編輯日誌 ] [ 分享至FACEBOOK ] |
« | 12 | 13 | 14 | 15 | 16 | 17 | 18 | 19 | 20 | 21 | »
|
