今日終於覆左診喇,好彩冇乜大外,原來都係之前一樣,等我仲擔心左咁多日,真係比佢嚇死.不過醫生話兩年都冇好轉,所以要係24/1/06做多次詳細驗查,仲要轉返我去婦科到睇,真係唔知仲要睇到幾時呀?

        等左咁多日終於聽日會知結果,希望係一個好消息啦!真係好擔心呀!如果係壞消息都唔知點算好?

       樂樂真係越來越叻,今日梁老師都讚佢叻,話佢識讀晒D字,仲係好快咁讀完添,其實佢咁細個可以認得咁多字真係好叻嫁喇!仲要D字對佢黎講都幾深嫁,有風 ,樹,媽,爸,雲,餅,書,筆,女,男,手,口等等等等......佢真係記得晒嫁,因為我每星期都同佢溫習一次,佢都讀到比我聽嫁!

今日接樂樂放學發生左得意事件,係咁既!之前梁老師同我提過今日會傾參觀屋企既事,例如:路線及我要負責既工作,所以叫我晏D出現,咁我咪比平時遲一個字到囉!我到學校既時間岩岩好,等最後個家長接完放學後我地就開始傾喇.係傾之前其實我已經坐左係樂樂隔離一陣嫁喇,點知!佢根本睇唔到我,我都唔知,我忽然問佢今日有冇收禮物,佢好特然咁:E..........佢個表情好得意,好似好驚喜咁,我話:你好驚呀!乜你唔知我坐左係你隔離咩?傻豬!之後陳老師同梁老師都一齊笑左出黎!你話,都唔知佢係專心定分心既人好!哈哈哈哈

琴日同樂樂去完旅行成個人散晒,今日係屋企訓死左,所以冇特別事做過!不過前兩日都冇拖地真係有D唔習慣,真係好污糟哦!

都唔知幾耐未試過好似今日咁!今日樂樂學校旅行,去左三個地方,首先第一站係鳳德公園,之後寺蓮淨苑,最後係獅子會自然教育中心.第一站鳳德公園特色係似孫悟空既地方,一入正門會見到寫住水簾洞既人造瀑布,行入去除左會見到公園有既滑梯外,仲有一支孫悟空用黎72變既棒棒,都好大支嫁!之後到寺蓮淨苑,嘩....好似D公公婆婆團咁,好悶呀!淨係睇"佛".最後,緊係獅子會自然教育中心,依道好多野睇,一共有五個館,一個漁館,一個農館,一個貝殼館,一個昆蟲館,仲有一個唔知乜館.老實講:頭兩站冇特別,又唔使入場費,不過....講真我又唔會特登去既地方黎既!