今日阿偉真係真真正正咁離開我哋LU~~
今日早上8:30去到殯儀館去送阿偉的最後一程，去到的時候見到阿偉的家人、弟兄姊妹、朋友等雖然內心仍然好傷心，但發覺入面除咗傷心的感覺之外，好似都有一種放心咁的感覺，我唔識點樣去形容，但果種感覺好平安、好安全咁啦~~ 成個儀式都就周生負責，一路去到火葬場，當見到阿偉的棺木由佢家姐送入去的一刻，阿偉真係離開我哋啦~~ 由05/08/07 - 20/08/07 呢段時間真係唔知點過咁，心入面果種傷心，果份痛楚係沒完沒了的，見到周生、周太、亞LEG、亞AG....仲有好多弟兄姊妹心入裏都好難受，但係又唔想其他人擔心而去遮掩自己的傷心處~~ 所有野都發生得好突然，所有野都好似一湧而來咁。
回想第一次祈禱會周太先同我講 "直到主耶穌再來的時候" 呢首歌好適合做安息禮拜的歌，點知真係唔夠兩、三個禮拜，呢首歌真係做咗阿偉安息禮拜的歌。 所有野都好似剛剛發生咁，但原來已經過了咁多天啦.......
阿偉，你睇你有幾多人疼你，你應該好開心啦，返到天家入面，記住得閒就望下我哋，俾我哋係想念你的時候，都要記得你逗我哋笑的畫面呀~~
主呀﹗求你將安慰的靈、喜樂的心放入阿偉的家人、朋友及弟兄姊妹身上，我知呢份傷痛係唔會忘記的，但請你叫佢地傷痛的背後可以找到你俾我哋的睇望。叫我哋看的不是阿偉離去的傷痛，而係阿偉在世時用生命去見證你的恩典﹗阿們。
