今日係同湯米拍拖第十六個月嘅紀念日，原本今日可以開開心心，但係做嘢又令我好唔開心，我覺得我自己冇做錯，但係俾人話嘅點解會係我，我最憎俾人屈，見到湯米我同佢講番成件事，講講吓又忍唔住喊咗出嚟，真係好鬼冇用！

之前原本講咗話我冇時間去買禮物同咭俾湯米，但係我都趁返學前去買咗張咭同食晏時去買咗份禮物俾佢，唔知湯米係咪好驚喜呢？！湯米就送咗個 USB 俾我，佢話俾我用嚟 Save 啲功課，湯米仲送咗啲 CLARINS 嘅 Hand Cream 同 洗面嘢俾我，哈哈！鐘意！

今晚去咗睇死亡筆記 2，好長，好多地方都好牽強，冇第一集咁好睇！

今日又有 Course 喺 Cliftons 度搞，所以朝早要去一去中環做 Preparation，三個 Courses，但係得我一個人，入完班房 A，跟住又要入班房 B，之後又入班房 C，轉到頭都暈，好在都冇咩大問題！順利過關！

返到公司好多嘢做，仲要樣樣都話係 Urgent，做得邊樣呀大佬！！！做到人都癲，但係又好在無驚無險，但係收到一個壞消息，就係星期三朝早要返七點半 Set 房，禮拜六仲要返全日，返公司監考！Shit！！！冇得同 CFB 啲舊同事食晏喇！

今晚可以準時放工返學，真好，今晚要 Present，初初好緊張，口都震晒，但係之後就好咗啲喇，宜家做 Presentation 真係好求其，準備又唔夠，有時真係覺得連自己嗰關都過唔到，如果好似以前讀書有多啲時間同同學去傾，效果一定會好好多！而今晚返學有個好消息，就係有個 Assignment 延遲到一月中先交，好開心呀！！！

睇咗陳慧蘭今日個日記，佢見工好似好大機會喎，祝佢成功啦！唔係佢留言，一時唔記得陳慧琳五月十二號結婚添，咁唔使等到阿 Joe 出年生日先見到佢哋喇！唔知到時去飲會同邊啲人坐呢？永亨啲舊同事又有邊個去呢？？？

今日本來諗住十點半起身做功課，但係又唔願起身，瞓到十二點，起身做咗陣 PowerPoint，跟住湯米打俾我話喺旺角嚟緊，跟住我就即刻洗頭沖涼換衫！我哋之後搭巴士過去電影中心，原本睇兩點半，但係我哋一點八就去到喇，跟住見有時間多去咗義順食嘢，有雞翼通粉加餐肉雙蛋，嘩，好豐富呀！食完就去咗睇“情碎的天空”，幾好睇吖，但係成套戲冇乜對白，兩個男仔由相遇到熱戀，跟住其中一方看上另一人而冷落自己的男朋友，到大家分手，然後被拋棄的一方搵到新的另一半，花心人又想去同人復合，但係個結局唔係好明！套戲足足做咗成兩個幾鐘呀！但係又唔覺架！

之後同湯米去咗銅鑼灣行咗一陣食埋嘢就返屋企做功課喇，但係仲有個同學未 Send 佢個 PowerPoint 俾我，仲未可以 Finalize 個 ptt，真係討厭！

宜家覺得每個星期都過得好快，公司又多咗嘢做，星期一同星期四又要返學，又要做功課，有時想去做尖都冇時間，我諗我星期六日唔可以再瞓咁多，要抽多啲時間出嚟做功課先得喇！

今日係星期六，係我每一個禮拜都最期待的一日，今朝十一點起身，跟住下晝去咗旺角嘉樂 Green Box 同陳慧琳、陳慧蘭、問米婆同埋周大雄唱 K，陳慧蘭最早到，跟住我係第二個到，最遲係陳慧琳，因為先達有人跳樓呀！

我哋好似冇乜點歌咁，個 List 好似未試過點滿過十首歌，周大雄今日好靜，唔知佢係咪做嘢唔開心呢？？？定係唔係咁鐘意唱 K ？？？唱到咁上下，突然電視播生日歌喎，好娘呀，救命呀，我好驚呢啲場面架！跟住佢哋喺度唱生日歌，仲有埋生日蛋糕添，係雪糕蛋糕嚟架，我咁大個人第一次食咋，係一個湯麵嚟架，哈哈，好搞笑，佢哋仲送埋生日禮物俾我，係一件恤衫嚟架，好鐘意呀，唱到六點我就走先喇！

你哋係今年第一班同我慶祝生日的朋友，好多謝你哋呀，識到你哋係我的福氣，今日真係好開心，多謝你哋送俾我的禮物、蛋糕同埋為我花的心思！

陳慧蘭，今日係你的 Last Day，希望你快啲搵到一份好工，我知你得嘅，但係見工嗰陣唔好又喺度大笑喇！要俾人哋一個成熟嘅印象嘛！

今晚睇咗陳慧琳個日記，嘩！成八十版咁多，好犀利呀，但係點解你個 blog load 得咁慢嘅？

就快到問米婆生日喇，又可以同大家一齊食飯，唔知再下次係咪要等出年阿 Joe 生日先再可以見到大家呢？？？

今晚同湯米去街，湯米本來想去睇死亡魔法，但係朗豪坊 UA 得番頭幾行，於是去咗行街，喺百利買咗幾件衫，湯米都買咗一件，嘻嘻，跟住到差唔多十點就去搭船過海，坐船吹住海風好舒服呀，見到湯米今晚好攰，對眼紅晒，一定係返工好攰喇，你要休息多啲呀！

頭先啱啱做好下星期 Presentation 自己嗰 Part 嘅 Powerpoint，但係仲要 group 埋其他組員啲 Powerpoint，點解佢哋仲未 Send 俾我架？

星期五朝早湯米將一個壞消息話俾我聽，就係 Mariah Carey 取消星期六喺香港嘅 Concert，我期待咗兩個月嘅演唱會就咁冇咗，聽到呢個消息之後我成個人 Down 晒，我諗冇人會明白我嘅感受，我真係好鐘意 Mariah Carey，同埋睇佢嘅 Live 係我其中一個夢想嚟架，真係好失望好失望呀！