陳慧琳，你又話 Send 你日記條 Link 俾我？？？
自八月尾開始，公司就請咗個 OA 返嚟，時間耐咗，就發覺佢做嘢嘅態度好有問題： 返工例遲兩個字，其實佢每日係要準時返工負責開晒 Training Rooms 啲 Projectors 同埋 Mic！ 返工發夢！成日喺度遊魂！見到有 Managers 喺佢附近就扮晒做緊嘢，正賤人一個！ 廿八歲人，但係記憶力嚴重衰退，超冇記性，今日教完佢做嘢，但係轉頭又問番我點做，正白痴！ 做嘢勁亂，又唔整齊，成日不問自取我啲 Files！ 呃 OT，明明 OT 到七點，竟然同我講叫我同佢一齊寫做到八點半，未見過啲咁 Cheap 嘅人，我係唔會同你同流合污架！ 成日話冇嘢做，俾嘢佢做又唔想做！ 成日都練精學懶，做咗兩個幾月啲嘢都仲未上手！ 總結，有啲人係永遠都只係做到 OA！
十月十一日，星期三，放咗工去咗時代同 Flora & Shelley 食飯，呢餐飯本來八月尾就應該食架喇，但係因為各人唔得閒，所以一推再推，推到呢日先有機會食，喺時代地下櫃員機攞完錢，行行吓，突然覺得迎面行緊過嚟個女仔好熟口面，原來係 Olivia，我即刻叫佢，好耐冇見過佢喇，佢重俾咗張咭片我，原來佢宜家喺太古坊返工，我哋仲話遲啲再約埋啲舊同學出嚟食飯！ 到七點半，我就去到小南國坐低等 Flora 同埋 Shelley 喇，但係佢哋都遲到，等到我發晒呆，今晚食嘅嘢麻麻啦，好油同好肥，佢哋問我讀書讀成點，又叫我俾啲心機呀，攞個好啲嘅 Honours，知喇知喇，好大壓力呀！
陳慧琳喺我個日記度留言問我（定寸我？！）呢個究竟係日記定係月記？咁我就趁今日放假寫吓日記先！ 工作篇 － 返咗呢份工已經啱啱好四個月喇，由初初好唔慣，好唔鐘意，到宜家習慣咗，同啲同事熟咗，做嘢又上咗手，已經冇咗嗰一種唔想做嘅感覺喇，其實大部份同事都係好好嘅，雖然有時會遇到啲唔開心嘅事，但係開心嘅事總比開心的多，嗰啲仆街同事就當我時運高睇唔到啦，遲啲我嘅工作範圍會有啲轉變，雖然要重新學過一啲嘢，但係總好過成日都只係做一啲 Routine 嘢，又可以識多啲嘢，又可以接觸多啲人！ 讀書篇 － 返咗學兩個禮拜多啲，上咗五堂，全班廿五人，得我一個男仔，乜宜家啲男仔唔鐘意讀 HR 架？！搞到我好似讀女校咁，格格不入，初初真係悶死我，但係宜家同啲同學仔熟咗啲，總算有啲偈傾吓，隔咗四年先再讀番書，真係有啲吃力，每個星期返兩晚，由六點九返到九點九，一晚上足三科，有時上到八點幾真係好似咩都聽唔入腦咁，個腦好實，但係唔聽又會唔明，點都要撐住，記得第一晚放學時真係成個人都散哂，個腦只係想快啲返屋企沖涼瞓覺！雖然宜家只係上咗五堂，但係就已經超多功課要做，又要做 Presentation，尋晚放咗學喺學校同同學傾 Present 啲嘢傾到十點九先走，好在我今日請咗假，如果唔係今日返工又烏吓烏吓！尋日 Miss 話要開始搵書做 Research，搵資料嚟做 assignment，記得上次去買書，湯米同我去過好多間書局搵書而又搵唔到嘅恐怖經歷，唔知今次又會點呢？ 健康篇 － 呢排其實都冇特別去增肥或者係減肥，但係宜家就只係得一百三十幾磅，比最重時輕咗十幾磅，原來我最重時都有一百五十磅架！湯米話唔俾我再瘦落去，但係點解我會輕咗呢，其實我真係冇刻意去減，只係因為宜家有時 Lunch 會帶飯，所以個份量可以控制得啱啱好，唔會好似出街食咁食多咗，同埋返咗學，好似壓力大咗，返學又好趕，又唔想遲到，返學前都只係食個包就算，但係放學又唔會肚餓架喎，就係咁食少咗嘢喇，其實宜家個飲食習慣應該係健康咗架，同埋公司每日都會派生果，所以宜家會比以前食多咗水果！其實我都唔想再繼續輕落去，太瘦就唔好喇！ 拍拖篇 － 啱啱過咗嘅星期六係同湯米拍拖第十五個月嘅紀念日，我哋去咗黃金海岸住咗三日兩夜，間房好靚呀，仲有無敵大海景，夜晚好靚架，住到唔捨得走呀，望住個海真係好舒服，呢幾日就係食吓，瞓吓，落街行吓，睇吓嘢，真係好 Relax 呀，唔知要過幾耐我哋先會有自己嘅屋企呢？？？第二晚臨瞓前好想同湯米傾吓偈，其實冇諗住想講咩架，但係最後都係太眼瞓瞓著咗！ 遊樂篇 － 近排睇咗兩套戲，一套係穿 Prada 的惡魔，另一套係超女-強勢回歸，前者好睇好多，講辦公室政治，靚人靚衫靚景，令人睇完會有同感！後者本來諗住入去笑吓，但係都唔好笑，仲有少少無聊，晒錢！啊！仲有嗰套聯合 93，唔係話唔好睇，只係原來紀錄片唔啱我睇，睇到我頭暈呀！ 上個月去咗睇一套 Drama － Empty，開頭幾好笑，但係後半部好似好沉重咁，好多人生道理，唔好睇！同埋唔係好明佢想講啲咩！ 九月廿八日，夜晚放咗學同湯米去咗尖咀 Hard Rock Café 睇謝安琪同關淑怡嘅 Wild Day Out，可惜因為要等埋我放學先去到，所以去到時已經好多人喇，其實都唔係太睇到，但係氣氛又真係幾好嘅，呢次好似係我咁大個仔第一次企喺度睇 Live！ 上星期有免費飛去睇新城唱好李克勤 Show 歌力音樂會，因為湯米同我去咗搵書，所以我哋遲咗入場，但係原來個音樂會都係啱啱開始，成晚都好悶，李克勤嘅唱功同形象十年如一日，悶爆，唯一驚喜都係張敬軒同王苑芝，王苑芝講嘢真係幾搞笑！ 朋友篇 － 近呢個月約朋友出嚟食飯少咗，對上兩次同朋友出嚟食飯都係因為有朋友生日，上個月 Perman 生日，同 Anita、Tracy、Karen一齊同 Perman 預祝生日，去咗 apm 食上海嘢，唔好食嘅！Tracy 搵到新工喇，佢終於都可以脫離永亨喇，恭喜晒！而另一位舊同事阿 Nick 哥又咁啱差唔多時間搵到一份新工，祝各位前程似錦！ 另一次就係同阿琳、阿 Joe、問米婆打邊爐，同大雄慶祝生日，間嘢係旺角金雞廣場，都未聽過嘅，但係間嘢幾好食喎，今晚周大雄好靜，唔知係咪因為星期日要返工而冇心機呢？問心婆就好似瘦咗，而阿琳升咗職之後個打扮都 Officer 咗，但係件褸好似大得滯，阿 Joe 個打扮好似青春番，咁咪好囉，似番個後生女，外表上都睇唔出原來你生咗個女！ 家庭篇 － 喺屋企嘅時間越嚟越少，呢個星期應該都會好少喺屋企食飯，原來我放得最少時間係喺屋企，從來都唔覺得我係一個孝順仔，同埋我都係唔痴家嗰啲人！
上個禮拜返工好多嘢做，有幾日七點幾走，最夜仲試過八點半先走，但係同以前喺銀行做 Training 做到九點幾十點，八點幾走都唔算好夜架喇，況且 OT 有得補錢，唔錯啦！但係唔知係咪人老咗，覺得連做十二個鐘真係好攰，抑或係啲感冒未清，所以搞到個人成日都好攰呢！？？？ 呢兩個星期返工嘅氣氛好似好咗咁，可能諗通咗一啲嘢，唔會咩都咁上心，其實真係可以嘻嘻哈哈又過一日！公司出年二月十號搞 Annual Ball 喇，啲同事已經問人去唔去，使唔使咁快呀？？？其實去唔去好呢？？？其實去可以當係見識吓大場面，但係去到又唔知會唔會好悶，係咪要同人 Social 架？哈哈！ 新嚟個 OA 做嘢真係唔係太整齊，同埋開始覺得佢成日都好似遊魂咁，又冇記性，又成日講賤嘢！唉！ 月尾開始返學喇，逢星期一同星期四都要返，下星期六仲要去 Orientation 添，心情開始有啲緊張，唔知啲同學會點呢？多唔多功課呢？啲嘢難唔難呢？放工跟住去返學會唔會好趕呢？一諗起就好驚，呢排又成日發惡夢，點樣可以放鬆啲呢？ 尋晚同湯米一齊去睇蔡依林演唱會，期待咗好耐架喇，但係冇想像中咁好睇，啲衫又唔靚，唱得好似冇咁好，但係大部份想聽嘅歌都有唱到，而佢跳舞真係好掂，又唱又跳，其實真係好過好多人架，成晚嘅氣氛都唔錯，可惜坐我附近嘅人都好靜，冇企起身，搞到我又唔好意思起身，可惜！！！
