今日同湯米出街，去咗旺角，尖沙咀，土瓜灣，今日條街好似好多人，但係又少咗啲後生仔女，唔知係咪因為開咗學，少咗啲學生出街呢？總之覺得條街同以前有啲唔同，但係又講唔出有咩唔同，今日其實想去買衫，但係見到咁多人，又好似冇乜心情去睇，可能又因為係食咗啲感冒藥，個人有啲浮浮哋，八點到就返屋企喇！

15/9         蔡依林演唱會
2?/9         梁祖堯舞台劇
28/9         關淑怡 @ Hard Rock Café （弊！唔知使唔使返學添！！！）
28/10       Mariah Carey Live in Hong Kong
28/10       何韻詩演唱會

其實最想睇同最期待係去睇 Mariah 個 Concert，估唔到 Mariah Carey 真係會嚟香港開演唱會，真係開心到想嗌出嚟，但係湯米訂咗何韻詩演唱會嘅飛，仲要係佢好早打電話去訂，仲要係坐好前，仲要係尾場，睇唔到真係好可惜！但係去睇 MC 嘅 Live 真係我夢寐以求嘅事嚟架，如果今次睇唔到，可能以後都冇機會睇到架喇！所以真係好對唔住，白費咗湯米嘅一番心機！

星期三，今日平平淡淡，冇乜特別事發生，放咗工返屋企，食完飯就瞓，瞓到不省人事！好攰，好似想作病咁！

星期四，起身有啲唔舒服，個喉嚨有啲痛，可能係尋日食得太多辣豬肉乾喇，因為尋晚掛住瞓，所以搞到今朝好趕，又要執嘢去做尖，又要搵衫，上晝返工都好哋哋，但係下晝就不停咁流鼻水，個喉嚨又痛，放工唯有去睇醫生，冇得去做尖喇，返到屋企食咗藥，跟住又係一直瞓到第二朝！

星期五，鼻水少咗，但係喉嚨仲有少少痛，今日公司有兩個新女同事嚟，一個叫 KiKi，另一個叫 Phoebe，突然覺得公司多咗好多人咁，好迫！晏晝成班同事去飲茶，又係叫咗好多嘢食呀！食呀食，佢哋問我點解每次講親我時我都會面紅，我點知喎，哈哈，今晚放工做到八點先走得，好攰呀！原本今晚約咗 Shelley 同 Flora 食飯，但係 Flora 唔得閒，所以要改期，真係好喇，我可以返屋企抖吓喇！

尋晚食完飯諗住瞓一陣，又攰又眼瞓，但係一瞓就瞓到十一點幾，跟住醒咗食完藥又瞓過，涼都冇沖，就係咁一直瞓到今日下晝差唔多兩點，本來今日都唔打算出街，但係要落中環買羽毛，係俾下星期 SA1 上堂玩 Team Building 時用嘅，就係咁，出咗街，喺間鋪頭度逗留咗半個鐘，終於搞掂晒！今日下晝打俾阿德，想問佢幾時得閒出嚟食餐飯，但係冇人聽，之後佢打番俾我，咁啱佢又放工喺中環，我又喺中環，所以就同阿德去咗銅鑼灣，陪佢買禮物俾佢個朋友，去咗 Swarovski、agnes b. 睇吓啲手鏈，最後喺 Style House 嘅一間好似叫 True Color 嘅鋪頭買咗條好有懷舊 Feel 嘅手鏈！同阿德都差唔多成年冇見，但係又唔覺得咁耐，跟住喺銅鑼灣行咗一陣就返屋企食飯，但係喺巴士站度咁啱又見到阿單喎，咁就一齊搭車喇，今日真係多“咁啱”喇！

今朝五點幾俾姑姐嘈醒咗，原來係老豆唔舒服，個肚好痛，於是媽咪諗住同佢去急症室，而姑姐就叫醒哥哥陪佢哋去醫院，但係隔咗一陣，老豆又話冇咁痛，又唔去醫院喇，晏晝打返去問媽咪老豆有冇去睇醫生，但係老豆唔肯去照 X 光，只係攞咗啲藥食就算！但係好似話冇咩事，好彩！

今日 Judy 請病假，Office 又好少人，今日主要都係教 Eric 做嘢，講到我口水都乾，睇嚟佢對電腦唔係咁熟！放工去咗蝦麵店食咗啲嘢，跟住就去做 Gym 喇，好似冇以往嘅星期二咁多人喎，幾好，十點幾就走喇！仲跑咗九個字機，努力減肥中！

今日放工唔記得拎電話，哈哈，真係大頭蝦！仲有又唔記得去寄 CEF Application Form，聽日一定要寄喇，記住呀！！！

今日一返到公司就好似倒瀉屎咁，間間 Training Room 都有問題，個個 Course 都有啲唔順利，煩死人呀！今朝問米婆打俾我，話稅局寄咗封嘢去舊公司，問點樣俾番我，我話遲啲搵周大雄食飯先攞 lu！今日有個新 OA 返工，叫 Eric，睇個樣好似好靜咁，有啲同事話佢個樣細過我，有啲就話佢大過我，哈哈，湯米 lunch 打俾我問我放工去唔去睇戲，咁突然嘅？？？就係咁放工去咗食韓燒，好似好漏咁！跟住再去睇毒蛇嚇機，真係好緊張同刺激，但係個故仔又有啲牽強，點解為咗一個小小嘅目擊證人，要咁大陣仗去殺佢呢？架飛機穿咗咁大個窿，咁大氣流，啲人都仲可以支持到唔被吸出機外？？？點解唔識揸飛機嘅人可以令一架急降嘅飛機再次爬升呢？同埋如果講多啲點樣去對付啲毒蛇，應該會更好睇！總好過只係講個醫生點樣去搵血清！

今日瞓到十一點時發咗個惡夢，跟住就醒咗，發夢做唔晒啲 Training Materials，趕唔切下星期俾啲 SA1 嚟上堂，真係好驚，第一次覺得呢份工有壓力！好恐怖！

之後起身去咗觀塘搵湯米，諗住俾個驚喜佢，去到巴士站又走咗班車，次次都係咁，去到觀塘打俾湯米，佢又唔信我過咗嚟，哈哈，之後我哋去咗三家村，好似去咗南丫島咁，但係好熱，又冇乜風喎，但係望住個海真係幾舒服，行咗一陣，買咗啲小食跟住就送番湯米返觀塘，然後我就出去旺角喇！

約咗 Trevor 四點半喺旺角等，但係佢又遲到，行咗一陣，一路行一路傾，到六點三就去常滿百家菜食飯，一百一十八蚊任叫任食，好多嘢食，好飽，講吓返工，讀書，拍拖，咩都講吓，今次見佢覺得佢個頭又好似大咗，肥咗少少，但係好白，仲有唔係好慣見佢係黑色頭髮個樣，原來佢下星期開始會返 Poly 上堂，唔知遲啲我返學會唔會見到佢呢？