由尋晚十二點瞓到今日下晝三點，哈哈，好舒服呀
跟住上吓網，食吓嘢，咁就一日喇
聽日又要返六點，仲要OT 添，慘

好期待周慧敏嘅演唱會，希望快啲到廿五號就好喇
唔知佢今次會唱咩歌呢！哈哈！好緊張呀

上星期同Larry、Janet、Sammi、Gloria 同埋Nicholas 去打邊爐
嘩！Larry 減咗四十幾五十磅
成個人瘦晒，好得人驚呀

繼續讀書？轉工？儲錢？買保險？要慳錢？
呢排成日都係諗緊呢幾樣嘢

自從上次去完機管局見工之後，因為收唔到消息，所以好唔開心，但係估唔到事隔一個月佢哋竟然叫我去 2^nd in，超開心呀，但係當 2^nd in 完之後，成個人都 Down 晒，因為覺得自己 in 得好差，為咗呢次 interview 我準備咗好多，諗好點介紹自己，諗定自己有咩長處短處，諗定有咩問題要問，仲寫埋 Notes，搭地鐵去見工時仲好似以前讀書考試時攞 Notes 出嚟睇，但係自己好緊張，期望好大，換嚟嘅係更大嘅失望，因為上星期尾喺機管局個網頁度見到佢哋又再請呢個 Post，咁即係話今次佢哋覺得冇人適合佢哋啦，嗰一刻真係成個人呆晒！但係都要面對現實，繼續搵工，但係因為我實太想做機管局份工喇，所以宜家對其他工都唔係有太大興趣，成日都覺得冇一份工會好似機管局那份咁令我咁想去做！

要數公司呢排發生嘅大事應該要數到阿 Joe Last Day 同埋新同事返工喇！阿 Joe Last Day 嗰日咁啱就係我去 2^nd in 嗰日，嗰日我扮病請假去見工，所以冇返工，但係夜晚就同阿 Joe、阿琳、問米婆同大雄去咗美麗華 TODAI 食自助餐，都幾多嘢食架，阿 Joe 嚟到拎咗盒糖俾我，我以為係佢送俾我，但係之後講講吓先知原來係阿卿送俾佢架，佢攞出嚟係請我食架，瘀爆！搞笑！但係阿 Joe 亦都送咗個史諾比紙巾盒俾我同埋買咗杯雪糕俾我，但係到今日我都仲未食，因為今晚打日記我先醒起咋，哈哈！新同事叫 Winnie，今個星期開始返工，佢係一個好細粒嘅長頭髮女仔，到今日都未同佢講過一句嘢！

四月十三日，星期四，放復活節假前最後一日返工，心情好輕鬆，哈哈哈哈，阿Joe 買咗杯雪糕俾我食，係Wall’s 嚟架，我第一次食Wall’s 咋，多謝！湯米今日放假，佢嚟等我放工，一齊去佢家姐度，因為佢家姐去咗旅行，其實頭三日假期都係喺湯米家姐屋企度瞓，三日都係食同瞓，肚餓就食嘢，食飽就睇電視，又或者睇DVD，睇到攰又瞓，試過一日入面睇咗梁祝舞台劇同埋天使可人兒，仲有少少麻婆島同埋情來算盡愛，因為隻老翻跳線，所以睇唔晒！哈哈！實在太輕鬆自在喇，無憂無慮，尋日就去咗睇黑夜，OK 好睇吖，今日就去咗做尖，放完假喇，聽日又返番工喇，哈哈，努力努力！ 

林一峰下個禮拜喺 Art Centre 開音樂會呀，但係夜晚啲場數爆晒喇，我又唔想睇日場，好冇氣氛咁，所以唔睇 LU！

今日加咗一百蚊人工，一年少過一年，個 0199 俾信人都幾冇禮貌架喎，嘢又唔講，就咁丟封信係我枱面，正一怪人！跟住阿 Joy 問我加咗幾多人工，問我有冇十幾個 % 喎，哈，十幾個 % 成千蚊架喇，發夢就有！實際得一點三六個 % 咋！最勞氣係話俾佢聽點計個 % 時佢又點都要乘一百喎，講埋個數叫佢用計數機除又以為我唔想講佢知我個人工同埋加咗幾多，叫佢除個數咪係我個人工同埋加咗幾多錢囉！真係激死我呀，跟住同阿 Joe 一人一句，真係冇佢哋咁好氣，有時同佢兩個正常人溝通真係有啲因難！

仲搞笑嘅係阿 Joe 食晏前send 咗個 msg 叫我唔好問問米婆加幾多人工，因為問米婆冇得加，食完晏佢問我做咩唔覆番佢喎，哈，唔知佢諗住我會打番個乜嘢 msg 俾佢呢！仲有呀，我以前係做 HR 嘅 Training，而 Perman 先係做出糧，計假嗰啲嘢呀呀呀呀呀！！！我唔識答你啲問題一啲都唔出奇呀！

放咗工去做 Gym，又跑咗機，好嘢！仲有一日就放假喇，期待休息！

唔知點解今日心情勁好，好耐都冇試過有一種好似咩都唔使煩嘅感覺喇，覺得今日多嘢講咗，又笑多咗，哈哈哈哈！！！

今朝五點半起身，跟住媽咪又起咗身喎，見佢衝出房話死喇唔知醒添，跟住俾佢霸住個廁所沖涼，唉．．．好在返到公司都只係六點五十九分，冇遲到，今日出門口時仲撞到好耐冇見嘅嗰位學生哥，好耐冇見過佢喇，佢好似又大個咗咁，同埋依然係好俊．．．笑！我哋都有同對方講早晨，哈哈哈哈！！！好嘢！

今日睇票竟然唔眼瞓喎，好嘢，食晏同 Perman 去咗一間未去過嘅鋪頭食喇沙！一般啦，又唔係話太好食，又未至於難食！今日仲找埋 Manhattan 啲卡數，唔使煩 lu！但係下個月就真係要睇住份糧使錢喇，冇多餘錢再亂 fing 喇！

呢幾日都好熱呀，但係我鐘意呀，我想夏天快啲嚟，但係好似話過幾日又涼番啲，啲天氣真係得意！

今日阿 Joe 朝早有啲事遲啲返，但係有人話遲返要早一個鐘頭打返公司，如果唔係就當遲到，吓，原來要咁架？？？唔係有緊要事都唔遲返啦，點預先一個鐘打返嚟公司呀！！！阿 Joe 問我知唔知有呢個規矩，我唔知呀，我有時返工都會請幾個鐘出去，但真係未試過朝早請三個鐘話遲返喎，哈哈哈哈！

今日問米婆同我講話食飯時鄭小姐問佢知唔知阿 Joe 幾時走，問米婆話連 Albert 都唔知，你唔係想問我知唔知呀，哈哈！但係今次竟然連平時十吓十吓嘅 Perman 都知阿 Joe 辭職？哈哈，真係無嘢係秘密！

近期好鐘意張敬軒 Hurt So Bad 呢隻歌，但原來竟然係擁抱每一刻花火嘅電影歌嚟架，咦！