今日係大年初三赤口，嘩！瞓到下晝點幾，終於比前兩日瞓番多啲喇，尋晚唔知點解肚痛，仲要痾咗三次，不過當係清腸胃啦！！！哈哈！今日下晝同湯米去咗大口環行咗一陣，都幾熱吓，又冇乜風，但係四周圍好靜，只有海浪聲，都幾舒服架．．．之後搭返車出嚟，走嘅時候又唔記得攞番個銀包同電話，搞到湯米又要喺巴士站跑上嚟攞番俾我，其實又使乜跑上嚟喎，傻瓜！

今日湯米個喉嚨好痛，但係叫佢去睇醫生又唔肯去，話新正頭唔去睇醫生，叫極都唔肯去，見佢咁樣我又做唔到啲咩令佢舒服啲，唉！！！

今日係大年初二，十一點幾俾人叫咗起身食開年飯，跟住又瞓唔番喇，又冇乜嘢做，跟住又有親戚上嚟屋企，好嘈呀！差唔多四點就換衫出去，嘩，好犀利呀，由屋企行去信德，再去 IFC，去咗 KFC 食嘢，竟然見到 Mandy 喎，佢話同個舊同學啱啱行完山，哈哈，好健康喎，之後行吓行吓行到去金鐘，之後遊巴士河，去到勵德村之後又行番落去銅鑼灣，勁，今日真係行咗好多路呀！之後去咗銅鑼灣避風塘睇煙花，第一次同湯米睇煙花，感覺好遠，冇咗嗰種煙花喺頭頂跌落嚟嘅感覺，又聞唔到煙花味，又好大煙，好似冇以前睇過嘅咁好睇，跟住去咗麻布茶坊食雪糕，又係好似冇以前咁好食，食完嘢好似間間鋪頭都落晒閘休息喇，咁就返屋企 lu！

今晚突然好想再 apply 過 Cathy 嘅 FA，但係仲心大心細，仍然有想做 FA 嘅衝動，但係有好多嘢要考慮呢！仲有今晚由勵德村行返落銅鑼灣嘅時候，有一種好想有一間自己嘅屋嘅感覺呀，係好想好想嗰種呀！

計吓計吓，原來有成大半個月冇寫日記喇，實在太懶喇，寫番呢半個月發生咗啲咩事先！大約兩個星期前搵過Sunny 出嚟食飯，知道佢宜家有一個新男朋友，叫Kenneth，原來佢哋已經拍咗個幾月拖喇，當我知道佢搵到個新男朋友時，一方面替佢開心，另一方面又好好奇同八卦問咗好多佢哋嘅嘢！呢次出嚟食飯我先送番份聖誕禮物俾佢，係就係遲咗啲，但係希望啱佢用啦！

有個星期六同Mimi 預祝生日，嗰日下晝放咗工先去旺角買禮物，行咗好耐先揀到兩份禮物，呢兩份禮物係湯米同我夾份送俾Mimi 架，哈哈，夜晚去咗亞士厘道有間叫33 嘅嘢食西餐，環境食物服務同價錢都好．．．．．．唔多好，第二次同湯米見我啲朋友，今次介紹埋Carmen 同Emily 俾佢識，今餐飯湯米好似好悶咁，之後我哋走先冇Join 佢哋去飲嘢喇，之後去咗行Sogo，第一次行尖咀間Sogo，都幾好行吖！

上個禮拜同以前浙一人事部啲舊同事打邊爐，食完呢餐飯之後我覺得好Down，因為今次食飯個氣氛令我好唔舒服，其實好多同事已經去到唔同嘅公司做嘢，大家嘅話題亦好似變得少咗咁，佢哋講嘅話題我又唔多熟同清楚，我一路都只係喺度聽佢哋喺度講而冇插咀，但當我唔出聲嘅時候，就總會有人問我做咩唔講嘢，點解咁靜，尤其係我舊老細話我由佢嚟到咁耐我都未出過聲，要我講吓呢排我點，我真係唔知講咩好，我真係好想講佢咁樣令到我好尷尬，我唔開心唔係因為佢哋話我唔出聲，而係我覺得個問題係我唔識得點樣去同人Social！

至於返工方面，又係咁啦，因為臨近新年，上個禮拜比較多票，因為睇票睇得慢，所以俾人叫咗入房問點解睇得咁慢，哈哈，唔知咁樣算唔算俾人照肺呢？

今個新年冇買新衫同新褲過年呀，只係買咗對新鞋，媽咪話要買對新鞋‘採’小人喎！湯米竟然買咗兩對Converse，有對仲係同我一模一樣嘅白色皮Converse，抄我！哈！

之前部電腦中咗毒，湯米有日上嚟幫我Format 咗部電腦，宜家仲未裝番ICQ 同MSN 添！今日年初一就去咗睇春田花花同學會，有幾Parts 都幾好笑，笑到我標眼水，但係後半Part 就有啲悶場！呢幾日我都好似癲痲哋咁，有時一笑就笑到停唔到，有時又好似精神分裂咁對住湯米，哈哈，有時我真係好怕兩個人靜晒冇嘢講嗰種氣氛！

06 年過咗一個月喇，呢個月總括嚟講都過得開心嘅，雖然仍然係未轉到工，但係宜家已經用咗另一個態度嚟對呢份工喇，緃使每日都會見到唔想見嘅人，每日又要好早起身返工，但係宜家遇到啲唔開心嘅事就唔會太放上心喇，同同事呻完就算Lu！

今年喺工作上真係想有一啲新轉變，有時覺得自己真係好似一部電腦咁需要去Format 一下，洗走晒入面一啲唔好嘅嘢，跟住咩都重新嚟過，咩都Restart 過，你話幾好呢？！其實宜家我有好多嘢都想做，我想買份真真正正嘅保險，我想實實際際咁去儲錢，仲有好多好多嘢！希望每日都可以精神奕奕咁去做我想做嘅事，好好好想搵到一份工去滿足到我去做我要做嘅事！希望我做得到啦！

今日個杭渠佬又同偉哥講話都唔明點解我哋睇票睇得咁慢，而佢自己又可以睇得咁快，唉，真係越嚟越囂張！擺明俾說話我聽姐！

Perman 今日冇返工呀，佢下午打過俾我，佢話佢今朝起身睇唔到嘢，醫生話係急性青光眼，好嚴重！佢要請假到星期六，希望佢冇事啦！

Perman 請病假，呢幾日食晏又要一個人喇，最慘就係下午做退票要拍住個杭渠佬，好難頂呀！Perman 你要快啲好番返嚟呀！！！

今日諗住去做 Gym，點知唔記得執件 Tee 落個袋度喎，唯有 lunch 去買咗件幾十蚊嘅 Tee 頂住先啦！去到做尖，好多人呀，咩事呀？今日跑馬唔係應該少啲人架咩？

今個禮拜六原本要返六點，但係偉哥改咗下星期先放 Sat，所以宜家返番七點喇，同埋因為 Perman 返唔到嚟，所以要留喺度 OT 喇！唉！

上星期五喺公司問米婆話我知 0199 會被調落去總行，而總行又會有個人調番上嚟，如果係真我咪就嚟換老細囉，聽問米婆話有咁嘅安排係因為總行有個人做錯嘢，所以要調佢上嚟，其實宜家都仲未知係咪真，都唔知呢個係好消息定係壞消息！

星期五夜晚約咗 Raymond 食飯，上次約佢食飯已經唔記得咗係幾時喇！只係有次去 ZARA 見到佢！本來諗住放工打俾佢睇吓佢喺邊，諗住去買啲嘢，但係佢喺西頁剪緊髮，咁我就唯有食完 Tea 就返屋企喇，沖咗涼跟住出去旺角 Join 佢，點知去到佐敦時塞車喎，搞到七點幾先出到去！之後去咗女人街食泰國嘢，服務同食物都幾好吖，係個泰式乜乜醉河好鬼死辣！食完之後去行咗一陣跟住食埋糖水就走 lu！

星期六朝早得八度，好在放 Sat 咋，瞓到十一點幾就起咗身，跟住同湯米食晏，湯咪話想食麵，哈，點知唔覺唔覺行咗去石塘咀食越南湯河，跟住就搭巴士去太古做尖喇，哈哈，上個星期好好嘢呀，Keep 到隔日去做 Gym 喎！之後喺太古行咗一陣，去咗吉之島食嘢，湯米送咗個電鬚刀俾我做識咗半年嘅禮物，多謝！食完飯去咗電影中心睇戲，原來我已經睇過呢套戲架喇，但係我幾時睇同喺邊度睇過都唔記得，搞笑！

星期日同湯米去咗尖咀，湯米諗住買過對新 Converse，但係行咗好多間鋪都冇佢 Size，整日都冇收穫！呢日食咗好多嘢呀，食咗個通粉，一碗芝麻糊，魚旦，龍蝦丸，燒賣，雞蛋仔，又食晚飯，跟住再去食多碗綠豆沙先返屋企，好飽呀！

尋日放工又係去咗做尖，都幾多人，返屋企時發生咗啲好驚嚇嘅事，好在有驚無險！哈哈

今日返工，Albert 同我哋早班嘅同事講咗啲嘢，話因為上個禮拜六我哋早班有四個人放假，嗰日又多票，搞到好遲先睇完啲票，話以後唔可以咁多人一齊放，哈，之後阿好話我知個杭渠佬同偉哥細細聲講咗一句，佢話：「梗係啦，平日一秒睇一張票個人都冇返！」嘩！估唔到佢竟然狂妄自大到咁，好唔識尊重人囉！佢好似覺得呢個部門冇咗佢唔得咁，慳啲啦佢，咁叻不如俾個杭渠佬睇晒啲票啦，又或者叫佢唔好放假啦！笨！

今晚原本同問米婆、大雄同阿琳去食晚飯，但係阿琳唔舒服，所以最後都係取消咗，每次食飯都有人病，真係好邪，唔通真係俾人落咗咒！？

終於都收到孫燕姿啲演唱會飛喇，都俾埋阿琳喇，唔使再心掛掛 Lu！

今日老細話如果有花紅的話，今個月出糧就會有架喇，希望有啦，好緊張呀！同埋拎咗花紅如果辭職都唔使俾番一半出嚟，好嘢！Yeah！！！！！