放假喇！
星期三係放假前最後一日返工，返工出門口時竟然俾我係街口度見到我好耐冇見嘅中學師兄，見到佢拖住個行李箱，好似去旅行咁，唔通佢呢排又放假，又會咁啱嘅，記得以前喺灣仔返工，每日都會同佢搭同一班巴士，感覺好得意架！哈哈！
呢日返工都冇乜特別事發生，可以好平平淡淡咁迎接我嘅大假，臨放工時陳慧蘭問我幾多嘅八成係等如一千五百，嘩，差啲俾佢考起呀，計呢啲數我一定要用紙同筆計架，搞到俾陳慧蘭笑我，哈哈，原來佢同陳慧琳計緊加人工啲嘢！
放咗工就一個人去做尖喇，正式放假喇，做尖都幾多人，但係跑完機出完一身汗，個人好舒服，好滿足咁，今日上磅一百四十六磅呀，比之前輕咗三磅，好嘢，但係夜晚返到屋企時又流鼻水喎，唔係放假先嚟病呀！！！食咗粒藥十點幾就瞓喇！
尋日唔使返工，瞓到一點幾先起身，仲有少少唔舒服，又食咗粒藥，之後湯米嚟整電腦，哈哈，終於送咗份禮物俾湯米喇，希望佢鐘意啦，可能食咗藥，個人吽吽哋咁，腳又軟，但係藥力過咗就冇嘢，仲好番好多添喇！
尋晚去咗睇關淑怡演唱會，因為要搵 Timothy 換飛，所以六點幾就去到紅館喇，意外收穫係竟然見到關淑怡出嚟拜神，仲見到李進，張耀榮，俞琤添，換完飛之後就去都會商場食飯，去咗間好難食嘅餐廳食，個海南雞飯難食到．．．嘔，喺間餐廳度見到鄭子誠同劉倩怡，兩個都好平民化，食完飯等咗一陣就入場喇，今次坐喺台上面嘅其中一個三角形位度，坐第三行，好近好近呀，等緊開場時個心情好興奮！
開場喇，雖然我唔係 Shirley 嘅 Fans，但係我都好大聲咁嗌，Shirley Shirley Shirley，坐喺附近嘅 Fans 都好 High，搞到我同湯米又好 High，成晚都玩得好開心，全晚 Shirley 換咗好多衫，套套都好靚，又性感，又高貴，啲衫簡直係 Perfect，好襯佢！啲歌嘅 Rundown 係由新到舊，好明顯唱心靈相通隻碟入面啲歌到宜家啲新歌，其他人真係冇乜反應！唱舊歌就好啲喇，全晚 Shirley 表現 OK 啦，有啲唱錯歌詞，演唱會十一點二就完喇，咁早嘅？？？！！！
今晚演唱會比我想像中好睇，仲係第一次見到歌手拜神，第一次拎瑩光棒，第一次坐得咁近，揮瑩光棒原來好攰架！呢晚唯一覺得唔好嘅係個氣氛好似唔係太好，好多人都好斯文同好靜，Shirley 又唔係好搞氣氛，講嘢又唔係太清楚，好細聲，希望嚟緊兩晚個氣氛會好啲啦！同埋我想聽告別戀曲同亂了呀，希望 Encore 時可以唱多啲歌啦！
P.S. 今晚湯米同 Shirley 握到手呀，見佢好似好開心咁，佢話 Shirley 隻手好濕架，哈哈！今晚仲見到關心妍，唐寧仲坐我哋前面，但係冇人搵佢簽名喎！哈哈！仲有呀，唱非愛不可時有林一峰呀，我喺度大嗌一峰一峰，癲咗咁！
Being Shirley On Stage 2006 – Rundown
進化論 (個台條橋升起咗，基本上係見唔到 Shirley)
帶我去跳舞
關於我
非愛不可 (林一峰呀，好得意)
雲上舞 (嘩，Shirley 除衫呀，條裙好短，見底架)
夢伴
忘記他
繾綣星光下
假的戀愛
逝去的傳奇
Dela
午夜狂奔
制造迷夢
一切也願意
梵音 (兩個男 Dancers 好 Sexy 架，睇到個個都嘩嘩聲)
戀一世的愛
夜迷宮
愛恨纏綿
仍是那麼深愛你 (悶)
當世界無玫瑰
患難見真情
星空下的戀人
難得有情人 (唱錯歌詞)
冬戀
叛逆漢子
so sad (with草蜢)
人生可有知己
一首獨唱旳歌
地老天荒
|
