星期五放工過咗去旺角見工，因為要四點半去到，所以好趕，in 我嗰個係一個男仔，我諗佢最多大我一兩年，但就可以做到呢個位，因為隔咗好耐都冇見過工喇，所以表現得唔係太好，但個感覺就幾舒服，好似傾閒偈咁！
in 完之後等湯米過嚟，食咗啲嘢，跟住就返屋企喇，返屋企前收到湯米的聖誔禮物，好開心呀，好鐘意！夜晚食完飯傾咗一陣電話，點知傾傾吓好眼瞓，就係咁，就咩都唔理就瞓著咗喇，哈哈！所以第二朝起身返工好趕，又要搵衫，又要執嘢！
星期六係平安夜，天氣暖番好多，因為要OT，所以三點幾先走得，本來唔夠四點就走得係件好事，但係點知行行下先記得拎漏嘢，同埋連鎖匙都冇拎，所以要返轉頭返公司拎番啲嘢，真係大頭蝦！
平安夜晚同湯米、Mandy、Jennifer 同埋Mimi 去食韓國燒烤，我哋講好咗要交換禮物，所以食飯之前就同湯米去銅鑼灣揀禮物喇，而之前就係因為漏咗份禮物喺公司，先至要返轉頭攞番！講番間食韓國燒烤嘅嘢，真係不知所謂呀，Book 咗位都要等，另外又要等齊人先入得，之後竟然要我哋五個人坐張四人枱，我哋話唔坐，結果又要再等，又等咗一陣先有位，入到去係超逼，又小嘢食，又唔係咁好食，食咗唔夠個半鐘又俾人趕，食得好似好受氣咁！以後都唔會嚟呢間嘢食呀！
之後去咗Starbucks 飲嘢，我哋交換咗禮物，又影咗好多相，坐到十二點先走，真係好攰喇！Raymond 今晚打俾我，真係好耐冇搵過佢食飯喇！
25 號聖誕節瞓到兩點幾俾個電話嘈醒咗，之後同湯米食Tea，再去銅鑼灣繼續買公司除夕Party 啲禮物，買多咗兩份，好嘢，跟住去Pacific Place 行咗一陣，食咗麥記，跟住就去睇哈利波特，一般好睇啦，睇到頸又攰，坐到腰又痛，同埋唔知點解有啲位有啲人會睇到笑，而我又覺得冇咩特別咁，睇完戲又好眼瞓喇，跟住就返屋企喇！
今年聖誔收到好幾份禮物，如下：
Sunny 送嘅三對襪；
嫺姐送嘅玻璃生果蠟燭同叮噹相架；
湯米送嘅牛奶仔公仔聖誔版同埋DVD 同埋個喇叭；
交換禮物時抽到Jennifer 送嘅按摩Cushion－
其他就係阿琳送咗個生果杯同埋問米婆送咗個不倒翁公仔．．．多謝你哋呀！！！
記得舊年我 Send 咗好多個短訊俾好多朋友祝佢哋聖誕快樂，但係今年一個都冇 Send，可能心態唔同咗喇，唔想 Send 喇！ |
