好勞氣呀，點解次次都係到我臨寫完日記時，就乜都冇晒架，又要由頭寫過，妖！！！！！

今日返工用問米婆部電腦睇票，但係部電腦超慢，最後忍唔住去阿琳個位用佢部機睇票，但係放工時唔記得話俾 Katherine 知問米婆部機好慢，聽日個 Auditor 又要坐阿琳個位，咁我坐去邊好呢？？？

今日睇錯兩張票，好忟呀，對住啲票真係好眼瞓呀，今日又多 Direct Debit 要過機，搞到要差唔多一點先可以出去食飯，唉！個 1467 唔得閒就叫小燕或者肥根 Print Reports 啦，你唔食飯要練仙，但係我唔使架，我超肚餓，成十二點三先俾 Report 我，玩我咩！下午有九十八張退票，希望星期六唔好咁多退票啦，咁就可以早啲走喇，最後都冇同阿好調 SAT OFF，因為佢話只可以同我調十五號，但係我十五號要返六點，我唔想 OT 呀呀呀呀呀！！！！！都係返番廿二號啦！

今日做退票時 Perman 發我脾氣喎，咩事呀？？？唔通俾個慢世魔王激親？？？Perman 之前問我係咪佢放假我代佢睇 044 啲票，咁我好自然咁話唔係 Jacky 睇番咩？Perman 話人地升咗職，唔知仲會唔會做，真係好笑喇，升咗職唔使做呀，如果係 Password 既問題做唔到我冇野講，又唔見偉哥放假佢返六點，點解仲要我呢個 C3 去做一個 O1 既野呀，O1 應該替番 O1 吖！！！

放工返屋企，但係冇瞓覺，沖完涼又喺度執嘢，執左自己擺衫個櫃，突然覺得自己好整齊，拎咗啲唔要既衫出嚟，下一個目標係執下啲 CD，發覺啲 CD 好亂，梁詠琪隻碟竟然喺林一峰個 CD 盒入面，林一峰隻碟又喺安室個盒入面，安室隻碟又喺 Mariah Carey 個盒入面，咁 Mariah Carey 隻碟喺邊呢？同埋點都有隻 CD 冇盒裝，哈哈，仲有另一個目標就係拎啲唔要既衫去救世軍，希望轉天氣前做到啦！

今日個肚好搞，抽住抽住，好辛苦呀！

近排鐘意咗蔡依琳，覺得佢啲歌好好聽，睇埋佢個演唱會 DVD，覺得佢跳舞好好睇，但係好多女仔朋友都唔係咁鐘意佢，哈哈，如果佢下年真係嚟香港開 Concert 就好喇，我要睇呀！！！

檸檬草的味道

詞:李罩雄
曲:李偲菘
編曲:Terence Teo
製作人:李偲菘
合聲:蕭賀碩/Ariel

他們猜我們後來有沒有再見
離席了才會曉得懷念
突然我記起你的臉
那觸動依然像昨天
對自己我終於也誠實了一點

是不是回憶就是淡淡檸檬草
心酸裡又有芳香的味道
曾以為你是全世界
但那天已經好遙遠
繞一圈 我才發現我有更遠地平線
 
我們都沒錯 只是不適合
我要的 我現在才懂得
快樂是我的 不是你給的
寂寞要自己負責

畢竟用盡了力氣也未必如願
總是要過去以後才了解
突然我記起你的臉
愛不愛不過一念之間
繞一圈 今天的我能和昨天面對面

我們都沒錯 只是不適合
親愛的 我當時不懂得
選擇是我的 不是你給的
明天自己負責

給昨天的我一個擁抱
曾經她不知如何是好
若我們再見我會微笑
謝謝你 謝謝你 我嚐過 愛的好

我們都沒錯 只是不適合
我要的 我現在才懂得
快樂是我的 不是你給的
寂寞要自己負責

我要的我現在才懂得
選擇是我的 不是你給的
幸福要自己負責 錯過的 請你把握

上星期三放左工返屋企換衫再去做 Gym，Tommy 唔舒服冇返工請左病假，佢黎等我做完 Gym 再去食啲野再去坐低傾一陣野，新鴻基中心開左間肯德基喎，原來間滙豐又執左，去左灣仔碼頭坐，傾完之後都好似係冇一個結論，我都唔係好想講野，個腦都諗唔到野，應該係唔知諗啲咩同講啲咩好！

星期四覺得唔係咁舒服，好似又作感冒，Tommy 知道我唔舒服，特登喺灣仔買左杯熱檸樂煲彊俾我，真係好意外同好感動呀，又覺得佢好傻，又晒錢搭的士同埋佢又未食晏，之後食左啲幸福傷風素就好好多喇，放工返屋企訓一陣先再出去同舊同學同埋以前一齊做義工既朋友食飯，但係訓著左一兩個字既時候又俾個電話整醒左，又係你呀．．．陳偉文，同佢傾左一陣，知佢同男朋友分左手，第一個反應係唔知應該俾咩反應，之後我都冇問點解喇，聽你把聲應該冇事卦！之後去銅鑼灣食飯，知道有個朋友失左蹤，我地打佢個手提又飛左去留言，留言又唔覆，打去屋企唔係話未返就係瞓左，好驚，個個都好擔心佢有事，希望佢冇咩特別事啦！

星期五係便服日，睇完票，個伍敏儀同我講話有張票唔知應唔應該拍 Reject，張票個大碼係寫"Six Hundred and Thirteen Cents Only"，個細碼係 613 元，好似白痴都知唔得啦，但係我竟然去問阿琳使唔使 Fax 俾分行，阿琳話要，跟住我就要幫個伍小姐執埋啲手尾佢，之前佢有票睇漏話自己好忙要過機，叫我幫佢通知分行，我都算喇，今次仲好似點我做野咁，頂你呀！同埋佢話溫紹元同陳月好放假佢有好多野做，哈，呢個伍小姐工作效率咁"高"，又唔怪得佢話好忙既！聽問米婆講 Katherine 話阿金屯唔去 File 印鑑咭，今次我幫阿金屯喇，佢應該去話下個伍敏儀啦，溫紹元同阿好返工時，佢地就一齊入房 File 咭，係度傾偈，到溫紹元同阿好放假，佢就出嚟幫手做退票，平時不嬲都唔使你幫架啦，扮晒野，抄又抄錯晒，Fax 又 Fax 得慢，睇見就火滾！返厔企瞓啦！仲有個遊魂基，Katherine 出左去佢就自動失蹤，都唔知佢係咪又入咗房瞓覺！

放工本來諗住去做 Gym，但係 Tommy 話唔舒服，咁我就迫佢去睇醫生喇，跟住送埋佢返屋企，我覺得我又做番一個男朋友應該做既野喇，但係人地唔欣賞，又話我唔開心，又黑面，算！返屋企時又塞車，唉！

尋日係國慶，好野，瞓左十幾個鐘之後去做 Gym，本來叫左 Tommy 係屋企休息，但係佢黎左同我去做 Gym，之後去食 Pizza，之後佢話有野傾，佢覺得我呢幾日都唔開心，個樣跟本就係有野，我地又嘈，初初佢好平心靜氣咁去講，係我沉唔住氣，又鬧交，我話之前鬧完交，點可以要我好似即刻冇野咁去又講又笑，老實講，我呢幾日都冇發過脾氣，我對你都算關心吧！你仲想我點呀，我好想喊，但係我忍住冇喊，我唔想喊，唔知再點去形容當時既心情，好複雜，我唔知點去對住你，唔知用咩方式去同你相處，話我憎你咩，有時又嬲唔落，驚你咩，我係有少少驚你，不過最唔開心既係你嬲一個人時可以將一個人諗得咁負面，今日你同我講你好掛住我，但係聽日你覺得我有少少異樣你就覺得我有問題，我會好大壓力架！好想問你既然你同我一齊咁辛苦，咁唔開心，咁煩，做咩仲要同我一齊呀！？

尋日成日個電話都冇響，只有一個短訊，係 Sunny 祝我國慶快樂，但係佢打錯字，打左個興字，哈哈哈！

今日係屋企，執野啦，執左好多野，成日都係度聽歌，聽日又要返工喇，好厭呀！

今日冇心機做野，食晏時又落大雨，今日又同 Tommy 鬧交，兩個半月內第五次鬧交喇，好忟、好嬲、好驚、好失望、好唔開心，一次比一次傷得深，一次比一次更難受，大家都受傷害，大家都唔好受，點解要咁，好大壓力，好攰，知你宜家有好多野煩，我唔想再令你煩上加煩！

零五年仲有三個月先過，但已經可以總結今年對於我黎講係唔開心既！好攰，訓喇！

記得幾年前開始寫日記，但係並唔係寫 Online Diary，係真係寫係一本日記簿上面那種，寫既原因係有一日突然間有個諗法，就係好驚有一日訓醒會咩都唔記得晒，失左憶，又或者老左患左老人痴呆症既話，咁就可以拎番本日記出黎，起碼知道自己係邊個，同埋有番 D 回憶，但係有個朋友話，當失左憶或者患左老人痴呆症既時候，可能連字都唔識睇，咁又點睇番 D 日記呢？其實宜家已經冇寫呢種日記喇，因為實在太懶喇，同埋宜家寫網上日記！

點解又會寫網上日記呢？？？其實係因為想同朋友分享我既一 D 諗法、感覺，有時有 D 說話想講，但係又唔知同邊個講又或者唔知點開口，咁就可以上網寫晒自己想講既野出黎，有時朋友又可以睇我個日記而知道我既近況，幾好呢！有時有 D 野擺左係心入面好耐，寫左出黎成個人都會舒服晒架！

其實寫日記既意義係應該正面既，係俾自己一個地方去講自己想講既野，去俾自己抒發自己既感覺，但係如果日記會為自己帶黎麻煩同煩惱，咁就失去左原有既意思，咁不如唔好寫喇！

上個星期剪左髮，今次剪得都幾短，自己覺得好睇過上次，同埋又易打理，朝早返工唔駛搞好耐就出得門口喇！但係好多朋友都話太短喇，唔係咁好睇，哈哈！

終於打晒三支預防肝炎混合針，下星期五就要抽血驗抗體，但係醫生話有幾個 % 既人打左都唔會產生抗體架喎，咁即係晒錢又晒時間，好驚喎！！！

中秋節好舒服，好 Relax，放假真係好，咩都唔使諗，好輕鬆，好鍾意呢種感覺呀，星期一仲去左曬太陽，好似曬得過左火咁，D 皮膚好痕，死火！

星期二夜晚去食自助餐，因為同大雄預祝生日，好貴呢！其實自己唔大食，食自助餐好似好唔抵咁，食幾碟已經唔想食 lu！

星期四去 IT 見工，等左好耐，in 左一陣，好攰，其實有少少覺得晒時間，好唔開心，突然間諗，一路做一路搵工，真係好攰，每次都希望可以有一份工可以見得成，但係每一次都只有失望，其實宜家個巿又好左，點解仲未搵到一份新工呢？唔通我真係唔夠料？！其實都搵左好耐工喇，都見左十幾份，Cathy、JAL、交通、南洋、上商、Prudential、Jusco、learning-plus、長江、同埋一 d 細公司同 Law Firm，究竟我今個冬天係咪仲要捱住凍咁起身返工呢？係咪仲要對住 D 咁假既人呢？係咪仲要做住 D 自己唔鍾意做既野呢？記得以前做 Training 時成日 OT，有時又要九點幾十點先放得工，講辛苦以前辛苦過宜家好多，但係反而做得好開心，一方面做既野係自己鍾意，另一方面係 D 同事真係好好，其實我份人好簡單，只要工作氣氛好，再多野做我都覺得係值得架，就算宜家俾我準時放工又點丫，自己對呢個部門甚至呢間公司連一 D 歸屬感都冇，每日返工都係捱，有時只有諗，宜家有份工都好過失業啦，其實已經好過其他人好多架喇，但係我唔知仲可以阿 Q 到幾時，只有不停咁繼續搵工！

星期五放半日 sick leave 去東華東院覆診，等左成個幾鐘，俾醫生睇左幾分鐘話冇事，唔使再覆診喇！好野！

星期六返六點，又要 OT，差唔多四點先走，好攰，去左旺角，本來諗住買牛仔褲，但係真係攰到冇心機行同睇，去左食越南野，幾好食，但係 D 服務就差左 D！

今日係屋企休息，今日好大雨，落街食過野，行左陣就返屋企，返屋企時見到個傻佬，好驚呀！

前幾日聽 Tommy 講過 Brian 既故事，其實覺得呢個男仔都幾可憐，因為佢屋企既問題，令佢對其他人失去信任，但另一方面又想得到別人既關心同愛護，而佢第一段感情又唔係咁開心，俾個男人咁樣傷害，搞到我有少少同情佢，其實每個人都有自己既故事，好複雜，有時其他人好難明白兩個男人既愛情係點樣，但係男人同男人拍拖都係好普通同埋好簡單，只係因為別人奇異既目光而要去避忌同淹藏！