今日返工出門口時又落雨，討厭呀！今日睇票都幾順利，冇睇錯票，好野，但係唔知點解有D 同事咁鍾意細細聲哼歌，阿鈍係咁，偉哥又係咁，你地知唔知好煩架，都唔知你地哼乜，仲有個溫紹元，成日都吹口哨，都唔知係咩辦公室黎架，仲有D 老野又係公司剪指甲，咳又唔用手遮住，係咪人黎架？！

放工去左做Gym 呀，換緊衫時突然傳黎一陣死老鼠味，搞錯呀，點解D 人隻腳可以咁臭架，頂！！！返到屋企食完飯等緊飲湯時竟然訓著左喎，訓多多都唔夠！！！唉

個頭好柒呀，想剪髮呀，想剪短佢呀，Gel 黎Gel 去都唔好睇！唉．．．．．．  

今日請左一日假，請假並唔係有d 咩特別事做，而係我真係好累，想休息一下，諗住今日可以訓晏d 啦，點知唔知邊個單住晨咁早就鑽牆，嘈住晒，十二點幾又有幾個電話同msg，唉！想訓耐d 都唔得，跟住就去左做Gym，平平淡淡的一天，但係係滿足架！返緊屋企時，一路行一路諗聽日早餐食咩好，心諗又係食麫包，但係都冇辦法啦，咁早麥當當都未開啦！＞＿＜

原來分手已經兩個幾月喇，冇諗到分手後會發生咁多問題，其實我只係想分手後簡簡單單咁過每一日，希望可以多d 時間陪屋企人，多d 時間搵下朋友，我想對我身邊的人好d，但係現實所有野都唔係好似自己諗得咁簡單，好多事都係自己一廂情願，好多意料之外的事發生左，亦做左好多錯事，我明白有d 野做錯左係冇得返轉頭，但我今日同自己講，我唔可以俾自己一路錯落去，我唔想再去諗，再去煩，可能我係逃避緊，但係我真係唔鐘意宜家咁樣的生活，就黎抖唔到氣，我係好自私，我唔想其他人影響到我自己原有的生活模式，我亦唔會同其他人交代我的生活，其實我覺得自己真係好失敗，無論做咩都會令到身邊的人唔開心，但係我真係唔想．．．．．

尋日星期六要返全日呀！好慘．．．放左工後同 Tommy 去左蛇竇食下午茶，跟住就返左屋企喇，好耐都冇試過星期六返屋企食飯喇，但係反而媽咪唔返黎食喎，激死，冇拖拍的日子就唯有係屋企執下我張亂到七彩既電腦枱，跟住同埋打埋封 cover letter，好野！跟住傾左陣電話就訓喇，一訓就訓到今日下午四點幾，訓左成十五個鐘呀，好滿足呀，好耐都未試過咁喇。

今日雖然係父親節，但係我冇同佢去飲茶呀，只係送左三張徐小鳳既演唱會飛俾佢，見到佢好開心，我都好開心呀，總算冇白費我排左兩個鐘頭隊啦！今日終於整左 D 相落部電腦度 lu，同埋都開始番我既搵工生活喇，好野好野，努力加油！

今日心情欠佳，又諗好多野，諗黎諗去都係那些問題，好亂，真係就黎痴線，可能其實已經係痴左！！！有時真係好想打自己兩巴！　

公司個冷氣好凍，我又試喉嚨痛喇，我係咪會死架，唔通真係在馬來西亞俾人落左降？？？

今日勁大雨，諗住放工去睇中醫，點知又話停電休息，唉．．．想點呀！

今日收到 one2free 帳單收費 msg，十個驚呀，竟然要交 $1,262 電話費？？？唔係嘛，我究竟點傾到咁多分鐘架，救命呀！！！

呢幾日成日都諗幾時走好呢？？？同埋搵到先走定係走左先搵呢？？？但係呢排咁窮，點走丫．．．煩死人，阿呆呀阿呆，你唔好咁大使啦，其實係人工少就真！

日日都唔想返工，唔想起身，唔想見到d 乞人憎的同事，一聽到 0199, 0082, 0615, 1467 同埋杭渠佬把聲就頭痛，爆咋喇．．．

你說 - 彭羚

憑一句話  扭轉我的心情
同一句話  別人說不出反應
為著你才會變得聰明
懂得了寂寞和高興
願這等於愛情

如果真心真意喜歡一個人
誰都發現面前看不見別人
就像能和你慶祝生辰
生於這世上才吸引
才能找到信心

越愛越深  越擔心這志願
與眼前現實極遙遠
被你一秒鐘虧待
我一晚不安全
不相信我曾被眷戀

越愛越深  越怕思想錯亂
怕眼前命運亦難算
為你一句讚賞話 我淹進了溫泉
假使你不肯說話  怎麼算

為你一句歎惜話 我一晚想不完
假使說分手  我又怎麼算

超好聽呀!!!!!!