今日返到公司睇下上星期六張 OT 紙，嘩！佢地班老人家做到四點九，好在冇 OT 咋！尋日食完個龜零膏真係有效，尋日到今日足足痾左六次呀，希望痾完就冇事啦！今日又係自己一個食晏，好無聊，食完晏返公司訓左幾個字，其實都係抖下，太嘈，訓唔到，放左工就返屋企喇，返屋企前買左個 TEA 食，好肚餓呀，傾左陣電話，睇左男人魅演唱會喇！跟住就沖涼，沖完涼睇左一陣書就食飯，食完飯就上網！
Sunny 病左，祝你快 D 好番，個人開心 D ，個人都會快 D 好架！呢排好多人病，祝個個人都身體健康，自己都係！
今日仍然係好大雨，今日同同事調左唔使 OT，所以十二點就放工喇，跟住去食肉燥飯，第一次行半山行人電梯上半山，但係太大雨，所以上到半山都係要搭巴士返屋企，返到屋企成身都濕晒，換過衫再出去剪髮，第一次係屋企附近剪髮，剪得唔係咁好，好似好短咁，又求其，下次都係去過第二間，跟住落中環再去銅鑼灣買 D 野再去睇戲，第一次去數碼港睇戲，睇千杯不醉，幾好笑呀，故事簡簡單單，笑完就算，吳彥祖又型，楊千嬅又搞笑，跟住去左“藍天使”食飯，跟住就返屋企喇！
今日起身覺得有 d 凍，好似好寒添！返工好嘈呀．．．Lunch 落雨，所以過左對面食台灣野，放工去康怡做 GYM，走時勁大雨，上左車就訓著左，訓醒望出窗，好黑，唔知係邊度，睇真 d 原來係維園，又係維園，原來塞緊車，次次塞親車都係維園，訓醒時又係維園，好邪！塞左好耐，有 d 乘客唔耐煩落左車，但係我諗住咁大雨，不如都係坐一陣啦，點知架巴士車頂漏水，頂！！！由維園去到三越足足用左九個字呀，跟住就唔塞車喇，我諗住唔搭 23 號返屋企，因為 23 號同頭先搭既巴士行同一條路，應該 d 巴士都會塞實晒去唔到銅鑼灣，而且巴士站又勁多人等緊車，咁我咪去灣仔先轉車囉，點知去到灣仔又塞過，咁諗住落車行遠 d 搭 40 號啦，點知因為塞車又冇晒巴士，好無奈，等左好耐，終於有車，但係我個膊頭、對手同對腳已經濕晒，上左車又凍又餓，好慘！去到堅道又塞車，返到屋企己經九點幾，由太古返到屋企用左兩個鐘頭零三個字，哈！
