下星期又要返六點，咁凍叫人點起身呀？？？！！！我唔可以病架，我要撐住！

呢幾日好凍呀！我最怕就係凍架喇，仲要我咁早起身返工，好慘呀！我最憎就係冬天呀，濕度低令原本有鼻敏感的我覺得個鼻更加乾同辛苦，同埋又要著咁多衫，做咩都唔方便，同埋塊面又乾又痕，塊面一乾就多油，一有油就生暗瘡，慘絕人寰兼慘不忍睹呀！　 　但係唔知點解有時仲見到有人著住短袖衫在街上面行，唔通佢地唔覺得凍架咩？所以我希望夏天可以快 D 到，咁到時又可以去沙灘曬太陽同游水喇，好野！

各位請小心身體呀！！！

今日呢，我想講我鍾意的歌手，呢個題目係咪好似小學生的作文題目“我的志願”一樣咁老土呢？？？哈哈哈，咁邊幾個係我鍾意的歌手呢？佢地就係．．．．．．林憶蓮，林一峰，梁詠琪，MARIAH CAREY同埋安室奈美惠喇！

咁今日我就講下MARIAH CAREY先啦，第一首聽MC的歌係"WITHOUT YOU"，最初我其實唔知道呢首歌係翻唱AIR SUPPLY架，但第一次聽己經超鍾意呀，之後聽番AIR SUPPLY個版本，就更加覺得MC唱得超好，自此之後，我就搵番佢之前出過的唱片同埋就咁一直鍾意佢到依家，雖然佢依家己經冇以前咁紅，甚至有人覺得佢依家把聲已經因長期唱歌而過份勞損，再加上佢依家的形象，傳媒就更加一沉百踩咁話佢只係一個過氣天后，靠騷身材而博出位的八婆，有時見到這些評語，真係覺得有些可惜，但無論點都好，佢的歌聲真係可以感動到我，雖然比CELINE DION少了一些技巧，但係就多了一份感情。

其實一直都有個心願，就係希望無論係在香港還是外國，可以親身去睇一場MARIAH CAREY的LIVE CONCERT就超正喇。

SUPER MARIAH FAN

今年計劃左在三月尾至四月頭放大假，但係就仲未諗到去邊度好，漢成呢，去過喇喎；泰國呢，上年先去完；布吉呢，又浸晒；台灣呢，你又唔想去；日本呢，太貴了，冇錢去；歐洲呢，更加唔使諗啦，咁仲可以去邊呢？？？好煩呀．．．

I LOVE MARIAH & ... u

話咁快就過左農曆新年，又要返工喇，每次五點幾起身返工的感覺就係想死同埋想即刻遞辭職信唔做，其實有左呢個念頭已經差不多成年，我都好佩服自己到依家仲可以忍受到仲做緊呢份工，其實有時都會諗，係我搵工唔夠積極丫，還是係自己唔夠料同人爭工。

其實有好幾次真係想辭左職先再搵工，但係到最尾都打消左呢個諗法，一來自己大洗啦，冇野做即係冇錢洗，二來係怕屋企人擔心，雖然爸爸媽咪話支持我所有的決定，成日都會安慰我話做得唔開心就唔好做啦，屋企又唔係等住我拿錢返黎，但係講真有邊個父母唔擔心自己仔女的前途丫，有邊個想見到自己的仔女失業呢．．．同埋仲有我唔可以太自私，有時你返工都會做得唔開心，尤其係你剛剛被調分行時，聽你話做得唔開心，我就更加唔可以辭左我呢份工，我唔想再增加你的負擔，亦希望你覺得有人在你身邊支持你，所以我下次同你“呻”我做得幾唔開心，你唔可以嫌我煩架，哈哈　

希望可以盡快搵到一份超正同埋自己又超鍾意做的工，仲有最緊要係個個人都要身體健康