因為尋日訓得夠，所以今日返工唔眼訓，雖然精神上夠訓，但係個樣都係好殘！LUNCH 同 RAYMOND 去太興食晏，坐隔離枱類似大陸人既物體超搞笑，飲左一半既凍檸茶要人地加水，食燒味飯又要加汁又要加乜醬物醬，超煩！余仁生今日有舞獅喎，好多人圍住睇！食完晏之後要派傳單，都差唔多派左兩個月喇，都派到麻木晒！放左工返屋企．．．哈哈．．．跟住去奧海城睇“神奇四俠”，講真，個故仔真係好普通，都幾老土，睇到有少少想訓添！但見係你咋，所以先陪你去睇，返屋企前去食糖水，又係雞蛋綠豆沙，下次要試下杏仁露先得！

嘩！估唔到會收到一份咁驚喜既禮物，係安室既新大碟呀，我都唔知佢咁快出左碟添，仲要係日文版，好多謝你！宜家聽緊，就黎聽晒喇，好聽！

仲有你幫我打電話訂楊千嬅 x 林一峰既拉闊飛，辛苦晒，十萬個感激，但係我知你實話唔使同你咁客氣架，哈！

今日返到公司，偉哥同我講佢今個星期六放假，當時我俾左一個“咁又點呀”既表情佢，因為我完全唔記得左佢放假我要返六點替佢，唉，當時那個想法又再湧現，點解咁多人唔揀，係要我替佢返六點？？？咁多文員，係都要我去派傳單？？？點解我個位成日要俾人用，仲要俾 D 核突人用，我知呢個世界係唔公平，但係又可以點呢，明白呢個部門已經冇野再值得留係度，只有靠自己努力 D 去搵工，我相信我有一日真係可以離開呢間公司，宜家每日返工都好累，好唔夠訓，好唔精神，每日都係度撐，我唔知仲可以撐到幾時，可能有一日我真係會頂唔順．．．

LUNCH 同舊老細 & OFFICER 去 LOT 10 食晏，好開心仲可以同佢地 KEEP 住聯絡，FLORA 真係一個好好好好既老細，宜家個老細，唉！！！

放左工本來諗住去剪髮，但係真係太累喇，返左屋企訓，一訓就訓到食晚飯，好滿足呀，宜家叫做精神左 D，所以可以夜少少先訓，哈哈！！！

呢排生左好多暗瘡呀，額頭啦，兩邊面啦，其實我己經好小心食野架啦，但係點解仲會咁架，皮膚唔好真係會好影響我既心情，同埋令我既自信跌到最低點，真係唔想見人．．．唔通真係內分泌失調？咁使唔使睇醫生呢？？？

聽日約左人去睇戲，好野！！！

有日無聊發呆諗緊將來既我會係點樣呢？我係度諗，如果下半年可以轉到工，咁我就可以儲幾個月錢，唔好咁大使，跟住出年就可以試下自己搬出去住，然後呢．．．當份新工穩定 d 既時候，就可以去搵 d 野學，學咩都得啦，可以學日文啦，考車牌啦，學煮野食啦，又或者讀番書，但最想學既就係學彈琴，有拖拍的話又可以拍住拖咁係屋企煮飯、睇電視，攬住自己鐘意既人一路訓到天光，好幸福呀！！！ 起身之後一齊食早餐，一齊出門口返工，星期日又可以約爸爸媽咪去飲茶，好天又可以去沙灘游水，又可以去做 Gym，哈哈！呢個簡直係我既 Dream Life 呀！！！

尋晚同 Raymond 去會展睇新城勁爆唱作之合音樂會，有李克勤同梁詠琪，仲有特別嘉賓張敬軒同王菀之，最好睇都係張敬軒同王菀之那部份，仲有佢地合唱左"Sorry Seems To Be The Hardest Word"，真係好好聽，仲有張敬軒唱現場真係好好好好好正呀！！！王菀之講野把聲好好笑！聽完現場版既一秒感動之後，對呢隻歌加左唔少分呀！但係講到有咩唔好睇呢，就係李克勤唱醫道、球迷奇遇記同埋閃電傳真機．．．聽到一額汗．．．同埋佢十年如一日的歌聲，仲有個金毛頭，睇同聽都覺得有 D 悶！仲有梁詠琪都唔好得去邊，雖然佢唱現場係好左，但係唔知點解尋晚佢成日記錯歌詞，又甩咀，仲有唱左好少自己歌咋，同埋佢唱快歌真係好得人驚，唱到 High High 地就出事，唉！！！但係都好驚喜佢會唱憶蓮既日與夜、周慧敏既最愛，但係唔鐘意輕快版既三千零一夜同跳傘囉．．．想點呀，最意外都係見到范掁鋒呀！！！哈哈哈　

今日係同事Joe 結婚擺酒的大日子，地點係沙田麗豪酒店，係紅磡火車站等車時竟然俾蚊咬喎，乞人憎呀．．．架車又勁多人喎，仲有個滿頭頭油、個樣十足十似北上尋歡的核突男人撞埋黎，救命呀，好似俾佢污辱左咁，落車叫人借借又冇人有反應，嬲得滯用腳踢開前面女人個行李車，鬼叫一個二個扮聾呀！！！去到酒店見到已經有同事到左打緊牌，等左一陣影左幾幅相，九點半就開始上菜，但係上菜上得好慢，感覺上就係等．．．等．．．再等，唔知點解0199, 0296 同0082 會咁多野講，好似舊朋友重逢咁，成日講想當年．．．其他同事都好靜，而我就超眼訓，十一點幾就同大雄同問米婆走先喇，去到巴士站就有車喇，好好彩，好快就去到灣仔，唔使一個鐘就返到屋企喇，好野！！！係度祝阿Joe 同佢老公新婚快樂，永結同心！！！

尋日去ICE FIRE 諗住買短褲，但係試極都唔岩心水，同埋我宜家著三十腰都覺得好緊，要著三十二腰呀，唔通真係肥左係個肚度？？？