今日終於都同遊魂基傾除夕 Party 啲嘢，知道有啲 Officers 又側側膊唔夾錢，好肉酸呀，估唔到 Albert 都俾一千喎，哈哈！

之前有兩篇日記都有個叫 Ka Yu 的人留言，唔知係邊個嚟呢？

今日自己好大意，好唔開心，好嬲自己，十萬個唔開心！

宜家個頭好痛呀，就嚟爆喇，都係早啲瞓啦！

今日放咗工由公司行返屋企，由半山行人電梯行上山，經過蘇豪，再由堅道一直行返去，天氣涼涼哋，好舒服，好多朋友同同事都問過我公司同屋企咁近，會唔會行路返工或者返屋企，每次我都會話痴線，但係今日我竟然咁做，唔通我真係痴咗？

返到屋企有人喺度，原來大佬今日放假，喺屋企溫書，因為佢今晚要考試，佢出咗去之後我就瞓覺，一路瞓到食飯，真係好攰呀，喺張皮入面真係好暖呀！

食完飯沖完涼搵咗陣工又十點半喇，聽日星期四喇，希望快啲到聖誕啦，又可以放假喇！

尋日朋友 Gloria 話佢終於都聯絡到之前失咗蹤那位朋友喇，但係就點都唔知點解佢會玩失蹤，同埋之後佢話會唔喺香港，我諗會有一排都見唔到佢，唔知佢仲會唔會再失蹤過呢？希望唔好啦！

今日終於去做番 Gym，差唔多有成個月冇去過做 Gym 喇，今日去到 e-house Physical，好少人喎，好能同世貿會議有關啦，啲人可能驚附近啲交通有問題，所以唔去嗰度，同埋因為太耐冇去做 Gym，入面啲器械轉晒位，哈哈，仲有就係知道出年一月個月費會加到 $328，點算好呢？

今日上磅又重咗，一百五十磅，十個驚！Mandy 今晚 send 番啲舊相俾我，以前啲皮膚真係好好多架！唉！

尋日寫咗篇日記，睇咗湯米俾我的留言，你講啲嘢其實我都有諗過同埋諗得到，但係有時人總有情緒低落同鑽牛角尖的時候，我都會學識凡事睇開啲同試下係多方面去睇一件事！

唔知點解今晚有少少忟，放工返到屋企傾咗一陣電話，食咗啲嘢，執吓衫，跟住沖涼，食飯，剪咗指甲，上網搵咗陣工，拎咗聽日要著嘅衫出嚟，執咗聽日去做尖啲嘢，跟住依家寫日記，己經係十點喇，時間好似成日都唔夠用，好似又係時間去瞓喇，唔係第日返工又會好攰，好憎屋企成日都咁夜食飯，你哋可以瞓到七點幾八點，但我又要返早，好憎屋企咁多人，想搵個位坐都冇，好憎成日想用廁所都有人霸住，好憎成個衣櫃都係臭丸味，突然間好討厭呢個環境，竟然想搵一個自己的空間都冇，想搵一個角落去講電話都冇，間房有人，個廳又有人．．．好忟呀！

今日突然間想辭咗職先再搵工，呢個感覺今日好強烈，其實有幾個因素要考慮，但係最過唔到自己嗰關就係屋企，唔知點同屋企講呢個決定，真係好想返番去啱啱畢業嗰陣，做第一份工做得唔開心時，同屋企講一句唔想做便算了，跟住第二朝就打番公司話唔做喇，但係宜家又點可以咁呢？

上個星期陳慧琳叫我搞今年個除夕 Party，今日睇阿 Joe 個日記話原來係我同遊魂基一齊搞，吓，我同佢平日嘢都唔講多句，點夾呀？！如果係真唔該早啲同我講喎，但如果係真，我點都唔會去叫個老嘢夾錢囉，唔係到時個老嘢又話要夾錢就唔到，但係到時就又食又拎，Cheap 爆！

上星期同 Sunny 去食飯，去食意粉屋，啲嘢食好似冇咁好食咁，嗰晚俾湯米知道佢同咗我返屋企，傾咗一陣，心情有啲 Down！

上星期三晚至星期日都過得好開心，好舒服，好 Relax，完全冇咗平時返工的厭惡感覺，毫無壓力，好唔想個假期完，每次放完假都會有個後遺症，就係超唔想返工，其實我真係幾細路仔脾氣！

尋日去咗唱 K，搭巴士落銅鑼灣時撞啱啲人遊行，啲巴士改晒路，嘩，好多人呀！成兩個月冇唱 K 喇，唱咗好多歌，係咁嗌，唱側田啲歌時唱到好似唱大戲咁，爆笑！唱到癲咗！

今日返工食完晏返去，見到個老嘢又自把自為咁熄咗我部電腦自己用，當時我真係火都嚟埋，究竟佢係持老賣老定係唔識尊重人呢？！頂佢個肺，我終於都忍唔住話佢，叫佢唔該下次等我返嚟 Log Out 番出去佢先好用，跟住條白痴佬扮晒懵咁話以為我放假，吊，咪玩啦，你成日喺度睇住本簽到簿，邊個有返邊個病你最清楚啦，咪喺度扮撚晒低能啦，好慶呀，真係唔打粗口都唔得呀！

今日放工去食咗啲嘢先返屋企，食咗個鮮油多，好難食呀，都未食過咁難食嘅鮮油多，口感好怪！

今日凍咗好多呀，聽朝仲話會得番十一度，唔知起唔起到身呢！！！