Tommy 睇咗我前日篇日記，尋日問咗我三個問題，第一係佢問我日記最尾嗰句係咪話緊佢！第二個問題問我係咪唔鐘意同佢傾電話！第三個問題係問我係咪唔鐘意佢星期二叫咗我出嚟，以上三條問題我都答咗佢喇，我冇咩要補充！有時佢真係諗多咗！

Tommy 話佢同事隻狗中毒死咗，佢個同事好鐘意同錫隻狗，仲錫過自己個女，有咩開心同唔開心嘅嘢都會同隻狗講，之後我諗到一樣嘢，其實如果一個人對一樣物件或者一個人太投入或者太依賴，將自己所有時間、精神同愛心都放係佢身上，到某一日失去咗呢樣嘢時，可能真係會好傷！呢種感覺我都好驚！

尋晚去咗學士佛台同 Raymond 食飯，因為想食泰國嘢，咁 Raymond 就打俾佢啲朋友問下尖咀邊度有泰國嘢食，最後去咗一間三層高，地下食日本嘢，一樓食西餐，二樓食東南亞嘢嘅餐廳食，環境幾好呀，啲 Services 都得，但係啲嘢食就唔係咁啱我食，有啲失望呀，下次唔會再去架喇，呢個價錢應該食到啲更好味嘅！

今日星期六放假，瞓到一點度起身，都瞓咗十一個鐘，六點幾媽咪問我使唔使返工，當時我坐起身呆咗，個腦完全係諗唔到嘢，想諗今日係星期幾同埋使唔使返工，但係個腦好亂，只係望住個鐘，跟住話唔使返呀呀呀呀，就繼續瞓喇，點幾俾樓下架泥頭車嘈醒咗！起身睇報紙，再搵工，跟住刷牙洗面沖涼再食嘢，上咗陣網 Send E-mail，宜家打埋日記就出街喇！

頭先 Send Resume 時先發覺原自己個 Resume 一路都打錯咗個人工，打信時又打錯咗啲嘢，實在太粗心大意喇，好忟呀，自己攞嚟衰呀！

星期二係重陽節假期，七點幾起身去拜山，好眼瞓呀，行咗好多級樓梯，好攰，腳都軟埋，今年清明節我冇去到拜爺爺，所以呢次係我今年第一次上山拜爺爺，印象中我好似未見過爺爺，屋企人都好少提起佢，亦都冇人講過爺爺係因咩事唔係度，我亦都冇去問，只係喺神枱張相知道爺爺係點樣！拜完山同爸爸媽咪去飲茶，好開心有得食千層糕呀，好好食呀，跟住就去旺角 Join 埋 Tommy 去唱 K，有好多新歌喎，但係我唔識唱，真係覺得自己好 Out-dated，之後去行街，係荷李活購物中心買咗條褲同件 Tee，個 Sales 好好人架，又健談，夜晚過番世貿打機，都幾無聊，最後返屋企附近間麥記食嘢，本來想換邪留丸架，但係換晒喇，搞錯呀！！！返到屋企雖然只係十點鬆啲，但係已經係起攰喇，本來諗住今日拜完山返屋企再瞓過，但係最後都冇，好似冇放過假咁，同埋我又唔覺得我今日成日笑喎！

星期三返工好攰，Lunch Raymond 打嚟問我得唔得閒同佢食晏，咁我哋就去咗太興食飯，係，又係太興，啲燒味好難食呀，下次唔好再去太興喇，仲難食過大家樂呀！放工去做 Gym，之後返屋企食飯，傾完電話就瞓！

星期四返工又係咁，冇咩特別，放工就返屋企，夜晚又係講電話，今晚爸爸媽咪都冇返屋企食飯，難得間屋可以咁靜，真係好呀！

星期五如常地返工，Lunch 食老麥，今次終於換到邪留丸喇，好嘢！放工約咗 Raymond 食晚飯，去尖沙咀食，Raymond 升咗做 Unofficial Responsible，但係人工冇加到，但佢話要請我食飯，但係今次係我約佢食晚飯架喎，上次已經係你請架喇，唔可以次次都係咁架，下次真係要請番你架喇！

今個星期公司都幾平淡，幾好吖！原來 0081 睇票好快架，有時仲一秒一張票添呀，老人家果然勁呀，阿琳放完假返嚟，開始聽到阿蘭講番多啲嘢，但係永遠都只係聽到阿蘭把聲，但係就聽唔到阿琳把聲，哈哈！

有日 Tommy 問我點解我呢排好似要等佢叫到我先打俾佢，我又唔覺喎，以前讀書有時都會同同學煲下電話粥，但係大個咗就唔係咁鐘意講電話，因為其實自己唔係太多嘢講，講電話又要用個腦去諗話題，又要俾反應，其實都好花精神，又怕 Dead Air 喎，所以有時同我講電話有 Dead Air 時，就係代表我個腦已經停咗，諗唔到嘢講喇！有時真係寧願瞓下或者聽下歌好過！

有晚發夢同 Janet、Gloria、Sammi、Nicholas 同埋 Larry 去咗韓國旅行，仲一齊去睇親切的金子，個夢到宜家都好清楚，係我去買飛架，仲好記得係買 A 行同埋 L 行，但係係一齊坐架喎，神奇呀，戲院架車立係紅色架，戲院隔離係一間類似 KFC 或者麥記嘅物體！真係唔知點解會發埋啲咁嘅夢！

今日值得被人欣賞嘅性格，日後變成被討厭嘅原因，真係荒謬！

聽日係重陽節假期，又唔使返工，好嘢！

今日返工幾平淡，食晏去仙桃源食嘢，點知個假天花度有隻貓係度走圍行，嚇到 Perman 話以後都唔嚟呢間食晏，哈哈！0199 今日開始放大假，真係好呀，唔使成日都有個人喺度嘈住晒！今日 Albert 同問米婆講要佢十一月開始星期六 OT 要同偉哥調組，唔使講，又係個杭渠佬嘅鬼主意啦，好憎呢啲人，成日喺度搞埋啲小動作，但係佢每次嘅鬼主意都影響到其他人，上次調 SAT OFF 係咁，今次又係咁，點解佢唔可以同偉哥同一組呀，好難明囉！

放工去做 Gym，唔多人喎，Tommy 放工都嚟做 Gym，跟住我去老人院探"阿女麻"，好耐都冇去探佢喇，佢精神都幾好，我好驚佢唔認得我呀，每次去探佢佢都會問我係咪好忙呀，唔得閒就早啲走啦，又或者係早啲返屋企沖涼食飯啦，以前我好少同佢講嘢，又成日覺得佢好煩，又唔乾淨，到佢中風之後，成家人都唔知點算，姑姐同爸爸媽咪仲因為好唔好送"阿女麻"入老人院而嘈，當時我覺得"阿女麻"好似會走咁，我竟然會喊，大個咗之後都好似冇喺屋企人面前喊過，我都唔知點解，可能真係體會到親人離開嘅感覺，但係好在"阿女麻"依家仲喺度！以後要探佢多啲先得！

夜晚喺 MSN 度同 Tommy 講咗我呢幾日心入面諗緊嘅嘢，我以後都唔會亂諗嘢架喇，放心啦！

啱啱過咗嘅呢個禮拜真係過得好辛苦呀，返足六日，超攰呀，好在今日終於可以瞓個夠，尋晚足足瞓咗十四個鐘呀，哈哈哈哈！！！

上個禮拜二開始五萬蚊以下嘅票都係 Low Value，同埋加埋係月頭，所以感覺上好多票睇，好辛苦，睇到對眼好攰呀，救命呀！日日都要睇到過咗十點，星期二仲要睇到十點十添！好在 0199 冇發癲！

星期三放工約咗 Sunny 去食飯，佢去灣仔影 Staff Card，咁我順便還番部電腦辭典俾佢，我哋去咗美心食 Tea，我食咗個蕃茄湯底嘅腸蛋通，都唔好食嘅，好酸呀，跟住去 ZARA 睇衫，但係 Raymond 唔喺度喎，跟住搭巴士去銅鑼灣行街，行晒成個銅鑼灣呀，發覺好多地方都變咗，時代廣場上面啲鋪頭變晒，izzue 執咗位但未開，ZARA 又就嚟開喇，又冇咗 Billabong，好似冇乜嘢行咁，Sogo 十蚊店又變咗 izzue，東角駅樓上好多鋪又話搬遷要執，跟住去食粥，再行多陣就走 lu，見到 Sunny 同以前變咗好多，個頭 Set 得好睇咗啦，唔用 Gel，用咗泥，又戴 Con，又瘦咗好多，打扮又 Trendy 咗，宜家咁幾好吖！呢日仲有喺時代睇到憶蓮個新歌嘅 MV，好嘢！

呢個星期唔知點解好多 Direct Debit 要過機，但係印鑑就唔係有太多，0199 又叫我同溫紹元下星期開始去派傳單，但係食完晏我走入房同佢講話可唔可以搵第二個同事去派，佢問我係咪唔鐘意派，哈，咁都要問，邊有人鐘意企喺條街度俾人望架，多餘，之後佢話要幫我問下先，跟住佢問 Perman 介唔介意去做，Perman 話介意，佢都傻傻地，咁問人，又唔見佢上兩次咁問我？？？！！！最後就由阿基同溫紹元去派！今次我終於出聲係因為我真係超唔願意再去派傳單，同埋都冇理由次次都係搵我吖，我唔出聲唔好以為我好蝦囉！

上星期公司啲人為咗放 SAT 成日係度嘈，Albert 話放 SAT 要前兩日寫落點名簿度，0199 真係好好野，自己想講嘅嘢可以借人哋把口講自己要講嘅嘢，唔通佢想訓練 Albert 做到添哥咁？！呢句擺明係話 0082 啦，抵佢死呀，真係越嚟越憎呢個老嘢，恃老賣老，成日睇住本點名簿，你估你係老細呀，頂你，星期六又喺度大聲問阿好有冇返，佢都真係超低能，係咪老人痴呆呀，不如提早退休啦，人哋阿好成朝都坐係度，咪玩啦阿伯，份人又孤寒又 A 字膊，真係好難頂呀！！！成日都淨係識得食，咳又唔遮住個口，妖，咁耐都仲未識得 Set printer，Fax 嘢佢都要成個 Fax Number 入晒呀，都唔識得用啲 functions，呢啲人要淘汰啦！

我個 SAT OFF 由廿二號變做廿九號，再變咗做十五號放，因為有人話兩個臭男人 A.O. 唔可以一齊放喎，要我同偉哥調，好撚煩呀你哋，好在我冇特別嘢做，如果我話唔調得睇你哋點！

星期五係第三個月嘅日子，去咗數碼港食日本嘢，幾好食喎，個牛肉飯同個燒魷魚好好味，哈哈！但係呢排冇戲想睇，所以冇睇到戲，之後遊車河，去咗赤住行咗一陣，跟住就返屋企喇！

星期六要 OT，好在四點都走得，聽到溫紹元同肥根講，冇人做 High Value 同美金，唯有佢做晒，講到好似自己好慘咁，冇人做嘢咁，又話朝早過機係佢，OT 過退票又係佢，又話冇人做野，懶大方咁話，唔緊要啦，冇人做咪我做囉，頂佢個肺呀，我做 Low Value 仲多過你啲 High Value 啦，其實冇人叫你去開機過退票架喎，係你懶醒未夠兩點就去開機霸住部機之嘛，個偉哥又係，又唔 Cap 票，佢同杭渠佬又成日放晒啲 Balancing 出嚟，我真係唔會上你哋當呀，唔知點解呢個部門有啲人唔係咁多嘢做但係就覺得自己好忙咁，好似好多嘢都係佢哋做，成日喺度怨，0082 係咁，阿 Car 係咁，阿好係咁，連溫紹元都係咁，講真，呢個部門其實唔係真係咁忙咁多嘢做，起碼我唔係，我見好多人都唔係，唔係點會可以有人喺度搽牛油食包，成日傾電話搞到條電話線跳嚟跳去，可以去廁所開大成四個字都唔出嚟，可以拎埋報紙入去睇，可以成日行嚟行去，真係好想同佢哋講，有時想話人同俾說話人哋聽嘅時候，要諗下自己係咪咁先囉！

發洩晒啲不滿出嚟，舒服晒！

禮拜六放工去食 Tea，跟住去睇醫生，腸胃炎，但係唔係好嚴重，之後食咗啲嘢，行咗一陣，去咗太古城，由太古城行到筲箕灣呀，發覺自己好犀利呀，雖然攰，但係啲海風吹埋嚟好舒服呀！

下個禮拜要拜山，雖然放假，但係都係要好早起身，唯有拜完山再返屋企瞓過啦！憶蓮個演唱會搵晒人陪我去睇喇，聽講呢次唔係咁賣得喎，唔知會唔會加場呢？但係就算加場我都好似冇乜意慾去睇咁，點解呢？唔知係咪因為冇咗嗰種 nosie 呢！