今日做做下嘢係度諗，其實喺一日入面會有幾多人用我個位或者會掂我部電腦呢？！依我屈指一算，使用率如下：
- Carmen 坐我個位睇 035 USD 實票
- Perman 朝早過 044 啲票
- Katherine Free Flow
- 小燕幫 Perman 清機
- Albert 攞 C/O Report
- 0082 下午用我部機 Print 退票 Advice
- 溫紹元過退票
- 月巴木艮下午 Free Flow
- 夜晚有 GA Staff 坐我個位拆袋
總結：九個人，低能！

今日買咗兩隻碟，就係側田同平井堅，好似好耐都未親身去到唱片鋪用錢去買唱片，哈哈！但係仲未有時間聽呀．．．買呢兩隻碟係因為覺得側田唱歌好，而平井堅嗰隻就係因為係佢第一隻精選，好想買！

今日去咗等湯米放工，又嚇親佢，跟住送佢返屋企，跟住－秘密－，自己再返屋企，俾咗啲嘢食佢，哈哈！！！

今日又去飲咗五花茶，希望啲暗瘡快啲謝啦！

25 歲喇，多謝每個朋友給我的生日祝福，給我的生日禮物，同埋給我的生日飯，能夠認識你哋係我嘅福氣，我會珍惜我宜家擁有嘅嘢！ 

最近執咗好多唔要同唔啱著嘅衫同褲出嚟，發覺原來自己真係肥咗好多，今日磅過，有成一百四十五磅，之前買褲時先知宜家條腰有成三十吋半，好得人驚呀，以前啲褲有啲連拉鏈都拉唔上，宜家肥到有個肚腩添，好礙眼呀，點算好！我係咪食大咗個胃呢？係咪應該要減肥呢？ 

成半個月冇去做尖喇，好懶，每日放工都好想返屋企瞓覺，但係有時又會瞓唔著架喎，激死人！ 

呢排返工都係搭電車，好似鐘意咗搭電車添，有時連放工都係搭電車，再行幾條斜路返屋企，感覺好舒服寫意，搭電車好舒服架，又可以慳錢，幾好呀！ 

尋日返工做咗今年嘅 Apraisal，個 Rating 同舊年一樣，但細 Part 嘅 Rating 就差咗，入房傾咗十分鐘度，老細話我要主動啲去學多啲嘢，話呢個部同啲同事唔夠主動，又冇歸屬感，又暗示我多 Sick Leave，要多啲幫手聽電話，同舊年一樣，我都係覺得聽完就算，都冇咩好講，同埋都冇乜嘢要去反駁，老細問我對自己有咩要求，佢一問，我先發覺原來我對宜家嘅自己冇乜要求，其實應該話係對呢份工冇咩期望，其實冇期望係咪唔需要有要求呢？！ 

呢排返工有一種講唔出的心情，但係又講唔到喺邊度有問題，只係好似對咩都提唔起勁，睇咩都唔順眼！冇乜嘢做？好悶？每日都同自己講，25 歲架喇，阿呆要爭氣啲，唔可以長遠都係咁，要為將來著想一下，要儲多番啲錢．．．．．．好多好多嘢！ 

最近好討厭 0082，有時甚至覺得佢比坑渠佬更乞人憎，好唔想見到佢，好唔想聽到佢把聲，好唔想佢用我部電腦，好憎佢啲行為！ 

公司個男廁好污漕，都唔明點解其他男同事成日都整到個地下濕晒，仲衰過啲公廁！

十一月十一、十二同埋十三號的晚上我都在紅館度過，因為去咗睇我的至愛林憶蓮演唱會，由今年年中知道憶蓮會開演唱會的時候，我就己經決定今次我一定要睇晒佢咁多場的演唱會，當知道 Manhattan 信用咭可以優先訂飛的時候，我就等到當日九點正開始不停咁打電話， Redial 又 Redial，雖然嗰日我要返工，而且仲做緊嘢，但我都唔理，一路做嘢一路打電話，終於俾我打通電話訂到第二同第三場的演唱會飛，到正式賣飛那日我又去排隊買，當宣佈加場時我又再走去買，就係咁，終於買晒四場的飛喇！

而我亦搵好朋友陪我去睇各場的演唱會喇，可是當中發生咗啲小插曲，就係朋友阿德話佢要考試陪唔到我去睇第一場呀！同埋原來憶蓮開演唱會那幾日我要返六點呀，咁點算好呢，就係咁，我就將第一場嘅飛俾咗個舊同事 - Karen，因為佢都鐘意憶蓮，但係就冇買到飛，咁我就可以解決咗個問題喇，同埋我又可以少一晩唔夠瞓喇！

一路都好期待演唱會嘅來臨，未去睇演唱會之前我都唔想知道個 Rundown 係點，想有一個神秘感，哈哈，到第一晚去睇的時候，即係演唱會的第二場，我當時真係好興奮架，當日同 Sunny 坐第二十一行，唔算前亦唔算後，但係俾前面條欄杆遮咗一啲視線，演唱會開始時，感覺憶蓮把聲好似唔同咗，大聲咗，沙沙哋，講嘢都冇以前咁柔弱，同埋講多咗嘢，睇完之後的感覺係唱咗好多冷門歌，唔係，應該叫做滄海遺珠的作品，氣氛好似冇 02 年，甚至 04 年管弦樂個 Concert 咁好，有少少失望，有啲好早期 Sony 時代的歌要聽到副歌先記得係咩歌，仲有兩隻歌係完全唔知係咩歌嚟，我呢個憶蓮 Fans 真係失禮，坦白講，我覺得有少少悶，連我都話悶，唔使講，Sunny 一定有好多歌都唔識，我諗佢會覺得仲悶！因為第二日星期六要返六點，所以 Encore 完第一次場館著咗燈我就走咗喇，冇聽到憶蓮唱日與夜添！ >__<

到咗星期六晚第三場演唱會，即係我睇嘅第二場，呢場同 Tommy 睇，今次坐第五行，咁大個仔第一次坐四百蚊嘅飛，但係呃人架，第一行前面仲有 ABCDE 行架，差唔多坐第十行呀，但我已經好滿足喇，因為真係可以好近咁睇到憶蓮，開心到爆燈呀，呢晚嘅氣氛好好喎，搞到我都企晒起身，又大嗌憶蓮，好 High 呀！！！憶蓮呢晚仲好多時間都對住我坐呢邊呀，哈哈，好嘢，Encore 咗兩次之後，好多人都唔肯走，大家不停叫咗差唔多十幾分鐘，憶蓮都唔出嚟，之後唯有好失望咁走喇，但今晚覺得啲歌聽得熟咗，好聽咗！今晚仲有啲朋友都嚟睇憶蓮，有阿德啦，Raymond 啦！哈哈！

終於到尾場喇，未開始啲人已經好 High 喇，今晚又係坐第二十一行，但係坐我附近啲人好靜，有啲後悔買咗二百蚊的飛，今晚個 Rundown 有少少唔同，有啲新歌，好好聽呀，最後 Encore 咗三次先完場，跟住就趕住返屋企喇，因為已經係十一點搭十喇，而且第二日仲要返早添，但係我覺得都係值得架！

Rundown

[後台化妝準備video]
[街頭look]
01 推搪 （總覺得 93 年演唱會 Medley 唱呢首歌時個 Arrangement 好啲，同埋好似用呢首歌做第一首歌唔係太勁，會唔會唱傾斜好啲呢，但係唱傾斜又唔切合唱冷門歌嘅原則)
[脫大衣]
02 回家對著你媽媽 (第一晚聽好悶，第二三晚聽覺得幾好聽)
03 本色 (Intro 好型，超鐘意)
04 微涼(第一晚係唱下雨天架，但係之後三晚都係唱微涼，明智的改動呀，連憶蓮都話呢首係由一首 Side Track 嘅歌變咗做憶蓮 Fans 嘅 Hit 歌）
05 獨行少女 (第一次聽唔知係咩歌，覺得唔好聽，好在第四晚唱咗心野夜，意外驚喜） 
06 點唱機 [配合分身舞] (冇咩特别感覺，但個 Video 幾特別）
[換衫-日本武士video]
[和服look]
07 無情實驗 [升上高台] (完全未聽過憶蓮呢一首歌，感覺係演唱功的歌)
08 決心[脫和服變劍道look，背部有假紋身] (估唔到會唱呢隻歌，幾意外，都好鐘意）
09 沉淪 (好憶蓮作風嘅舊歌，曲高和寡，好迷幻）
10 為何他會離開你 (新歌，第一次聽憶蓮唱現場時，聽到有少少眼濕濕) 
11 沒結果 (第二晚點唱環節唱過，第四晚正式 Rundown 新加的歌，Intro 一響個個人都尖叫，當然我都唔例外啦)
12 住家男人 [Soler合唱] (幾 Rock，但唔係我想聽嘅歌，係觀眾的廁所位)
[換衫-Soler唱"Family Man"-彭敬慈倒吊扮星]
[白紗裙look]
13 鷹與星 (唔太熟呢隻歌，但係演唱會聽完之後就愛上咗呢隻歌喇) 
14 再生戀 (由始至終都唔鐘意呢隻歌） 
15 沒有你還是愛你 (呢次演唱會少數唱嘅大路情歌）
16 為你我受冷風吹 (02 年演唱會唱過聽說愛情回來過，今次終於輪到呢隻喇，多謝憶蓮)
[換衫-倫永亮彈琴]
[粉紅晚裝]
17 至少還有你 (唱呢首歌時反應好好，但係我開始聽厭呢隻歌喇，好在條裙夠靚)
18 感情不老 (第二場唱時有握手，第三四晚冇)
19 細水長流  (現場睇好感動架) 
20 多謝 (握手位，Encore 前最後一首慢歌)
[換衫-感謝名單合照]
[藍色絲絨衫褲]
21 Diva (幾驚喜呀，但係跳得唔太勁)
22 不還你 (唔係好聽到憶蓮唱乜，但氣氛搭夠)
23 天大地大 (自己覺得係氣氛最好的快歌)
24 一分鐘都市一分鐘戀愛 (不如唱震撼或者醒醒啦）
25 灰色 (Ending Song，全場都好 High 喎)
[encore 1-換衫-紫色背心黑絲巾]
26 難忘您 (又係握手位)
27 微雨撲巴黎 (好鐘意呢隻歌！！！！！但係第四晚冇唱）
28 擁有 [點唱] (未聽過，但係個 Melody 好熟)
29 不捨不棄 [點唱] (歌詞幾有意思，好啱憶蓮唱俾歌迷聽)
30 因你瘋了 [點唱] (好似係一首好多人都鐘意的 Side Track，但我覺得一般)
31 長街的一角[點唱] (陳慧嫻隻 Love Me Once Again 好似好聽啲)
32 瘋了 (憶蓮 Concert 必唱的快歌，每次唱氣氛都好好，全部人都起身跳舞)
[encore 2-換了之前未穿過的長裙]
33 傷痕 [新加歌曲]  (真係估唔到佢仲會唱呢隻歌架，好意外)
34 願 [新加歌曲]  (好多人都鐘意的歌，但我覺得麻麻)
35 日與夜 (冇喺上年管弦樂音樂會唱時那種震撼的感覺，新鮮感少咗好多)
[encore 3]
36 春雨 [新加歌曲]  (超級驚喜，意想不到，但係點解唔唱暗示呀？！)
37 無憾 [新加歌曲]  (Side Track 歌，02 年演唱會已經唱過)
38 早晨 [新加歌曲]  (同微涼一樣，會聽到我毛管豎起)
39 激情 [新加歌曲]  (快板，只唱了幾句)
40 前塵 [新加歌曲] (憶蓮唔唱我都差啲唔記得有呢隻歌呀)

鐘意憶蓮己經好多年了，每次聽到憶蓮的歌，都會有一種感動，憶蓮嘅歌可以帶俾我好多回憶，對她總是有一個情意結，遺憾是她出道時我的年紀太小，未能懂得欣賞她早期的歌！

人，面對外人時，總是可以表現得雍容大肚、心平氣和，但面對自己最親近的家人，卻往往一點小事就足以皺起眉頭，甚至出言相傷。如果形容人類是一種「出門高E.Q，回家低E.Q」的動物，我想一點兒也不誇張，多拿出一點耐心與幽默感給家人吧！否則您自己也不會快樂，不是嗎？

以上係今日我無意間睇到嘅一段說話，覺得幾有意思，撫心自問，其實我都係呢一種人！

林憶蓮有首新歌，叫“為何他會離開你”，到宜家我都仲未有機會聽到呀，但係聽人講呢隻係一隻 K 歌，唔似 Sandy 以前啲歌，仲又個朋友話個歌名好 Cheap 添，哈哈！之前睇到一宗消息，憶蓮話係因為多謝香港歌迷同紀念入行二十週年所以今次先出廣東碟，之後會只係出國語碟，因為廣東碟嘅巿場太細！噢．．．．．．

曲:雷頌德 詞:林夕
為了他令你哭為你哭令我哭
為你很顧慮
能為你跟他一對
撥過無盡冷水

為愛他為掛他為怨他為了他習慣受罪
如今他走了請不要追

舊情注定丟淡
問題不止一晚
命途總可以揀

為何他會離開你
誰叫你變了他知己
常纏在一起會換來危機
他找你不找你
你竟幼稚到講道理
男人總輕視你寸步難離
原來擁吻如不放錯在你

沒有他便叫他沒有花便要花
漸愛出慣例
誰會像一生一世
血壓蠶蝕美麗

為了他做過東做過西又似奴隸與賣藝
原始的悲壯已經失勢

情人要被輕放
自然相處恰當
為何不聽我講

為何他會離開你
誰叫你自己不會飛
常纏在一起會換來危機
他找你不找你
你不智地對他生氣
問他等於問你當我問候你

雙眼像鑿滿傷悲
誰又敢深愛你但未怪你
昨天那天真的你
若是還有骨氣
哪會纏他的心機
拿去愛惜你
怎可洩氣

為何他會離開你
誰叫你沒火花點起
如纏在一起
誰亦會怕你
他找你不找你
有他那苦衷兼道理
男人總輕視你寸步難離
原來擁吻如不放錯在你

熱情冷淡反悔
為何怎麼怎會
談情後你我也學會