近日天氣一日比一日凍，其實我唔係唔鐘意冬天，但就只係好怕凍，成日都凍到啲手指硬晒，同埋一凍個人就唔想郁，哈哈，好似想冬眠咁！

今朝收到湯米嘅短訊，好耐都冇收到佢俾我嘅短訊喇，好開心呢！而我都好耐冇SEND MSG 俾佢喇，等我遲啲SEND 個MSG 去佢個新電話度先！

公司張椅成日都“It It” 聲，好煩，覺得自己好嘈添！

今日關淑怡會出一隻單曲碟，湯米之前好擔心會買唔到，點知佢食晏時打俾我話我知佢真係買唔到喎，好多間唱片鋪都話未有貨返，哈哈！

唔知點解今日突然間好想食韓國燒烤加泰國嘢加Pizza，哈哈！

啲頭髮一長番少少就好難打理，又好肉酸，搞到個人又柒晒，本來諗住放工幫湯米去 HMV 搵下有冇關淑怡隻新碟，跟住就去剪髮，但係點知放咗工落到樓下，行咗一陣，發覺有個人跟住行我隔離，原來係湯米，好意外喎，因為佢應該喺城大聽緊 Seminar 架，原來佢偷走咗出嚟，佢搵過好多唱片鋪都買唔到關淑怡隻碟，就過咗嚟搵我，最後佢打去 HMV 問有冇貨，最初人哋話冇架，但最後又話有叫佢可以今日去拎，因為佢之前上網訂咗，就係咁我就陪佢去皇室堡 HMV 度攞碟喇，所以冇去到剪髮！

星期六去朗豪坊，去到四樓，見到有一堆人圍住一啲嘢，原來係之前喺報紙介紹過嘅玻璃屋，四個外國男人喺間屋入面住三個禮拜，所有喺屋入面做嘅嘢都俾途人見晒，食完飯走時咁啱有個男人準備沖涼，當時好多人圍觀，當然我都唔例外啦，但係都冇嘢睇嘅，有啲人一路睇一路喺度話有咩好睇呀，車，沖涼都好睇，但佢哋都係喺度睇，香港人幾八卦同好奇呢，我都係！哈哈！

乜我著啲衫著到我個人好老咩，同埋原來著厚衫都遮唔到個肚腩，哈哈！

今晚去探阿"女麻"，又好耐冇去探佢喇，佢精神好好呀，哈哈！

由尋晚兩點瞓到今日下午四點半，足足係瞓咗十四個半鐘呀，中間冇醒過，勁呀，嗰種自然瞓醒嘅感覺實在太美好喇，令人覺得好滿足呢？哈哈哈哈！

下個月要找萬幾蚊咭數呀．．．  我係咪真係大使成咁呀．．．  但係睇番張月結單，又真係有數得計架喎，為咗要儲錢同慳錢，由上個禮拜開始，我自己整咗個表，計晒我每日用咗幾多錢，希望可以警惕自己唔好用咁多錢啦！今日因為冇出街，所以今日冇用到錢，好嘢！

今日終於睇咗平井堅隻 Single MV DVD，最鐘意係 "輕閉眼睛"、"在思緒重叠之前．．．"同埋"POP STAR"，好好聽架，重有平井堅係 "POP STAR" 個 MV 入面有好多個形象架，重跳埋舞添，好搞笑架．．．哈哈

睇完平井堅啲 MV，覺得平井堅同陳啟泰，同埋 SOLOR 兩兄弟好似樣呀！

頭先睇名曲滿天星，先知原來陳敏之係小室個徒弟嚟架喎！！！

今日湯米打過嚟，傾咗一陣，大家都有啲共識喇！

今日起身覺得好凍，好似仲凍過之前兩日咁，天文台又話今日開始會暖番啲，呃人！

陳慧琳話陳慧蘭生咗個女喇，知道佢由下午一點痛到夜晚九點先生得，做人媽媽真係偉大呀，咁宜家佢咪可以唔使喺醫院過聖誕囉！

湯米今朝打俾我，喺電話度聽到佢喊我都唔知點算，個心好酸，差啲搞到我都喊，但最後都忍到！

放工搭船去尖咀搵 Trevor，當我去到尖咀打俾佢，打咗三次都冇人聽，心諗咁點好呢？最後去咗 HMV 行咗一陣，最後打第四次先有人聽，唉，真係差啲想返屋企架喇！佢話行落去旺角，佢又行得快喎，搞到我成日都跟唔到佢，我行到超攰，最後去咗朗豪坊八樓食泰國嘢，個環境同嘢食都幾好呀，但係啲服務就差咗啲，啲人好似好悔氣咁！食完飯去咗無印睇下有咩啱買嚟做除夕 Party 的禮物，大概都睇中咗啲，但係未有買到，再睇定啲先！

返屋企時好麻煩，諗住搭巴士，但係 Trevor 話可能會塞車喎，咁我就聽佢講，係聽佢講搭地鐵，諗住過咗海再喺金鐘轉巴士，但係去到金鐘先知金鐘出面都封咗路，冇巴士可以搭，當時個心諗早知搭西隧啲巴士啦，個心係喺度埋怨同咀咒緊個死仔 Trevor，最後要入番閘搭地鐵去上環轉巴士返屋企，原本只需要四個字至半個鐘的路程，宜家用咗一個鐘先返到屋企！

返到屋企睇新聞，見到啲南韓農民同警察發生衝突，一方面覺得佢哋好慘，世貿的決策令到佢哋的生計有問題，但另一方面又覺得佢哋好野蠻！仲有啲警察一方面用胡椒嘖霧嘖啲示威人仕，另一方面又用水炮射佢哋，咁樣咪即係幫佢哋洗走啲胡椒？？？真奇怪！

尋晚瞓得好差，瞓咗落床成個鐘先瞓得著，好耐都未試過咁喇，夜晚又醒咗兩次，第一次醒係兩點，以為係自己個電話響，但原來係幻覺，第二次就係四點幾，俾媽咪嘈醒，所以今日返工都好冇精神！

今日好似凍過尋日，返到公司仲凍，唔知點解淨係我同問米婆個位先咁凍，打字時凍到我啲手指都硬晒，好慘！我個位一係就焗到抖唔到氣，一係就好似宜家咁凍到傻，究竟有冇人嚟整番部冷氣架？！

今朝湯米七點九打過嚟，但係我做緊嘢，所以冇聽到，之後十點九湯米再打嚟問我朝早有冇打俾佢，因為佢見到有個2815 開頭嘅電話搵佢，我話冇，跟住佢問我有冇嘢講，跟住我話冇就收咗線！

今日偉哥話我有張票走咗雞，係Post-Dated 嚟架，仲要係十二月二十號添，唔知最後點呢？？？！！！但唔係好明佢話張票係十二月三號，咁即係今日先發覺做錯嘢？？？

尋日做Gym，去到嘅時候有個女仔行埋嚟同我做問卷，仲以為佢問我覺得佢哋啲服務點，原來最後又係推銷啲健康產品，嘥晒我啲時間呀！到走的時候，個職員話宜家有個新優惠，就係宜家我只要帶多個朋友嚟Join，咁兩個人就可以用$2300 玩一年喇，計落都幾抵喎，一個月都係二百蚊度！

尋日夜晚個頭好痛，今日就輪到個胃抽住抽住咁痛，咩事呀呀呀！！！

今日陳慧琳話陳慧蘭好似生得喇，如果係真佢咪可以如願以償，唔使喺醫院過聖誕啦！