今日突然記起今個月到期要交稅，差啲唔記得添！仲有今個月一定要記得準時找咭數！

今日如果唔係阿琳問我收到孫燕姿啲飛未，我都醒唔起佢用我張信用咭訂咗飛添，哈哈！

放工去做 Gym，出奇地少人喎，今日係咩日子呀？又唔係跑馬吖！

今日 1467 鬧 0615 睇錯票，好似話佢個客個簽名應該係英文，但係張票個簽名係中文，0615 都照 Pass，1467 話佢都唔知有冇睇，拍咁快有鬼用咩！呵呵呵呵！！！

今個禮拜好似過得超慢咁，今日先係星期四咋！

今日打電話訂飛竟然輸咗俾湯米，湯米九點零五分就打得通訂到飛 lu！

今日睇票睇錯咗四張票，做 Direct Debit 嗰時寫 Credit Advice 竟然仲係寫番零五年，仲要寫錯咗十二張添呀．．．我諗我今日一定係冇帶腦返工．．．哈哈．．．仲要係寄晒出街俾客先發覺寫錯咗個日期，救都救唔番！

放工返咗屋企，瞓咗兩個幾鐘，今日個頭有啲痛，唔通感冒未清？？！！但係瞓醒覺又好似好番啲！

今日食完晏去食龜令膏，竟然加咗價喎，仲要一加加兩蚊咁多添！但係食咗又真係好似冇咁熱氣，貴咗都照食啦！

今日睇紀曉嵐，做妹仔個杏兒好似阿琳喎．．．哈哈

今日返工都幾精神，因為尋晚都瞓得幾好，今日知道上個禮拜六佢哋 OT 到五點幾，一來多票，二來原來係有個 Cheap 精擺晒 Officer 款，又 Cap 得少票，做退票時又同個老嘢係度唔知做乜，咩都唔做，哈．．．Perman 話上個星期六十一點我放咗工之後個 Cheap 精就除咗個口罩，又喺度散播病菌，好心佢啦，有病就戴番個口罩，唔好去傳染人啦，一啲衞生常識都冇，見我戴口罩佢又跟住戴，正一跟尾狗！

放工去做 Gym，好似好多人咁，原來我個 Plan 冇加到價喎，仲可以去邊間分店都得添！

今日本招職同 Recruit 好薄喎，都冇乜工咁，點算呀！！！

唔知聽日係我訂到飛先定係湯米訂到飛先呢？我唔可以輸架！

今日瞓到三點幾，起身之後上網 msn，搵下工，跟住有人嚟整熱水爐，咁我又走番入房瞓覺喇，今日好似乜都冇做過咁，哈哈，咁就放完假喇，聽日又要返工喇！

今日收到 Raymond 個 msg，佢話 ZARA 今日開始減價喇，叫我得閒去睇吓有咩買，um．．．有咩想買呢？？？

希望新一年過得充實啲，零五年的確係唔開心的一年，期望零六年係開心的！

零六年第一次寫日記，希望每個人每一日都開心，身體健康，心想事成！但係今日對於我嚟講好似唔係一個好開始，因為屋企個熱水爐壞咗，洗手洗頭洗面都要用凍水，只係煲咗兩煲水去沖涼，救命呀！！！

尋日星期六要返六點，好唔夠瞓，好在放十一點，放工之後一個人去食早餐，由上環行到落金鐘 HMV 睇碟，睇睇下唔知時間，到湯米打俾我先知差唔多十二點半喇，之後拿拿聲搭車落灣仔等佢放工，之後去咗食齋，但係啲齋好難食，啲齋好油，啲鮮竹卷好凍，咦．．．

食咗晏之後去 188 行咗一陣跟住湯米話怕我攰，所以去咗遊巴士河，搭咗架車去小西灣，去到藍灣半島，嗰度應該係港島嘅最東面，個景好靚架，海旁望到對面將軍澳架，喺海邊吹住海風曬住太陽好舒服架！去杏花樓食咗碗好似水嘅綠豆沙，哈哈，跟住就搭巴士過淘大喇，但係原來架巴士係唔經淘大架喎，架巴士去完牛頭角就去咗九龍灣工業區再去牛池灣，結果要搭地鐵返轉頭！哈！

尋晚去咗湯米家姐屋企度瞓，所以冇去到街度倒數，喺屋企睇電視食大家樂，十點幾十一點就瞓咗喇，好平靜！尋晚發咗個夢，夢見自己不斷俾人追，自己就不停咁跑落樓梯，條樓梯跑極都跑唔完，俾一個人追完，又俾另一個人追，個夢好得人驚！唔知有冇人識解夢呢？

今日瞓吓又起吓身，尋晚好似瞓得好差咁，成晚都有啲朋友 SEND MSG 嚟祝新年快樂，自己又唔記得校番做振機喎，今朝又五點半醒咗，好憎！

近日條街成日都好多人，啲人成日都行路唔帶眼，成日都俾人撞到，好鬼討厭！