七月八日，星期六，今日又係去咗淺水灣曬太陽，但係今日比較多雲，冇乜太陽，有啲風，感覺有啲涼，差啲喺沙灘瞓著咗，好舒服呀！之後就同湯米去食飯，我講笑話不如去番哥登堡食啦，跟住湯米又話好喎，所以我哋連續兩日都係去呢間餐廳食飯！

七月九日，星期日，去咗做 Gym，跟住同湯米去咗 Neway 唱 K，又有 Buffet 食，輕輕鬆鬆又一個週末！

七月十日，星期一，今日個個都晏返，但係老細就八點九返到，每日都係做相同嘅嘢，唔知到幾時我會覺得悶呢？放工去咗剪髮同做 Facial，阿 Tik 竟然冇做喎，我咁難得先搵到個人我覺得係剪得好，同埋係剪得細心，點解佢要唔做呀，我仲冇佢個電話添，咦！！！搵咗個新女仔幫我剪，求求其其，又剪得唔好，見到剪完個頭真係好想喊呀，好唔開心呀！！！

七月十一日，星期二，今日 Ada 請病假，Jessica 叫我喺 Reception 頂住一陣，睇住啲同事嚟上堂簽到，第一次坐喺 Reception，感覺好得意，啲同事行過都問我點解會坐喺度，哈哈，今日放工同湯米去做尖，之前去咗南記食嘢，好飽呀！

七月十二日，星期三，今日個男 Partner SL，難得一日咁自在，真係好呀，佢唔喺度反而覺得輕鬆咗，今日有新嘢學，就係幫啲 Manager 執番 Materials 啲 Format 同埋啲 Wording，執咗我大半日！今日聽到 Heidi 話上大陸搞一個一個星期嘅 Course 要成千萬，使唔使呀，咁貴！

七月十三日，星期四，今日放咗工去做 Gym，一個人，悶悶哋，但係做 Gym 要有恆心架嘛，唔可以去吓又唔去！今日因為夜晚有 Summer Lecture，要留低一陣做 Stand by，所以遲咗少少先走！

七月二日，星期日，呢日又好好天喎，所以我就同湯米去咗淺水灣曬太陽喇，好熱呀，曬咗兩個鐘度就送湯米返屋企喇，然後我再過番銅鑼灣 Join 朋友食飯，約咗七點喺印尼餐廳食，但係我到達間餐廳時已經係七點三喇，但係竟然係一個人都冇，咁啱我又冇帶電話喎，我又唔記得佢哋啲電話，點算好呢？！最後佢哋都嚟喇，連好耐冇見嘅何嘉喬都有嚟，終於可以齊人一齊食餐飯喇，原來何嘉喬之前失蹤係因為失戀，Gloria 問完佢之後都唔敢再出聲喇，阿單話佢終於搵到工喇，唔知係咪因為我哋個個都有工返，而令到今晚嘅 Raymond 有啲 Down，因為佢今晚都係冇乜點出聲！

七月三日，星期一，返工放工，無驚無險又一日，冇嘢值得寫喎！

七月四日，星期二，其實今朝起身覺得心情好差，但係唔知點解架喎，好唔想返工，好辛苦先捱到放工，之後同湯米去街，佢陪我去 Poly 交 Form，跟住就去咗元綠食嘢，再去百利行吓，湯米又買到兩條西褲，幾好睇吖！跟住湯米就同我搭 973 返屋企喇！今日係 Janet 生日，夜晚 Send 咗個 sms 俾佢！好在冇唔記得，哈哈！

七月五號，星期三，今朝有 Course 喺中環搞，我要去做 Support，所以今朝唔使返公司住，好 Free 呀！哈！之後返到公司就忙住準備之後要運上廈門做 Training Course 用嘅 Materials，好多文具要 Pack，乜大陸冇文具架咩，香港啲 Cost 又貴，又要運費，都唔化算！放咗工之後就去買禮物，買咗隻錶，好嘢，之後就去中環同 Flora & Shelley 食飯，去咗萬宜大廈間藏人食日本嘢，都幾好食吖，同舊老細傾咗好多嘢，又問咗佢哋一啲進修嘅意見，到十點幾就散喇，今日心情比尋日好好多呀，Good Day！

七月六日，星期四，今日 Lunch 同 Rachel、Toni 同埋 Judy 去咗沙爹城食，四個人叫咗好多嘢食，好飽呀！放咗工就返屋企喇，而湯米亦如常逢星期四去打波！

七月七日，星期五，拍拖一週年紀念，今日返工都冇咩特別，但係公司就因應星期日零晨世界盃決賽而出咗個 e-mail，話每個同事星期一可以實行彈性上班時間，但係我唔需要吖，因為我都唔睇波嘅！放工同湯米去咗土瓜灣一間叫哥登堡嘅餐廳食飯，超抵食呀，又好味，我哋交換咗禮物，大家都係送錶俾大家！又會咁啱嘅，哈哈，我好鐘意份禮物呀！多謝，同埋你送俾我張咭好有心思呢，講番呢一年發生嘅事，我好鐘意呀！記得零五年真係一年唔開心嘅一年，但係時間過得好快，咁就一年喇！

六月廿六日，星期一，夜晚約咗 Raymond 去食飯，當係同佢慶祝番生日，但係都足足遲咗成兩個月喇，哈哈，去咗笑笑食，啲嘢食好快就嚟晒，而我哋又好快又食完，跟住本來諗住去食雪糕，但係最後去咗 union 飲嘢，飲到差唔多十一點度就走喇！知道佢要去北京同上海做嘢，仲要去成兩個月添，冇得睇王力宏演唱會喇，但係加油啦，其實我都好想去第二度做嘢架！

六月廿七日，星期二，今日好似好忙咁，係咁做係咁做，下晝 Jessica 叫我如果整好個 Stationary List 就俾佢，但係點知佢仲話要埋 Print Room 同 Store Room 個 List，搞到我臨急又要整過！夜晚去咗銅鑼灣泰簡單食飯，有 Janet、Gloria、Sammi、Larry同埋Nicholas，我哋都差不多成半年冇見喇，佢哋話好耐都未見過我著恤衫西褲，好斯文喎，哈哈！呢晚我都冇乜出聲，佢哋講咩我都冇意慾去搭咀咁，全晚都好靜，佢哋問我做咩，我話冇嘢呀，其實我只係覺得好攰，所以唔係咁想講嘢，唔知點解每次食泰國嘢都好快就食完，跟住就坐喺度傾偈，到人哋收我哋啲碗碟，好似趕我哋走我哋先走！十點幾就走喇！

六月廿八日，星期三，返工又係咁，又係好多嘢做，但係做啲嘢好濕碎，做完晒啲嘢都唔知做過啲咩嚟，放工約咗阿琳、問米婆、大雄同阿 Joe 去咗朗豪坊食泰蘭花，係！又係泰國嘢！同阿 Joe 補祝生日，因為六點幾就開始食，所以唔係好多人，同埋好快就食完喇，啲嘢食好似冇以前咁好食咁，同埋以前個餐牌好似多啲嘢食架，周大雄每次食飯都會講到公司啲不平事，同埋成日都會講好多道理，好似一個老豆教仔女做人嘅道理咁，我哋五個人當中，阿 Joe 同我都已經離開咗永亨喇，有時聽番佢哋講啲嘢，反應都好似仲慢咗咁，要諗吓佢哋講緊邊個，雖然宜家唔係一齊做嘢，但係希望我哋唔會因此而生疏啦！

六月廿九日，星期四，今日係 Carmen 生日，但係我唔記得打俾佢同佢講生日快樂，真係冇記性！Lunch 同 Gloria 去咗甜蜜蜜食，啲服務真係唔得呀，又漏單，啲嘢又上得慢，杯凍檸水又唔記得落糖漿，佢收得呢個價錢個服務應該好啲啦！今日放咗工返屋企食飯，原來已經成個禮拜冇返過屋企食！

六月三十日，星期五，因為下星期有 Course 喺出面上堂，所以要將啲 Materials 入箱，以為好快就可以搞掂，但係都用咗我成朝時間！放工同湯米去咗奥海城睇“球愛可人兒”，去睇係因為之前睇啲影評都讚呢部戲，睇完之後又真係幾好睇，雖然個故仔係老土啲，但係個女主角超搞笑，同埋啲男主角又超型，好典型嘅青春喜劇！睇完戲去咗食韓國嘢，食咗個石頭飯，好好食架，又大碗，又熱辣辣，又唔貴，真係唔錯架！

七月一號，星期六，今晚約咗 Tommy、Mandy、Jennifer 同埋 mimi 去 City 食自助餐，係佢哋話要同湯米補祝番生日，去之前湯米隌我去 Poly 攞讀書啲資料，但係都冇嘅，去到 City，個帶位話冇我哋訂枱個紀錄喎，但係佢都特登開張枱俾我哋，呢度都算多嘢食啦，同埋都幾好食，但係啲甜品就麻麻，之後我哋去咗 PageOne，一路行一路諗去邊度飲嘢，但係最尾都只係去咗 Pacific Coffee，五個人去到仲要只係坐喺度，又唔買嘢飲，佢哋就喺度搵嘢玩，但係又唔識點玩，而我就喺度睇雜誌同上吓網，講真都幾無聊！Hea 到十一點幾就走喇！

六月廿四日，星期六，下晝同湯米去咗淺水灣曬太陽，嘩！好猛太陽呀，晒完太陽之後就搭車去咗佐敦食飯，食完飯諗住去電影中心睇番“我生涯中最美的一周”！但係太夜先做喇，仲要做兩個鐘，所以冇睇到，反而去咗朗豪坊睇小孩不笨 2，毫無期望咁入去戲院睇，但係竟然有意想不到的效果，除咗有啲搞笑之外，仲有啲感動位，比較深刻嘅場面就有個老豆知道個細仔去偷錢，跟住打佢，但係原來個細仔去偷錢，目的就係想買爸爸嘅一個鐘頭時間去睇自己做話劇，呢一幕真係幾感動，仲有 Ending 時話垃圾放在啱嘅地方，就係資源，而資源放咗喺錯嘅地方，亦會變做垃圾，同埋好同意套戲所帶出嚟嘅訊息，就係多啲用自己嘅姆指去稱讚別人，少啲去批評同不滿！

六月廿五日，星期日，朝早十一點就起身喇，因為約咗阿單、Gloria 同埋 Raymond 去飲茶，我哋去咗上環好彩，都冇乜人，仲要大部係枱都係啲公公同婆婆，點會有後生仔女咁早星期日去飲茶吖，飲完茶之後入咗去海怡半島，上咗去 Gloria 屋企度 Hea，我哋喺度玩 UNO，玩啤牌，跟住阿單個女朋友上嚟 Join 我哋，之後夜晚就去咗銅鑼灣食韓燒，佢哋不斷咁問我有冇拍拖，點解咁大個人仲未有女朋友，又問我有咩理想對象，想識一個點樣嘅女仔，仲問使唔使介紹啲女仔俾我識，超煩呀！

六月廿一日，星期三，係湯米同埋媽咪生日嘅日子，今日一早打俾湯米同佢講生日快樂，講咗啲祝賀嘅說話，但係其實我只係想你身體健康！知冇？！食晏時去攞蛋糕，跟住搭車去搵湯米，去到佢 Office 出面打俾佢，佢竟然唔信我喺佢公司出面喎，跟住佢見到我喺出面，佢先信咋，送咗個蛋糕俾佢我就返去喇，好嘢，今次仲唔俾到個驚喜你！！！放工要見保險 Agent，攞番份 policy，湯米放咗工喺度等我，佢同佢啲同事食咗一啲蛋糕，留番啲話要同我食，咁我就同佢去咗 PP3 個平台度食喇，點知俾個 Agent 點咗相添，因為今晚要同媽咪食飯，所以食完蛋糕就返屋企喇！而夜晚就送咗件披肩俾媽咪！佢又係冇乜反應，究竟佢鐘唔鐘意架？

六月廿二日，星期四，今日返工都冇咩特別嘢，無驚無險又一日，湯米今晚要去打波，而我放咗工就返屋企喇！

六月廿三號，星期五，今朝個 Training Course 又要同北京做 Video Conference，所以又有個機會見到 Marco 喇，哈哈，今日幫 Jessica 整番個 List，Locate 番每種文具放咗喺邊度，臨放工 Set 埋房都六點喇，跟住去咗 Times Square 小南國同舊同事食飯，有 Karen、Nick同埋 Shelley，我哋都係講番大家嘅近況，佢哋個個都好忙呀，阿 Nick 啱啱去完美國出 Trip，仲啱啱病完一排，成個人落晒型！Shelley 就要飛去上海做 Training，而 Karen 都好多嘢做，成日 OT！原本 Book 咗七點，跟住要八點半交番張枱出嚟，但係我哋臨八點半再叫過嘢食，但係個女侍應話唔得喎，要八點半交番張枱，跟住我哋話乜唔俾人再叫嘢食架？！跟住個女人就好唔願意咁問我哋想食咩呀？？？哈哈，激到佢跳起呀！食完飯 Shelly 仲有下場，要走先，阿 Nick、Karen 同我就去咗 Haagen-Dazs 食雪糕，仲要係 Karen 請，哈哈！多謝！