尋晚睇叱吒睇到點幾
今朝真係唔想起身
呢啲天氣好適合冬眠
返到公司一路做
做做做，一路做到放工
感覺幾好，好充實
今晚咩都冇做過
咩都唔想做
好眼瞓呢... 要瞓番八個鐘

今日十一點幾起身
做功課
終於都寫咗一千八百字
仲有一千字要寫
夜晚同湯米一齊去曬燈
要記住密碼係 2879 喇 

今日又被睡魔纏住，十二點才起床，又是這樣浪費了時間，今日下午做功課沒什麼進展，好多資料，但是個腦好實，諗唔到應該點寫，究竟應該點寫 Collective bargaining 呀！唉！夜晚同湯米去咗做 Facial，我就順便剪埋頭髮，Bowie 竟然以為我叫 Jason，乜我似 Jason 咩？去 Bowie 度做 Facial 真係幾舒服同 Relax 架，一路做 Facial 一路傾吓偈，呼！雖然有時整暗瘡時會好痛，但係清潔完感覺真係好 Fresh 架！

剪完髮同湯米去咗銅鑼灣茶軒食飯，食食吓隔離對男女食煙，好臭，都唔知個樣衰肥仔識唔識食煙，拎住支煙仲多過食，一食又咳喎，食得咁辛苦唔好食啦！唔知係個 Waiter 俾錯咗吸煙區嘅枱我哋坐，定係佢哋喺非吸煙區食煙，妖！好快咁食完碗貢丸米粉就走喇！

之後上咗去 JP 睇 007，好好睇喎，個男主角都唔係好似啲報紙講到咁醜樣，我反而覺得佢好型，喺地盤同機場呢兩場戲好刺激呀！一啲悶場都冇！好睇過傷城！

06 年就快過去了
每年到了這個時候
我都會想一想
今年過得好嗎？
今年也不差吧
開心的事比不開心的多

如常地
今年的這個時候也希望為明年定下一些目標
和許下一些願望
希望在新一年能夠做到的事有很多
希望明年身體更加健康，不要時常病，雖然小病是福
希望工作上有更好的發展，小人遠離我
希望更懂得去珍惜身邊關心我的人，有你啦、你啦、你、你、你同你．．．
希望睡魔遠離我，令我可以瞓少啲，多啲時間做其他事
希望臉上的暗瘡可以離我而去
希望夏天可以早點來，可以曬得黑黑的
希望可以學識跳 BS(1) 同 BC(1)
希望可以冇咗個肚腩
希望每日起身都唔會眼腫面腫
希望可以報到 YMCA 成人游泳班
希望每日都哈哈笑
希望唔會再面紅
希望講多啲嘢，唔再怕羞，雖然好難
希望儲錢，多多少少都好
希望改善遲到的習慣
希望發少啲脾氣
希望 Mariah、憶蓮、Gigi、一峰同安室可以喺香港開 Concerts
希望以上的目標同願望都可以逹到同達成

尋晚叫咗湯米今朝十點叫我起身做功課，但係我又爛瞓，湯米打咗幾次嚟我都唔願起身聽電話，最後十二點先起身，食吓嘢、上吓網同做功課，到宜家只係寫咗一千字咋，仲有千五至二千字未寫，擔心ing！

今日湯米去咗剪髮，我覺得幾好睇呀，成個人後生咗！今日唔知點解湯米好似有啲唔開心咁，有時仲黑面添，行街時又行喺人後面，唔知係咪因為頭痛所以咁？！

今晚去咗 Pizza Hut 食飯，去咗旺角雅蘭隔離新開嗰間，地方好新好大，啲 Staff 好有禮貌呀，要俾十個讚，例如我話冷氣好凍，就即刻幫我較細個冷氣，之後仲特登話俾我聽已經較細咗，又話如果覺得焗可以隨時話俾佢知，Pizza 到時又問使唔使幫我哋上碟，又主動斟水，埋單時又請我哋 Check 單，又講唔該，又講多謝，其實以上嘅嘢係做服務性行業應有嘅態度，但係宜家已經好少見喇！

今晚去咗奧海城睇 The Holiday，中文名叫綠份精華遊，係一套愛情喜劇，由 Cameron Diaz、Kate Winslet、Jude Law 同 Jack Black 主演，故事講 Kate Winslet 愛上咗一個將會和另一個女人結婚的男人，Cameron Diaz 發現同居的男友同第二個女人上床。佢哋兩個都因為咁而交換居所去過聖誕節，離開傷心地，Kate Winslet 搬到美國加州，去住 Cameron Diaz 的豪華大屋，而 Cameron Diaz 就走到冬天落雪的英倫小鎮，住喺 Kate Winslet 的小屋。Cameron Diaz 愛上咗 Kate Winslet 嘅哥哥 Jude Law，Jude Law 係一個身兼母職照顧兩個女嘅好爸爸兼編輯，Kate Winslet 就同電影配樂師 Jack Black 發展戀情！

呢套戲好啱呢個時候睇，因為套戲都係講聖誔至除夕呢個 timing，睇完呢套戲覺得好溫暖，有啲位好 touching，最鐘意就係 Cameron Diaz、Jude Law 同佢兩個女瞓喺兩個女嘅帳篷入面傾偈嗰幕，好溫馨，好 sweet！

湯米話套戲七點半做，但原來係七點三開場，睇唔到開頭，有啲感覺唔完整！
Jude Law 真係好型，好型呀！
Cameron Diaz 有啲老，好多魚尾紋！
Kate Winslet 好多內心戲，同埋瘦咗好多！
兩個女主角到最尾一幕先有機會一齊出鏡，但都唔算係有對手戲，唔知係咪驚 Cameron Diaz 會俾 Kate Winslet 比下去呢？

臨返屋企前同湯米去咗食糖水，好好味！