今日瞓咗足足十二個鐘，好耐都未試過瞓咁耐喇，天氣咁凍，最舒服就係瞓喺張暖笠笠嘅被入面架喇！湯米一點打電話嚟叫醒我，跟住同我一齊去曬燈，曬完燈去咗老麥食 Shake Shake 薯條，今次兩隻味都幾好食喎！之後去咗做 Gym，但係好似冇乜力咁，唔多想做，走嗰陣見到 Gary 喎，做完 Gym 本來想去睇衫，但係銅鑼灣好多人，見咁多人又唔係咁想睇，過咗去灣仔食元氣，跟住就去食雪糕，然後就返屋企喇！

超耐冇寫日記喇，再唔寫啲朋友可能會以為我死咗，係時係寫吓呢排嘅近況喇！

之前都係忙做功課，終於喺啱啱過咗嘅星期三交咗喇，暫時可以鬆一口氣，但係一月八號要考試，十一號又要交第二份功課，我諗呢個聖誕節都要用嚟做功課架喇，希望唔好又嘥咗幾日假期啦！話咁快就讀完第一個 Semester，時間真係過得快，一月尾就係 Semester 2 嘅開始喇，希望下個 Semester 啲時間可以分配得好啲，過得順順利利就好喇！

呢排返工好忙，每日都做唔停，啲嘢做嚟做去都做唔完，update 啲 training records update 到人都癲，又要 check 同事嘅 absent 原因，又要對醫生紙，一個 course 百幾人，竟然有六十幾人 absent，仲要 update 啲 CPD hours，又要幫啲同事 swap 啲 training schedule，唉！上個星期仲恐怖，星期六下晝起身刷牙，突然記起好似做漏嘢，即刻衝落街飛的返公司，嗰時真係好驚，好在最後發現只係自己嚇自己，要做嘅嘢仲未到 deadline！十萬個驚！

呢幾日突然間好想放假去旅行，但係我諗最快都要等到出年暑假先有時間去喇，仲要等好耐呢！！！

呢幾日好凍，好想買衫呀，一到咗冬天我就唔識著衫，襯嚟襯去都唔知著乜好，好煩！

今日同 Gloria、Raymond 同埋何嘉喬入咗去科大，因為同阿單影畢業相，今日唔知點解隻右眼又腫番，好樣衰，去到科大，第一個感覺係好大，好靚，背山面海，望住個海好舒服，見到好多人喺度影畢業相，有屋企人，有朋友，好開心，好可惜自己冇讀過大學，雖然宜家讀番個 Part-time Degree，但係我諗同 Full-time 喺大學讀三年或者四年係完全兩件事，至少我已經唔可以試吓大學生的生活係點，都算係一種遺憾，以前讀書就想快啲出嚟做嘢，宜家就想返去讀書，見到公司新請啲 Accountants，個個都係八三八四年出世，會覺得自己好老！其實真係唔細喇，廿六歲，要成熟啲！

之後同湯米去睇 Eating Out 2，一套笑片，完全係笑完就算，睇完食咗啲嘢就返屋企喇，一個星期只係放一個星期日真係好似冇放過假，好似冇抖過咁！

今日要返工，第一次星期六要返工，因為有同事返嚟考 Mock Exam，所以我要返公司監考，都幾悶吓，好在我帶咗啲功課返公司做，睇咗個 Case，好在都冇晒到啲時間！

好在有湯米陪我食晏，如果唔係就要同個同事食，實悶死我！同湯米去咗喜喜食燒味飯，好好食呀！

放工去電影中心睇戲，叫 Boy Culture，故事講個男主角鐘意自己個花弗 Roommate，到最後大家終於都走埋一齊，都算係一套愛情小品嚟架！跟住去尖咀行咗一陣就走去搭船過海喇，中環天星碼頭用埋今晚就唔再用喇，見到好多人喺尖咀個碼頭影相，又影啲船，其實又唔係天星小輪執笠，使唔使咁誇呀，第時用新碼頭都係用番呢啲船架啦，同埋又唔係拆尖咀個碼頭，都唔明啲人影嚟做咩！？奇怪！

今日放工約咗 Sunny 食飯，今日瞓醒隻右眼腫咗，可能係尋晚捽眼之故，所以去食飯之前自己走咗去睇醫生先，又係發炎，第一次要搽藥膏入隻眼度，嘩，好得人驚！

今晚同 Sunny 去咗小城之味度食，原來呢間鋪做到月中就結業喇，因為租約期滿，有啲可惜，因為呢度個小食拼盆同埋個瑤柱蛋白炒飯係好好食架！Sunny 送咗個袋俾我呀，係 Porter 嚟架，係 Sunny 專登叫佢同事喺日本買返嚟，多謝晒，我好鐘意呀！但係其實唔使買咁貴嘅生日禮物俾我架！

食完飯之後行咗銅鑼灣一陣，行咗一陣就好攰喇，大家第二日都要返工，所以就返屋企喇！