六月二十日，星期二，返工開始識得自己搵嘢做喇，唔使再問人有咩俾我做，今日 Canon 有人嚟教用影印機，聽咗個人講部機有好多 Functions，好似好複雜，差不多上咗成個半鐘，又要教點 Scan documents，又要教點用 Mail Box，聽完有啲 Functions 都係唔係好知點用！晏晝食飯時去咗訂生日蛋糕，原來莊士敦道間東海堂執咗喎，搞到我白行一趟，要走番去美心訂，而今日放咗工就去咗同湯米提早一日慶祝生日，去咗食巴西燒烤，喺維園泳池隔離，間餐廳好有啲度假營 Feel 架，但係好似好舊咁，又唔係咁多嘢食，同埋都唔係咁好食，食咗一陣就飽喇，好似唔係咁好氣氛咁，如果早啲訂到 Cafe One 就好啦，可惜打去訂時只係得番吸煙區，唉！送咗個公事包俾湯米，好在湯米都好鐘意，食完飯行咗一陣，本來諗住好似上年咁去影咭嘅，但係大家都好攰，最後都係返屋企喇！十一點幾就上床瞓喇，但係就較咗十二點鬧鐘響，因為要 Send sms 俾湯米祝佢生日快樂，搭正十二點 send 完就可以好安落咁去瞓喇！

六月十八日，星期日，呢日要返新 Office 執嘢，十一點返到公司，老細已經係度喇，到我拆自己個箱時，發現有人唔小心倒瀉咗杯奶茶入我個箱度，全部文件都係奶茶漬，好在冇擺自己啲嘢落去咋，跟住執吓執吓，四點鐘我就走先喇，因為夜晚約咗 Mandy、Jennifer、Emily同埋 Mimi 食飯，同 Mandy 慶祝生日，放咗工之後就去買禮物，好快就睇啱買咗個銀包喇，之後仲要去買父親節禮物，買咗條皮帶俾老豆，跟住仲要買埋媽咪嘅生日禮物，又係好快就睇中咗條類似絲巾或者披肩嘅嘢！短短個幾鐘就買齊晒啲禮物，真係好喇，從來都未試過咁有效率呀！同 Mandy 佢哋去咗 ucc 食飯，啲嘢食一般啦，傾咗個幾鐘跟住就走喇！食呢餐飯順便送番之前喺泰國買嗰份生日禮物俾 Emily！其實一路都冇時間見到佢，呢日見面先知佢原來喺佐敦開咗間鋪賣衫！搵日去撞吓佢先！呢晚肚痾，慘！

六月十九日，星期一，正式第一日返新公司，預早咗出門口，但係咁啱中環撞車喎，搞到有少少塞車，好在都冇遲到，呢日主要都係 unpack 番啲箱，執番好啲嘢，跟住有人嚟教點用 Training Room 啲 Equipment，同埋教點用 Video Conference，教我哋個人叫 Marco，好似林峰架，哈哈哈！呢日本來約咗阿琳佢哋食晚飯，但係陳慧琳病咗，所以取消咗，原來我哋真係俾人落咗詛咒，點算？！放咗工去咗買生日禮物俾湯米，因為一早就諗好買咩同埋去邊度買，所以好快就買咗喇！

六月十六號，星期五，最後一日喺永安中心返工，因為星期一就會搬去 PP3 喇，呢日全個部門啲人都係咁喺度執嘢，作最後衝刺，食晏全班同事去咗好彩飲茶，十九個人坐喺張大枱度，叫咗幾十碟點心，但係唔使半個鐘就食晒喇，勁呀，之後下晝都執到冇嘢好執喇，到五點度就同同事過去 PP3 睇吓個新 Office，嘩！好大呀！我好鐘意我個位呀！睇完 Office 之後就去番上環食飯，第一次同自己部門啲同事食 Dinner，因為為咗同一個升咗職嘅同事慶祝！我哋去咗一間私房菜度食飯，有啲同事打麻將，而我就同另外一啲同事唱 K，唱緊 K 時收到阿琳個 sms，約下星期一食飯同阿 Joe 慶祝生日，阿琳喺個 sms 度問我係米去咗沙漠做嘢，點解我好似音訊全無咁，哈哈！無奈！食食吓飯時覺得個鼻好唔舒服，好似作病咁，食完飯就即刻閃番屋企 lu！

六月十七號，星期六，真係病咗喇，又流鼻水，個喉嚨又痛，嫻姐下晝同湯米食晏，當係同湯米預祝生日，湯米下晝陪我去睇醫生，睇完醫生好似仲唔舒服咗，原本訂咗飛去睇“我生涯中最美的一週”，但係最後都冇去到，返咗屋企瞓覺，唉，真係冇鬼用！未過試用期睇醫生仲未有得 Claim 添！

<待續>

六月六日星期二，呢日係我喺永亨銀行返工嘅最後一日，呢日請咗部份同事食一啲小零食，算係我對佢哋嘅小小心意啦，食晏遲咗少少返去，因為去咗美心買西餅，湯米話臨走請番啲同事食嘢係禮貌嚟架！臨放工時有啲同事行埋嚟同我講再見，搞到我唔知點咁，好似有少少唔捨得，但係走咗之後呢種感覺好快就冇咗喇！阿琳同阿卿都送咗啲糖俾我，多謝晒！放工去做尖，做完尖返屋企食埋飯都好攰喇，真係好喇，一瞓落床就瞓著，幾驚諗嚟諗去瞓唔著呀！

六月七日星期三，第一日返新工，因為返八點半，所以可以七點先起身，實在太好喇，以前七點就要返到公司做嘢喇！終於都可以瞓夠先返工！八點三就返到公司，可惜 Office 入面一個人都冇，只係見到個茶水阿姐，佢叫寧姐，佢知道我今日會返工，所以佢帶咗我去我自己個位度坐，一路坐一路等，八點五仲未見有人返，到八點半，仲係一個人都冇，心諗，係咪返八點半架？！八點半過少少，聽到有人叫：「早晨，阿 Chris！」呢個就係同我一齊做嘢嘅男同事 Terence，第一日返工都冇咩做，但係就要做個 e-learning，仲要做第三次先 Pass，今日同一大班同事去食晏，好嘢，佢哋請！呢日係我同湯咪拍拖第十一個月嘅日子，我送咗支 Boots 嘅洗面 lotion 同埋一支係屋企偷出嚟嘅保心安油俾佢，哈哈，而湯米就送咗件恤衫同埋一啲文具俾我，佢話等我返新工用呀，好嘢！

六月八日，星期四，第二日返新工，又係好悶，成日都只係入吓 file，影吓印咁，其餘啲時間都係幫手執嘢準備搬 Office，食晏時個男同事同我講原來佢喺度己經做咗八年，中間有幾個月時間走過，跟住又俾人叫番返嚟做！嘩，做咗八年，真係唔係一個短時間，我只係諗住喺度做一至兩年架咋，哈哈！放工去做尖，跟住就返屋企喇！

六月九日，星期五，逢星期五可以著 Smart Casual 返工，真係好喇，今日又係執嘢執嘢同執嘢，好攰呀！今日放工時要 Set 埋 Training Room 先走得，所以遲咗少少走，今晚本來約咗 Karen 同埋 Shelley 食晚飯，但係因為朝早掛咗黑雨，所以 Karen 話取消喎，臨放工時湯米打嚟問我今晚個 Dinner Cancel 咗有冇飯食，咁跟住就變咗同湯米去食飯喇！本來諗住去食峰壽司，但係太多人喇，所以去咗壽司亭食，出奇地少人喎，食完嘢去食埋糖水就返屋喇！

六月十日，星期六，好嘢，以後星期六都唔使返工喇，又可以瞓晏啲喇，今日遲咗起身，湯米由觀塘過到嚟我都仲未換好衫，要佢等咗半個鐘，跟住見佢個樣有少少變臉，咁我就唔出聲喇，之後落咗銅鑼灣曬燈，跟住本來諗住去做尖，但係湯米突然間話唔去喇，好驚呀，佢嬲呀，原來佢嬲我冇氹番佢！跟住氹番湯米之後就去做尖喇，做完尖再去康怡睇海神號，冇我想像中咁好睇喎，交代人物關係好似唔係好夠！普通戲一套！

六月十一日，星期日，呢日瞓到好晏，跟住夜晚去咗天樂里 Neway 唱 K Buffet，啲嘢食都 OK 架喎，但係就唔係好識唱啲新歌，不經不覺唱到十點幾，跟住就走喇！

六月十二日，星期一，呢個星期可以全個禮拜都著便服，因為老細話咁樣方便搬嘢，今日都係執嘢，唉，啲嘢多到執極都執唔晒，啲文具多到嚇死人，今日個 supervisor 同埋個男同事下晝過去 PP3 睇吓新 Office，個男同事交低好多嘢俾我做，但係又唔講清楚點做，討厭！放咗工之後去做尖，今日係陳慧蘭生日，跟住 Send 咗個 sms 俾佢！

六月十三日，星期二，呢日返工又係執嘢，下晝個男同事同個 supervisor 又出咗去，又俾咗好多嘢我做，又係講得唔清唔楚，但係覺得佢哋唔係度都幾好，起碼唔使煩！

六月十四日，星期三，呢日全日都係執嘢，忙到傻，放咗工湯米陪我去試戴隱形眼鏡，試咗好耐先學識點戴，搞笑，跟住就去食飯，然後去 e-house 攞身份證，好多人呀，要等一陣，一睇張身份證，咦，比我想像中好喎，哈哈，攞完身份證就上去做尖喇！

六月十五日，星期四，今日個男同事教我用 Projector，連啲線點插都講埋，佢當我真係白痴，同埋佢教人個樣同啲語氣好乞人憎，我想死呀！頂佢！放工去咗剪髮同做 Facial，好 Relax 呀，又好舒服！跟住返屋企食飯！

<待續>

今日上咗 HR 做 Exit interview，其實都冇咩特別嘢想講，但係我好多個 Items 都剔咗 Below Satisfactory 同埋 Poor！跟住 HR 個人逐項問我點解，哈！今日個 Office 好嘈，唔知又做錯啲咩？今日 Katherine 送咗個水晶紙鎮（係咪咁打呢？？？）俾我，入面有隻飛馬，Katherine 話祝我馬到功成，叫我俾啲心機做新工喇！多謝！上個星期 Perman 送咗樣嘢俾我，我以為係開信刀嚟架，佢今日講我先知係書籤嚟，佢話要提醒我之後記得要再讀書呀，唔好轉到新工就放棄之前嘅計劃，好多謝你呀 Perman！好有心思！

今日放咗工返屋企換咗件衫就出去買書糕俾個舊同事，跟住去咗買咗啲嘢食，諗住聽日請啲同事食，我費事拎完返屋企聽日又拎返公司，所以叫阿琳幫我放住喺佢個位先！哈哈！之後就繼續去買我要買嘅嘢喇，著背心短褲同拖鞋係放工時間嘅中環行原來係好怪相，好樣衰添！之後去埋銀行轉埋數就返屋企喇！

阿琳呢排成日開口埋口都係低能同白痴，越嚟越惡呀，以前嘅陳慧琳唔見咗！