今晚打俾阿Nick，講到搵工啲嘢，佢話我太懶懶閒喇！佢話我應該要訂下一個方向，而呢個方向係要Long-term 嘅，而再因應自嘅方向去搵工，而喺未轉到工嘅時候，應該搵啲嘢學吓！阿Nick 佢講咗好多嘢，好多佢覺得係問題嘅問題，我都唔覺得係問題，我真係要認真考慮吓佢所講嘅嘢！

上星期六返六點，雖然早起身，但係都 OK 精神喎，無驚無險又到十點九放工喇，之後幫 Mabel 掟咗張票去 Citibank 度就去銅鑼灣買禮物喇！之後返緊屋企諗住放低啲嘢時，湯米打嚟話佢喺金鐘做完嘢走得喇，之後佢喺金鐘上咗我坐架巴士，陪我返屋企，佢喺我屋企樓下食完嘢，跟住陪我落上環，因為我約咗舊同事飲茶，我哋去咗西港城大舞台酒樓，喺嗰度見到鄧健泓呀，哈哈！呢次飲茶嘅目的係收利是，哈哈，好嘢，舊老細 Flora 仲帶埋佢個仔仔出嚟，好得意！大概三點幾就走喇，走時又見到樋口明日嘉喎，之後就去太古做 Gym 喇！其實要湯米喺度等我成兩個鐘，真係好唔好意思架，你對我真係好喇！

做完 Gym 去意粉屋食飯，開始覺得唔係好妥喇，不停流鼻水，個喉嚨又好痕，喺太古搭巴士去到上環再行路返屋企，返而行番屋企呢段路又冇乜嘢喎，仲幾舒服添！跟住返到屋企食咗兩粒傷風藥，諗住瞓一覺就會冇事，但係夜晚個喉嚨好痛，痛到我醒咗，成晚瞓吓醒吓，瞓得好差，星期日於頂唔順去咗睇醫生，唉！新正頭睇醫生真係大吉利是，但係百無禁忌啦！睇完醫生搭緊車返屋企時個姑娘打嚟話俾漏咗包藥我，頂，又要返轉頭攞！返到屋企食咗藥就瞓，今日仲請咗病假，呢兩日完全係瞓同食，瞓咗好多，宜家先叫做好番啲！

今日老細打嚟，話唔知咩每間行要搵兩個 Clerk Level 嘅同事做 Supporting Staff，話係 Clearing House 因應恐防禽流感爆發嘅安排！我都唔係好知佢講咩，唉！

今朝有間公司打嚟叫我今日下晝去見工,，上到間公司，好大又好靚呀，但係又係唔使填 Form，只係傾咗十分鐘度，之後做咗個 Excel Test 就走得喇，個 interviewer 都幾好人架，個 Post 係做有關 Payroll 啲嘢，但係好似我又唔係好啱佢哋用，份工又好似唔係好啱我做咁，哈哈！算啦！

其實今日本來去做尖架，但係因為突然間要見工，所以冇去到，湯米話屋企冇煮佢飯，所以夜晚同湯米去咗數碼港行咗一陣，哈哈，妤多人睇戲呀．．．之後出番嚟食完粥就返屋企喇！

今日湯米好似好唔舒服咁，見佢個樣好冇精神，又係唔肯去睇醫生，只係食咗啲傷風藥就算，見佢有厘精神，搞到我好擔心呀，唉，又唔知自己身體唔好！但係佢把口又死都話冇嘢！？你唔可以有事架，有事咁我點呀？！！！

今日Mabel 第一日正式返早，原來Mabel 睇票都好快架，今日個杭渠佬派利是俾我嗰陣話出年要輪到我派喇，頂，佢係我邊個呀！！！又關佢事！？？食完晏返到公司樓下見到有個著西裝嘅男人同我揮手，原來係阿琳個男朋友，差啲唔認得呀！搞笑！仲以為佢認錯人添！放工就返屋企喇，又執咗啲雜物，真乖仔呀！間屋又整齊啲喇！今日下晝打俾Sunny，同佢拜年，佢就好啦，仲放緊假，仲同Kenneth 上大陸住幾日添！好羡慕呀！！！

今日唔知點解好想Send Msg 俾湯米，仲一日Send 咗兩個添，佢話好耐都冇收到我啲Msg 喇，哈哈，梗係啦，Send 得多就唔值錢架喇！