已經記唔清楚呢次係我哋第幾次有爭拗了，係第六還是第七次？！以前鬧交都係因為 Sunny 嘅事，呢次終於唔關 Sunny 事喇，呢次係你覺得我冇以前咁關心你，同埋你覺得我對你的態度時好時壞，令你唔知我當你係甚麼！你每次講完你嘅感覺之後，我都唔知應該講咩好，每次你都會問我有冇嘢想講，但係我每次都只係靜咗唔出聲，有時我會反擊，但係今次我冇呀！每次都覺得自己好似一個犯人，俾你數盡所有的不是，而你對我的批評好似都係預先諗好的！聽完你對我的睇法，有時我會好嬲，有時我會好驚，有時我又會覺得失望，因為你講的全都是負面的，原來你對我，或者係我俾你嘅印象就係咁差，我真係一個咁差嘅男朋友嗎？我問自己，我對你有不好的地方嗎？有！我有發你脾氣嗎？有！但冇諗到會得到咁差嘅評價！
今日收咗線之後我諗，你講嘅嘢啱唔啱呢？其實你講得冇錯，我對你係冷淡咗，唔記得由邊一日開始，我已經冇咗一種會同你一生一世嘅感覺了，我覺得我哋有一日始終都係會分開的，你問我仲愛唔愛你，我答我愛，係真心的！但係同我哋一開始時比較，我對你嘅愛少了！以前覺得兩個人鬧完交之後，會了解對方多一些，但係宜家發覺喺加深對另一半嘅了解同時，憎恨亦會增加，以前我對你的愛有十分，鬧交之後，愛少了，可能九分的愛加一分的憎恨，宜家呢，只剩下七分的愛，而對你憎恨又多了，如果可以洗咗我哋唔開心的記憶，有幾好呢，可惜我哋都有回憶，我做唔到當冇發生過以前的事，我唔可以再變番做一張白紙再重新認識你，其實你都做唔到，冇比較，你又點會覺得我宜家變咗呢？你講過我同 Sunny 差唔多拍咗四年拖，冇鬧過一次大交根本呢個就係一個問題，但係短短幾個月鬧咁多次交又算係正常嗎？我都希望可以對你的愛會增加，但係時間未到，大家又嘈過，如果到一日，大家對大家的憎恨都大過愛，點算呢？我唔想去到呢個地步！
我的確係一個好情緒化的人，我朝早起身時可以好開心，但係夜晚時又可能會心情好差，好恐怖嗎？我唔會去用甚麼多愁善感或者其他原因去解釋點解我係一個咁樣嘅人！我根本就係咁嘅性格，我相信一個 EQ 再高嘅人都會有情緒起落嘅時候，但係我的情緒令我對你時好時差，令你覺得唔好受，我承認我有時真係好少爺脾氣，同埋好多時講嘢都好寸同好直，對唔住！傷害咗你！好多時你都會話我冇理過你嘅感受，唔通我真係冇？我好想知我要點做，你先會覺得我著緊你同關心你！有時我真係唔知要點做，究竟你想搵一個可以被你去照顧的人，還是要一個獨立而同時又可以照顧到你嘅人！好多時我都覺得自己嘅身份好模糊！
今日你講嘅說話入面，有一句我記得好清楚，你話我冇進步，我只識得喺度等你對我好，大家的距離越嚟越遠！我以後都會記得呢句說話，感覺好差，唔好受！呢句嘅意思係咪話一路都只有你付出而我只係喺度接收你對我的好，而我係毫無付出，係一個咁自私嘅人呢？希望你指嘅係你唔開心嘅呢個幾星期啦！跟住我又鑽牛角尖！唔通我對你做的所有事你都感受唔到，還是你覺得你付出的遠比我付出的多？放工上完堂捱住餓去買禮物跑去接你放學，係多餘的，想俾你一個驚喜的中秋節，都係多餘的，知你發燒所以去買退熱貼俾你，多餘的，陪你睇醫生陪你返屋企，多餘的，甚至用身體去滿足你，都係多餘的，而我講所有關心你的說話，都係假的，好似一個傻仔咁，還是你覺得我所做的事係理所當然！點解我要搞到好似一個八公咁喺度數，因為我真係唔甘心，愛一個人係唔應該計較誰付出得多，誰付出得少，但係我仲未可以做到咁偉大！我都想我做的事你會欣賞，你講過你知道我真係做過一啲嘢去令你開心同對你好，但係點解今日我又會聽到你對我講呢句說話！
今日食晏時你再打俾我，你問我之前你係咪好惡，點解每次鬧完交你先識問我，上次嘈完你話你會控制自己，今次我做得到，我一直都沉住氣，我冇頂撞你，點解又係咁，當初你同我講你鍾意我，你選擇同我講係你唔想後悔，我要問你，你宜家有冇後悔，原來我係一個咁煩嘅人，好啦，你試過喇，係咪覺得我唔係你想要嘅人呀！我知道講分手係一件好容易嘅事，但係我唔會隨便講，我知呢次我一講就冇得返轉頭，當我仲有唔捨得你的感覺，我都唔會講，因為一分手，我就會永永遠遠咁失去你！
我只可以喺度講晒我想講嘅嘢，對住你，我咩都講唔到，講唔出，我唔似你，我冇一班智囊團去幫我分擔，教我去點做，你有煩惱時，你可以搵你的朋友、阿姐，我呢，連平時我最想搵嘅 Trevor 我都唔想搵，其實根本就唔知由邊度開始講起，尋晚阿德先講完兩個人相處要有商有量，但係點知今日又咁樣！人哋話拍緊拖嘅人係會容光煥發，但係偏偏我哋就例外！
|
