周大雄仍然係咁搞笑，引到我地個個都笑，佢仲公佈左佢一個算係秘密既事俾我地知！我都好耐冇笑得咁多喇，其實笑完真係好舒服架！唔知點解每次食親飯問米婆都會好有威嚴咁問我地食咩同埋成日都叫人食多 D 野，好似一個大家姐咁！陳慧蘭今晚好靜，冇乜點出聲，只係負責笑，陳慧琳一如以往，仍然係有 d 聽覺失調，但係今晚佢飲湯竟然快過我喎！哈！
今日返工冇咩特別事，只係樓下總行有個新同事上黎了解下呢個部門既運作，四點鐘準時放工跟住去做 GYM，Sunny 大概五點零六點黎到 Join 我做 GYM，大概七點就走喇，跟住行左銅鑼灣一陣，本來想買褲同 T-Shirt，但係著住恤衫西褲又唔想試衫，所以最後都係得個行字！Sunny 帶左我去 ING Tower 頂樓一間 Cafe 食飯，環境幾好喎，d 野食又唔錯丫！等我遲 d 帶我 d 朋友黎呢度食下飯先！
今晚傾左一 d 野，知道左你既諗法，知道你點解會憎我，我知你好辛苦，由分手開始我話要同你做番朋友，好似一路都係我既意願，一直以來我都以為我做得好恰當，當你爺爺有事時，我去問候你，當知道你要轉工時，我打電話去了解係咩一回事，你 last day 同你第一日返新工，我 send sms 俾你問候你情況同祝你返新工順利，我間中會約你去做 GYM 行街同游水，呢 d 我都係出自真心去關心你，但係原來當我以為自己做到九十分既時候，你會覺得我做得不足夠，你會覺得我因為佢而忽略你，但係其實我冇呀，我宜家仲係度搵緊一個平衡點，講辛苦，我諗你同佢比我更難受，更唔舒服，今晚傾完偈好似冇一個結論，其實唔需要一個結論，我只係知道我宜家個腦又好亂，究竟我要點做好？！好似突然間返番去幾個月前咁樣，我知道你唔鐘意佢，我都明白冇可能要你接受佢，呢點我理解，所有問題都係我一手做成，今日開始我會自己處理所有問題，我相信我做得到同埋我一定要做得到，我只係希望你明白我唔會唔理你，但係如果有一日你同我講再對住我係一件好痛苦既事，我會放手，你都有你既選擇權！我想你生活得開心！
今日訓左十二個鐘有多，好野！跟住起身食野、睇報紙、刷牙洗面沖涼就準備出旺角搵 Trevor 食飯，當係同佢預祝生日啦，個死仔又遲到，不過好在今次只係遲左三個字，算你啦，都差不多個幾月冇見過佢喇，佢好似又肥左小小咁，但係又 OK 喎，之前太瘦喇，宜家個頭同個身就合番比例喇！同埋佢又剪左個新髮型，幾好睇喎，如果我個頭圓 d 我都想剪個咁既頭架，我地行左一陣，同佢去信和買古巨基 LIVE DVD，但係唔知點解會送王菲 LIVE VCD，真係搞野！行多左一陣，跟住就去朗豪坊食飯 lu，但係間野 d 野食唔係好得呀，都唔好食，又細碟，d 冷氣又凍，真係唔會再去呀，今餐仲要係同佢預祝生日既添，真係唔好意思呀，之後去左食龜令膏，因為 d 暗瘡實在太勁喇，真係要清下熱先得，跟住坐左一陣就各自返屋企喇！
其實識左 Trevor 都係大概半年，係上網識既 NET FRIEND 黎既，其實識朋友真係好講緣份，有 d 識左，但係唔岩傾，有 d 岩傾，但係又只限於係 ICQ 度好傾，其實真係做得朋友既唔多，Trevor 係其中一個，大家都係同年出世，我覺得同佢都算幾傾得埋，，可能大家都係做銀行啦，同埋我地都有做 GYM 同曬燈，所以都有相同既話題，之前我有咩唔開心同埋有野煩既時候，我都會搵佢傾偈，煩住佢，佢真係一個可以同我傾到心事同埋幫我分擔同分析煩惱既一個好朋友，有時有咩諗唔通，我都會搵佢，同埋佢好犀利架，我諗緊咩佢都好似知道咁，好似咩都呃唔到佢，佢諗野比我仔細，又有分析能力，真係好幸運同好開心可以俾我識到呢個朋友。
