有時候把日誌主題定成這樣也蠻好的

將來如果有機會再回味一下

看主題名稱就知道那個回憶了

原本靈愛的一些事令我不太開心的

但是不要影響今日主要的開心感覺

所以還是不寫好了

今天先回去SCC

原本要收跳繩比賽的報名表

那當然

自古以來通告回條或類似東西不可能一日收得齊

但慶幸的是

孫sir 突然邀請我後天去陸運會幫忙

我總算有第二個機會收回要收的東西

好

重點是

做完那些"公事"

我就去良田體育館去當最有價值觀眾

去看瑞芝B Grade 女籃的最後一場學界賽

(分組賽一晉級就要打大佬永隆)

幫她們計數據, 拍拍照

哈, 近來這幾篇都是說籃球

最後一年大學就是有這個好處

可以瘋狂的揮霍最後的空閒時光

不知不覺間

我由她們第一場分組賽開始

每一場都抽空出席看她們的表現

看著她們每一場的團結跟進步

說實在話

一知道淘汰賽要對永隆

大家都打定輸數

而且一開場就非常的怯

被人家連環偷球

但就是因為如此

之後放開包袱來打

驚喜連連, 要發揮的潛力都發揮出來了

左路邊走邊射很厲害以及擅長凍結對手的朱芷

積極抄截和以快打慢的嘉穎

crossover 和射術精湛的落雨

以力量和籃板取勝的女漢子Gigo

神經刀但卻舉足輕重的中鋒Joy Chu

定點投射總是很穩定的張雯

努力做好角色球員的Michelle Fung

都是我想記住的名字

愛看她們比賽的因由

從我上年在大興實習開始

有兩次放學的時候

我都偷偷走去大興體育館看她們打籃球比賽

那時候這是我放鬆因視導而緊張的心情的唯一一個娛樂

(又正好她們兩場都是在大興比賽, 真是特別的緣份)

她們吸引我去支持的原因是

雖然這樣講很不禮貌

但她們的勝負是取決於基本功和意識

而不是天賦手感或身體條件

這跟小學籃球的勝負分野是很相近的

而剛巧我在實習學校跟過好幾次籃球隊的訓練

我就把看她們比賽拿來增進自己對籃球比賽的知識了

除了心情上支持她們

我亦會留意裁判的怎樣做的

教練在甚麼時候會有甚麼指示的

這令我一點一滴的學到怎樣教籃球

而且

我對陳瑞芝有的是歸屬感

她們對於我也有一定的感染力

我跟她們之間的交流不太多亦不需多

我在她們生命中只不過出現那幾個小時

但卻因為她們我能學到很多很多東西

不管是知識上面技術上面互動上面情感上面

再來說

我不知道我還有沒有機會再看她們了

但至少我珍惜了這一年的機會

跟她們在賽場上的搏盡無悔有異曲同工之妙

Supper Moment - 同一

對上一次落樓下打波整爆左眼鏡框

事隔一個月左右(即係做完essay 得閒冇野做)

再一次踏入讓人忘記年齡的領土

這次有很多年輕人輪流成為我眼中的主角

首先是一對小情侶

男的在女的面前顯得有點好勝和aggressive

(人之常情吧哈哈)

他倆一隊連帶1個射手和1個小孩面對我隊4個大男生

我隊心知非認真對決, 輕鬆玩玩

但男的不肯放棄, 期間多言且積極跑動

年輕, 著實可愛

轉個頭來

男的轉戰排球場, 留給女的一點私人空間

這次是傷健共融的友誼賽

我和女的組4人隊對上馬刺型射手為首的青年

(當中有智能發展障礙的人士)

我隊強調團隊參與, 我只運用純熟傳控球, 給隊友製造機會

對方則以馬刺型射手作主導, 所有人全力協作他得分

實力與比分一樣相近, 好不刺激

最後我給馬刺型射手留了電話

但願他日再重拾年輕感覺

Apink - Ding Dong

SCC今年校曆表一大特色

就係將所有活動放哂響放聖誕假之前做

社足社排陸運會prefect camp

今日到女仔打社籃

都係果句啦

原先逢星期二練繩

咁又有呢D學校活動

我又係要讓路架啦

咁就即管番去搞少少跳繩比賽既公事

然後就去睇下比賽同班後生仔女燃燒下青春

咁岩matthew 社長我個靚仔游水細佬嘉豪唔知要忙咩冇黎

我就由支持matthew 既朱芷晴同李嘉穎

變左直接幫matthew 嗌波

第一場輸比Luke 果時我都未出手

但眼見新手球證師弟吹得唔係幾好

matthew 其他社職冇左嘉豪又有D六神無主不知所措

感覺之後場邊要有個人提下會好D

我就膽粗粗試下幫手教波, 嗌住場上既佢地

之後連續兩場充滿執行力同說服力地贏左John 同Mark

真係好多謝佢地同班社職肯接受我主動出手相助冇嫌我多事XD

鄭欣宜 - 女神

<<然後>>

係陳杳然畢業音樂作品展既主題

陳杳然是誰?

陳衍任

大家都叫佢一聲max gor

6點3天水圍靈愛收工

7點9到岩岩好去到中大利希慎音樂廳準備開始

眼望四周

我認識的人也有很多

老師界別有孫sir 伉儷同鄘sir 伉儷

同學有小羽, Lala, Jasmine姐,

Marco(與他的女朋友), 熊姐, 貝貝, 家瑤姐

師弟妹有擔任作品展工作人員兼演出嘉賓既cocktail 成員

which are Peggy, 鍾正, Ka Hei

名人則有李昊嘉, 蔡梓銘同利君牙

一開場max gor 將佢作品展歌曲既melody mix 埋成一首歌彈出黎 

我冇認出所有歌(因為有D歌都係第一次聽),

但最基本既<<刺．蝟>>, <<環游世界>>同<<當我沒有你>> 都聽得出

有意思之餘亦了解到max gor 作曲係真係有佢既一種風格

之後max gor 有將成個演出分開幾個sections 黎做

我大概將佢理解為:

自彈自唱

人地彈比佢唱

佢同人一齊唱

佢彈比人唱

感想 + 告別曲 + encore

活用好多唔同既樂器啦

(色士風, 管弦樂團, 結他, 鋼琴)

亦邀靖好多唔同界別既音樂人一同上台演出

(Cocktail, Blue Madness, 中六女生,

郭得勝中學Acappella Team,

獨立歌手, 唱片歌手李昊嘉)

工作人員繼續有Cocktail

化妝師同攝影師繼續沿用Cocktail Concert 既班底

有了解過max gor 既音樂特點都知道

作曲, 填詞, 編曲係佢既絕對強項

因此, 本來就不會期望音音精準

(更何況佢作D歌一大特色係副歌總要有幾粒勁高音)

高難度位有少少走音對max gor 黎講真係在所難免

但值得驚喜既係

咬字同抖氣位都處理得好左好多

其他一切都係講feel 啦

大家聽得enjoy

而佢既每一首原創作品又真係好值得聽

然後

我們定會繼續期待你的未來

唯一一個建議

youtube 出多D studio version 啦

聽完一次live 唔夠喉囉

同埋你想D作品有人留意到既話

呢個年代youtube 係one of the 最好既平台

(定係因為同唱片公司簽左約,

所以唔可以亂放歌上去社交平台???)

完場同一眾中同social 左一陣

最傾得埋就係同小羽一齊搭車番屯門果陣

大家都讀教育.

Max Chan - 其實已經很幸福

天水圍輕鐵站

巧遇陳志聰

6D人

luke 社

funfunfun 不固定嘉賓

我在靈愛小學做功輔班導師

他在李兆基書院當實習社工

一起搭西鐵回屯門

學生是共同話題

時間總算過得充實

到兆康站的時候

他接了一通電話

女朋友

今晚看電影的事

傾談到落車轉車都未完

我免得打擾甜言蜜語

於屯門站嘟卡後草草跟他拜別

祝幸福 :)

楊丞琳 - 單

22歲

最後一年可以大條道理庸碌過活, 哈. 哈. 哈.

又一個階段

所說的是身邊的朋友, 眼見(?)他們都大學畢業投身社會

我才剛開始和那份徹底無謂的hon pro 搏鬥

3年黎我第一次生日果日要番SCC教繩

估唔到就有個咁大既驚喜

由琴晚開始, 已經陸續有人請假

學界籃球

福音周統籌

病

令到今年原本已經冇乜人既跳繩學會

老早確認今日最多得1個form one 黎到

所以我把心一橫取消左今日個練習

然後去支持下去打學界籃球既小朋友朱芷晴同李嘉穎

嘻嘻

生日都冇乜好運

睇住隊波由贏變輸, 出線形勢險峻T.T

但總算比自己生日有個小娛樂

冇得跳繩都有得睇下波丫

Taylor Swift - 22

身邊的韓迷不斷在轉發這則消息

在我看來

似乎也是時候發生了

Running Man (RM) 是我唯一比較熟悉的韓國綜藝節目

原因是一開始我打算跟年輕人多點話題的時候

就是現就讀HKU韓國研究的Tracy 建議我去看RM

大約3,4年前, 我為足球雜誌Soccer Wave 寫稿的時候

RM 正渡過當紅並開始嘗試改革的時代

直到我最後一篇用足球來描寫韓國軟實力的文章之時

RM即使在東南亞仍然擁有高人氣

卻無可否認地在國內的受歡迎程度已開始下滑到谷底.........

當然, 若然RM下架, SBS有能力打出新一波高峰嗎?

我看, 可能不大

不過, 始終, 節目刺激性下降, 題材有限是不爭事實

固定角色深入鐵粉的心, 節目改革後卻無從發揮

因此原本早就想專注音樂創作的Gary

意興闌珊, 萌生去意絕對是無可厚非

因為RM, 我接觸到他的音樂和創作

他Rap得寫實而浪漫

Rap 本來就用於宣洩社會不滿, 成長故事之類的吧

或許可以期待一下他未來的作品

LeeSsang - 找到幸福

這段時間有很多自由的空間

只要是day off, 身體情況許可

就到樓下巴士站旁的花園跳跳繩

拍下自己練的花式

然後再改進再練

為的就是想在大學畢業前完成一個心願:

參加人生第一次的跳繩比賽

話說今年跳繩學會多了兩個高質素的新人

令我留意多了校外比賽

上個月我發現了專業花式跳繩學校有個公開賽

分齡的

不僅適合我的高質師妹們參加

就連我這個年齡組也可以參與

於是

我就開始練習比賽所需的花式組合

比起以往以興趣為首要

比起以往逐個新花式去練去試

現在跳得更有方向更有目的

唯一的缺點是

這樣練繩對身體負荷很大

每次練完最少要休息兩日

D腰酸背痛先會消失

大腿小腿D筋先會鬆番

冇辦法

年紀大

不過為左呢個小小心願

我相信係值得既

大家

若果有空

就繼續在FB見證著我的奮鬥過程吧哈哈XD

楊丞琳 - 年輪說

話說唔知幾時開左個instagram account

跟住發現要download 唔知咩apple 定 google store 既app (???)

唉算啦到依家都唔多搞得清

唔識又冇興趣up相, 所以冇理佢啦下

琴晚開番黎睇

發現原來有D friend 要request follow 先有機會睇到既

instagram 對我黎講真係孫揚 -> new world -> 新世界

年紀係後生仔

但係一講到D科技野就成個中年大叔咁一竅不通

死啦

咁講會唔會侮辱左D中年大叔呢哈哈

有時我覺得我亞媽都in過我

唔講你唔知

佢最近個偶像叫GOT7

一個有香港人既韓國男子組合

GOT7 - Hard Carry

也是有結束的一天吧

最後一年可以番靈愛託管班了

今年轉左負責老師同秘書

好多野都汁正左

未開工已經番去兩次

一次做樣interview

一次簽約

往年都係一鋪過開工頭幾日做哂

念在係我長期米飯班主

加上始終做得耐對學校有D感情

就放過你啦下

臨走秘書講多句話

「今年都係安排你睇番YTH wor 葉庭熙

(YTH, 一位鍾意搞搞震既醒目仔

讀書唔係話最叻果班, 但係好有小聰明)

聽上手既秘書recommend

係得你先搞得掂佢」

小弟原先無言而對

心諗真係唔知點應你

臨尾只好支吾一句「反正我都係睇開高年級」

老老實實真係冇乜人想負責睇住D曳學生

我由佢2年班尾睇到終於升6年班

惡又惡過, 錫又錫過

關係呢D野都係時間磨練既啫

唉

最慘係今年人面唔全非都半非

最識照顧低年級果兩個女導師都唔請

反而D成日玩手機, 吹水同比D學生玩番轉頭既就留響度

今年我注定一人 T.T

Apink - Only One