一月十五日，夜晚食完飯之後去左個朋友屋企。

果隻叫做波波既貴婦狗真係好得意喔，完全唔怕陌生人。

除左唔會亂咁吠之外仲成日走黎走去，跳上我地個身道，

又或者不停聞褲腳同埋LAI我地隻手，嘻嘻，實在太醒目啦！

一月十六日晏咒就慣性落左去婆婆屋企，幫媽咪打大陸麻雀，

話說槓牌就有錢收，實在太易贏錢啦！不過我最後冇輸亦冇贏，哇哈哈！

至於果隻新既Winning Eleven 2011同舊果集差好遠，

無論係啲球員既樣貌同埋仿真度都大大提升左，好耶！

結果呢晚最後成兩點鐘先至訓，唉！跟住果朝仲係考察車公廟既大日子添-V-

一月十七日，我地六個就去車公廟考察，真係幾好玩，哈哈！

我地集合晒就起錨啦。但係我發現一樣好古怪得意既事：

就係RICKY`RAYMOND同我一開始冇話題，面面相覷，死寂一片。

奈何佢地三個女仔就好似十世冇見，啲話題好似永遠都講唔完咁……

幾乎去到九龍塘我地先至開始WARM-UP，經過幾次轉車之後終於去到大圍站。

我地六個係地鐵站睇完幅街道圖之後，就人生路不熟咁搵間廟。

慶幸兩地位置既距離唔係差好遠，過左條隧道就正式到達啦，嘻嘻！

根據所需時間，證明我地唔算係路痴=)其實今次考察既目的係訪問同探究文化特點。

進入左車公廟之後，發現周圍都煙霧彌漫。除左PHOEBE之外，我地都有啲抗拒。

每次都係咁樣，初黎報到果陣時都好似好迷網咁，唔知做乜好，更加唔知由咩做起。

躊躇左一段時間之後終於鼓起勇氣啦，PHOEBE去左解簽處借個簽筒，

之後再好似好誠心咁樣跪左係大殿就求學業，結果佢果支係上簽，都唔知係好彩定係咩？

我地搵左個外表比較NICE既解簽阿叔，佢話PHOEBE名次好前，

不過如果佢請教下一啲比佢更叻既同學同埋老師既話，個成績仲會有所進步添，

所以我地五個就係道笑佢請教DEXTER，詳細原因就唔再講啦，大家明就得啦XD

解完簽之後，我地又企左係個廟出面商討訪問內容，咁又用左好多時間-V-

我地六個重整旗鼓，RAYMOND同CRYSTAL就企係側邊支援，

至於SARA就負責錄音；RICKY`PHOEBE同我就負責訪問。

話說我地四個企起車公殿入面，突然見到側邊有個男性工作人員影緊啲相，

PHOEBE就極速上前截住佢，展開左呢一段歷時幾長既訪問對話XD

原來呢次既受訪者係一個屬於修輯車公廟既工頭黎既，

雖然佢講左好多野，但係佢好多時都重覆講死一樣野：保留原有文化-v- 

之後我地再次企起車公廟既正門，我地成日既舉動都好似被人注視咁。

過左一陣我地就搵左啲遊人同我地影合照，為今次既考察劃上句號。

係呢個地點搞左兩個鐘之後，可算係有啲收穫喔=)

我地離開車公廟就行番去大圍地鐵站，搭小巴去沙田新城市廣場道食野。

搵野食既時間比真正食野既時間長，呢一個係永遠都唔變既事實，嘻嘻！

最後，我地去左一間好奢侈既元氣壽司……

CRYSTAL一坐低就好似好豪咁叫左碟$26既火焰三文魚，唉！

呀？幾件壽司又點會夠RAYMOND食，所以佢不停係度埋怨，笑死我！

櫈都未坐暖，我地係廿五分鐘內叫野食同埋單，呢啲係咪叫做快餐？

呢日夜晚又去左杏花村打邊爐，已經連續兩日啦，好易燥底XD

不過啲配料幾好食，好飽哇，同班AUNTIE傾左陣計之後就返屋企啦！

一月十四日，終於考晒試啦，心情的確輕鬆左好多，嘻嘻！

下個禮拜開始，某老師就放成兩個禮拜STUDY LEAVE，不予置評-v-

坦白講，我真係好希望今次出黎既成績會比上次既好……

中文文言文好出奇咁比想像中淺，英文或者真係冇佢講到咁ALIEN，

數學、中史、IH如果唔錯白痴野既話應該都唔會點行差踏錯既，

至於重災區都非普通話同埋IS莫屬，宜家真係唯有「攞得一分得一分」。

話說前日考完IS之後，個心都唔知去左邊道玩啦，

我都唔明點解電腦呢啲閒科要擺去一日道考，真係好討厭！

放左學之後就同成班男仔去左食野，諗左好耐都未知食乜。

呢一個嚴重選擇障礙症真係唔多好，最後就唯有去左大食代，哇哈哈！

食左少少野之後就去左上環搵阿妹玩，嘻嘻，佢見到我笑又係道笑，真可愛。

佢係屋企道衝黎衝去咁，但係隻眼成日都掛左係部電視道，唉……

有時仲手多多咁整亂晒啲野，撥晒啲擺左係SOFA既玩具落地下-v-

晏啲就落左灣仔買左少少野先返屋企，果陣時都成五點幾啦。

呢排日日都鬼死咁凍，個人留係屋企都唔係好得去邊度咁，

好多時既晚餐都變左打邊爐，其實都幾開心丫！不過最驚就係考試先黎感冒……

永遠都係咁樣，溫親書就鬼咁眼訓，呢日個頭仲好痛，就黎爆咁！

食左粒藥，沖埋個涼，等啲血液循環番少少就開始由電腦書既第一頁睇起，

突然之間發現佢連INPUT DEVICE再細分乜TEXT INPUT，POINTING DEVICE，

啲THEORIES同CONCEPTS又唔知想點，見到都冇心機啦……

食完飯之後媽咪無啦啦攞返我細個比人拍MOVIE果隻碟出黎睇，

成日都要高速咁爬黎爬去，啲動作又快又搞笑，有時係道搞亂擋，真係笑鬼死我！

望番以前自己個樣，經常性既無聊行為，都唔知比咩反應好@@

睇下睇下就搞到十二點幾，唉！又係一個「唔夠訓既夜晚」。

今日考完之後覺得份卷的確唔算好難囉，不過我始終衰唔睇題目，至少冇左一分-.-

原本我又唔記得帶計數機，不過好彩TIMOTHY有兩部姐，唔該晒=)

之後就同CRYSTAL`RICKY`JOJO同PHOEBE上左SARA屋企，

傾左少少關於PROJECT啲野之後就落左吉之島買野食啦，嘻嘻！

最後我地每日都食左差唔多十件壽司同埋一塊PIZZA，都好似好豐富哇XD

話說我地幾個都食晒啲野，唯獨RICKY仲係好ENJOY咁嘆緊，

我地五個用同一種既目光望住佢，好搞笑！最慘就係佢搵唔到後樓梯個垃圾筒……

跟住就開始玩啦！JOJO就攞左副UNO出黎，點知玩左三盤，RICKY都輸晒，唉！

最尾果鋪仲派錯晒啲牌，接受到既懲罰就係收晒我地多出黎既牌，隻手幾乎攞唔晒XD

另外好諷刺既一件事就係：最尾果鋪好似玩唔完咁樣，搞左成半個鐘先分得出勝負-v-

因為RICKY輸到冇咩癮，就話玩MONOPOLY DEAL啦，點知結果都係一樣……

RICKY都係例牌比人炒，哇哈哈，真係太有趣啦！

最後我地就決定玩啤牌，當然就冇任何既賭博成分啦=)

話說我「七級豬」聽過好多次，但從來都冇人話過我知點玩囉。

不過唔緊要，我比佢地三個督導完之後好快識玩！
原本話係30秒要飲晒一枝550mL既水，點知縮下縮下得番15秒……唉！
跟住SARA即刻攞左個水樽比我，幾乎裝滿晒水，CRYSTAL一聲令下我就開始飲啦，

最後我係第一位成位七級豬既人，好不幸咁要接受佢地安排既變態懲罰。 

我都算係咁啦，第一次玩係咁樣上下架啦-v- 水，由今日開始，已經令我感覺到好恐懼啦！ 

點知飲到四分三果陣時RICKY無啦啦係道笑，我呢個人就最唔忍到架啦，

我就情不自禁咁將口入面啲水噴左出黎，搞到張玻璃檯同埋張櫈都濕晒！

佢地幾隻野企係側邊笑……幾乎瀆鬼死我，真係可憐！慶幸比佢搞一搞都係用左十六秒姐……

考完試放縱一下自己真係好開心，我地有時仲成日講是非，或者係度搞搞陣，嘻嘻！