基於詢眾ge意見，我之前篇野可能長左少少，
所以我決定由下一篇篇起，就有咁短，得咁短。
六月三日，考綜合人民科同埋英文作文，
因為我吸取哂之前三次評估ge經驗，
我決定將成本I.H.書背左去，仲要由尾都悉得背番出黎。
結果，成份卷都唔係好難，但係有少少長問題唔悉答。
話雖如此，我仍深信自己今次呢一科會考得幾好！
希望唔會好似以前咁，越有信心ge一科會死得最轟烈。
總括黎講，呢一科真係「聽天由命」。
去到英文作文，短文ge電郵就唔算難，可惜ge係我超左字數。
至於篇長文，就要寫番Life Wide Learning Day II啲野，
唔知點解，個腦好似空白一片咁，唔係好知自己究竟想點，算啦！
六月四日，亦都係六四紀念日，
根據班主任所講，呢日我地考一科就放得ge原因就係要紀念。
結果，用左三十分鐘考完份英文聆聽卷之後，就返左屋企。
話說，呢一日可以話係車錢都「薛」埋。
講番正題，呢份卷有幾part，而我只係有一部分突然發緊夢，失左手添。
六月七日，就考我最冇信心ge數學，唉！咁岩就緊張到胃痛，死啦！
結果，我係完全冇哂信心，個腦再一次咁空白，完全唔記得哂上學期學ge野，
至於選擇題果一份卷就比較好啲，只不過係比人fake左，唉！
另外，份長問答卷就有係呢……四個字：「不予置評」。
六月八日，呢一日考中文作文同中文語文運用加閱讀理解，
份中文作文試卷唔算太難，因為作ge題目都幾普遍，
長文就寫左篇描寫記敍文，講去「嘉年華的所見所聞」，
而我就用左一大堆四字成語同詞語，反而修辭冇咩點樣用，唉！
去到寫啓事同埋簡短作文，其實我都冇咩太多信心。
去到份中文閱解文法卷，就比我想像中ge容易，太開心啦！
而文言文果篇都唔算太難，至少大約明佢講咩先啦。
至於單元問題，講真丫，我寫完睇番都唔知自己寫咩，語文運用果部分都冇咩特別。
話說六月九日係教師發展日，所以我係八號返左學之後，再出左上環，探阿妹啦！
六月十日，考中文聆聽、普通話同電腦，
唔知係咪心理問題，每次落親雨果日，考果幾科都唔會好！
唉，今次又應驗啦！中文聆聽好混亂，指ge係我個思想；
普通話就真係要我地全軍覆沒啦，有成部分都聽唔到個人講緊咩，
就連我地班入面普通話好叻ge同學都招架不住，錄音入面啲人又讀得快，
再加上自己普通話個底打得一啲都唔好，真係「兇多吉少」。
電腦呢一科真係，「不予置評」，冇咩好講。
學Raymond話：「電腦係比人relax，唔係用黎考人架！」
六月十一日，就考英文閱解文法同埋中國歷史，
鑒於之前失敗ge經驗，我盡量令到自己考英文果陣時放鬆一下，
點知，都係一樣死。咁又好難怪，話哂自己都係衰唔小心，
我真係好想殺左自己，唉！對自己太失望啦。
至於果份卷ge內容，就真係唔算太難，有時要我地轉一轉彎囉！
至於中史呢一份卷，我淨係唸到用一個詞語去形容：「痴線」！
點解咁講？因為我地要係短短ge四十五分鐘入面，
做四十五題選擇題，同要寫番二、三百個字，
會唔會過分左少少呢？雖然我再次「食」左本中史書，但係由於時間緊逼，
原本清晰ge頭腦突然裝滿雜草。而且，我原本以行書書寫，但最後就變左亂草。
我完全想像唔到囉！不過好采，寫都寫哂ge…攞幾多分就真係……救主保佑啦！
同一日放左學之後，等左好耐先至有車，
點知一上車，媽咪打比我話：「姑媽話出去北角飲茶。」
我唯一即刻落車，過對面馬路，再轉車啦，真係……What a PITY!
飲完茶，上左姑媽屋企道，就同果兩個表外甥玩左成個晏咒。
夜晚，細舅父兩個又上左黎食飯、打牌同睇波，
話哂今日都係世界杯揭幕戰喎……
結果，我再一次做左隻夜貓，去到四點半先至走去訓覺。
話雖我仲係考緊試，點解仲玩到咁癲呢，嘻嘻！
選自：http://hk.myblog.yahoo.com/yatcheung_1997/article?new=1&mid=4183 |
