上回講到我係 四月廿八日 （測驗後一日），
有一日假期──家長日補假，宜家係時候講講我做左D咩啦：
當日的下午一點係柴灣體育館打羽毛球，
由於隻耳仔唔係幾舒服，所以只不過係打左一陣，跟住就坐埋一邊。
打完波之後，就由東邊走到去西邊，
去到上環之後，先係間茶餐廳食左午餐（話說果陣已經成三點鐘），
之後就去左探下阿妹，睇下佢成長ge情況。而結果就係「別來無恙」！
大約六點到，阿妹差唔多要去休息，而我地亦都離開去。
皆因成三點幾先食晏，係呢個時候又點會裝到第二餐呢？
因此，返到屋企之後就係九點幾到食左個「公仔麵」（一種令人回味的味道）。
之後大約十一點幾，就瞓覺啦！嘻嘻，其實另有陰謀架……
去到大約兩點四十五分（當然係 四月廿九日 的凌晨時分），
就被個鬧鐘嘈醒左，歐聯四強次回合開波啦，國米對巴塞，
花左兩個鐘ge時間坐係電腦前面，望住比賽進行，真係幾得意！
最後國米0:1輸左比巴塞，但加埋首回合D分，國米就可以出線，爭冠啦！
四點四十五分，再一次進入夢鄉，瞓多兩個幾鐘，又要起身啦，哈哈！
四月廿九日朝早起身果陣時，出乎意料ge係零倦意，
返到學校之後，就要做足一切ge心理準備，原因就是：派卷，
首先係英文測驗卷，四個字講哂：唔多滿意，50/63，
有四分係錯D白痴野（白痴野所指ge係錯得唔小心），
真係冇野好講。總之就好低啦！
之後就係綜合科學科，仍然係四個字：出乎意料，
唔好唸埋一邊，出乎意料可以係講緊POSITIVE，41/50，全班十名內，
滿意，但係有一、兩題係突然腦閉塞，因而冇左幾分。
去到數學堂，同預計差唔多，仍然係錯左D白痴野咁啦，分數不詳。唉！抵死。
之前我講過：原本最有信心ge一科，出黎ge結果係好差ge…今次又應驗啦，好傷心！
綜合人民科，每一次都係我ge剋星，最後改完分都係得49/70…究竟點解會咁？
今日最尾ge一份卷──中文測驗卷，好過上次，比上次高0.5分咁大把，
63.5/80，算係咁啦，只不過有幾條ge答案寫得唔夠詳細，救命呀！
四月三十日，原本係中史派卷日，點知位老師病左，要等到下個星期二。
同一日ge中文堂，係老師請完病假放黎學校ge第二日中文堂，
當然有ｄ好笑野發生啦！W老師今日一入到黎我地班房，講完「午安」之後，
就做完一樣非常重要ge任務──追收功課。以下係一則W老師同Brian ge對話內容：
「請起！你好似有一樣功課未交咁喎！」
「係，老師！知道！」
「咁就麻煩你宜家補交番比我啦！」
「係，老師！」呢個時候，課室一片死寂，大家ge目光都放哂係Brian身上，點知……
Brian搵一搵自己個書包，就問「老師，係交咩功課呀？」佢一講完呢句，
W老師Dup低個頭，再左右咁搖一搖，最後再「唉」一聲。隨後課室再次充滿笑聲。
W 老師仲話，「我一定要同班同事分享一下！」，
「如果要寫番本『老師雜感』，呢一段ge對話一定要寫落去！」
呢一堂ge中文堂可以話係我地班係呢一個月黎「夢寐以求」ge一堂。實在太開心啦！
五月一日，一個叫做「勞動節」ge假期，
當然係有地方去啦，仲要係幾豐富添。
呢排都有幾套大片上映，咁就梗係要入戲院「行」下啦！
繼上次睇完歲月神偷之後，咁次就睇左「葉問２」，呀！唔錯唔錯。
上一集ge葉問我覺得好精彩，尤其是講葉問一個打十個，
將一個原本企係道ge人打到瞓落地下，實在太精彩啦！
而今集同上集一樣，有三個大打場位，
最經典就係葉問最尾活生生打死左個西洋拳王，爽呀！
晏少少，就去左婆婆屋企就食飯，成一點鐘先返左屋企啦！
五月二日，因為某個原因，拜山ge日子延遲到今日，
拜完山之後，就再次因為某個原因，去左銅鑼灣間富「林」飯店食晏，
食左冰糖燕窩、魚翅等等ge好野，哈哈！真係好好食呢，回味無窮添呀！
當然，食物ge質素同價錢係成正比例啦，不詳，嘻嘻！
食完呢餐「豪宴」後，就去左姑媽屋企，夜晚就係太古某間和「文」餐廳食日本料理，
呢一日簡直可以話係有口福啦，好爽呀！
其實呢一日係我農曆生日，但係絕對唔關食好野事ge…無無聊聊咁提一提啦！
五月四日，體育堂就進行左個排球exam，等14/20炸，不過係成班黎講都算幾好。
至於今日英文有Unseen Dictation，中文就有Seen Dictation，
英文Unseen Dictation就簡直係成班一穫熟，有大半班人唔合格，
而我，哈哈！破左自己ge個人紀錄，第一次默書創新低5X/100，合格高幾分！
五月五日，宜家對D.T. 堂有番D好感，因為我差唔多整完果隻robot model，
不停玩個motor，自己幫隻野上色，痴野，等等ge工作等我覺得太麻煩啦，
宜家見到自己有D成果，邊會唔開心丫，哈哈！
至於音樂堂就有個筆試，講真果句，唔係好難，攞滿分，YEAH！
五月六日，係W老師請完假放黎ge第一堂中文說話堂，
今次我終於要做present啦，由於早有準備，問題不多，同學評語都幾好，
其中最新奇ge係某同學係「其他評語」果欄，寫我講得太多聲，同冇眼神交流，
我真係唔多明白乜做presentation唔係越大聲越好咩！仲有我有好多眼神交流喎，不可理喻。
放學之後，去左體育場練羽毛球，最後再留多一個鐘，同班校隊打，佢地真係好勁呀！
不過打完之後，成個人都攰哂，就黎散咁，哈哈！
五月七日，一個下雨天同一個大放晴光ge一日，
一開始，個天黑哂，唔講真係以為自己訓多左幾果鐘，
事實上係「黃色暴雨警告信號」現正生效，表示各個地區下著大雨，
唉！我真係好唔鐘意放學或者放學果陣時落咁大雨，
簡直超級超級麻煩呢！攞左把直骨「姐」，再咩著個書包，都有點兒「那個」，
再加上搭車果陣時仲要同人迫，唉，點會唔鐘意雨天丫！
點知天意弄人，一放到學校，等打鐘ge時候，停哂雨，
晏D再係課室行出去望下，停哂雨，出行太陽，「唔通連個天都唔鐘意我」！哈哈！
中國歷史堂，悉得穿梭時空都冇阿sir講都咁快，
講講下東漢滅亡，嘩！一飛，就飛左去三國鼎立啦，佩服佩服。
去到中文堂，好笑ge野陸續有黎，
由於唔知Michael講左D咩野關於「出殯」同「出席喪禮」，W老師作出以下ge反應：
「有一日，一個朋友問你：『你聽日得唔得閒呀？』『哎呀，唔得呀，我聽日要出殯呀！』」
「所以，大家一定要知道呢兩個詞語ge分別。」
去到英文堂，就有一段好搞笑ge活動，就係兩至三人一組，演出一個寓言故事，
其中Ricky 同 Matthew Lee 就做「風同太陽」，
Ricky就一人飾演兩角，唔戴眼鏡ge佢就飾演風；相反戴眼鏡就飾演太陽。
再一時行係呢邊講風ge對白，一時行去第二邊，真係笑死人。
亦有D冇咩表演欲，搞到係大家面前出左少少羞，
就好似咁組別竟然攞埋張「貓紙」出去，過分！
有D就成個寓言故事不多於３句，短到不堪，不過都冇咩所謂啦！
都係果句：「唔係現場睇ge話，你宜家係唔會笑得出架！」
五月八日，朝早做完野之後，就上左上環，探阿妹呀！
明顯地，個樣大左好多，好多時都講下野咁（雖然我地聽唔明），
有時佢果D動作簡直係笑死人啦！都係睇下相啦，好抽象呀……
 
唔好意思，因為時間ge關係，我唯有一次過打多D，所以篇野會好長。
選自：http://hk.myblog.yahoo.com/yatcheung_1997/article?new=1&mid=4149
引用：http://hk.myblog.yahoo.com/chowkamlam/gallery |
