六月廿九日，一個我不停打乞痴ge星期二，
話說我尋日打完羽毛球，但係出奇地，今日隻左手痛，而唔係右手，
我真係唔明，我完全冇用過左手打波喎…點解會咁樣架？
話說我尋日個喉嚨都好唔舒服，好彩有粒救命喉糖同兩杯蜜糖，
但諷刺地，今日喉嚨已經好得七七八八，但係個鼻就唔同，不停打乞痴，唉！
雖然尋晚都成兩點先訓，但由於今朝有野做，所以都要起身，哈哈！
食完晏咒果餐，就再一次返左小學幫手。
話說上個禮拜好爽快咁應承蔡老師，所以今日就係以「評判」身份參加「歌唱比賽」！
而個評分準則好簡單，技巧佔七成；台風佔一成；咬字佔一成。
係果十九位參賽者當中，有幾個唱得特別好；
而另外果班一年級同學就唱死一首詩歌，就係「歡欣」啦！
好啦，等我講講果班比較出眾ge同學先啦。
首先5A班其中一個女仔唱林憶蓮首「願」，唱得簡直一流，
冇走音，咬字清晰，拍子感好好，有感情，
暫時都係我心目中ge冠軍，所以就比左85分，
而係佢Music Break果陣時，廖老師攞住支花上台送左比佢，
再跟手攬住佢，錫左佢一啖，全場即刻起哄呀！
之後有個6C班ge女仔唱Love Story，唯一一首英文歌，
唱得亦都相當好，但係台風方面做得唔係幾好，所以比得約82分，
之後有個6D班ge男仔唱曹格一首歌，不過扮得太似曹格，
好多震音同動作都學哂佢，但係話雖如此，當佢收左支花後，
隨即好有型同好蕭灑咁拋左支花落台，好搞笑呀！
去到最尾一個參賽者，黎至6B班，佢都係一個女仔黎ge，
把聲唱得好靚，完全投入哂落隻歌道，所以我比左83分呀！
至於果班一年級ge同學，就真係好大膽，
佢地雖然有少少怯場，但係咬字方面就好清楚，
但係由於佢地入錯拍子，催板同走音，所以最高分都係比得60分到。
講真，我已經算「仁慈」啦，有啲老師評判都係比得五十幾炸！
頒獎之前，袁主任同陳主任就講左少少評語，
都係主要集中講「咬字」呢一方面，哈哈！下次努力啲啦！
至於獎項呢，就同我心唸ge有少少出入，
冠軍就係6C班女仔；亞軍係6B班女仔，而5A果個女仔得第三名，
另外要提一提ge就係6D果個型男勇奪「最佳台風獎」。
個function完左之後，蔡老師講左個好消息比我地呢班幫手ge同學聽，
佢叫我地星期五返黎食野，食pizza呀！嘻嘻，果日返學之後一定要飛番小學。
係呢一個時刻，我真係好期待今晚凌晨ge「雙牙大戰」，
雖然葡萄牙有朗拿度，但點講都係西班牙勁多喎，所以我決定捧：西班牙。
哈哈，今次又寫左篇「論文」添，又長左好多啦！對唔住。
選自：http://hk.myblog.yahoo.com/yatcheung_1997/article?mid=4328
|
