近來經常性跳掣，例如食返之前拍拖成日食嘅嘢
 
而家食都覺唔平，嗰陣直頭覺得，算啦買少支鏡陪多陣女朋友囉。

又或者會係夜晚黎一個「捱麥記」，
其實唔多算捱，因為諗住一人一個餐，我再加多個豬柳強打底，
後來話想食雞翼想食麥樂雞，想食脆香雞腿，
我都同佢講「無架啦，頭先又唔買？唔比呀。」
之後一邊講一邊走去counter買哂佢，
結果買四五個餐百幾蚊係件等閒事，
又吹得我漲包埋執手尾每次都食得哂。

是咪巧威威？

而家都無啦。
我好想返返去之前，將創作靈感升至最高，
甚至係最開心。

於是間唔中都會咁叫，坐底會叫個拼盤加個包，
懷念返一個禮拜食至少一次麥當勞，
我話過唔食薯條，ayo，唔破壞大家個約就係。
好可惜一直忍忍忍，
忍到比阿軒話「人地都唔知，你食左都無所謂」
又或者比阿賢鬧「食咪食囉，只有傻仔先會守呢啲白痴嘢」，
好可惜當我知道人地有食薯條之後，我都唔再守呢樣嘢。
都好，過往幾年去麥記都食得好齋。
我呢，甚至有一定信心，拍拖結婚唔偷食。
老實，就算有女隊到埋身都不為所動，畢竟陪坐而已。
有得開心，單又唔係我埋，教會又唔知，唔去馬就係唔去。

我依然愛妳，絕對。

之前太溫馨，而家日日都痛住，
雖然痛得不斷加倍，我亦無後悔過鍾意第二個。
我好感謝佢出現，
將好多自己、教會、屋企訂落嘅規條打破，
既然如此，我好希望我能夠一直保存，
事隔一年每晚想喊，就當係甜蜜回憶。
講緊可能係永別，呢世唔會再見，
好傻豬豬咁笑住，亦想由眼淚中解放。

或者，連妳都一樣，呢世都唔會再見呢？
將來，我應該會搵個個格差唔多，
樣同髮型都差唔多嘅，
然後再再分，再要生要死。

我也很愛她。

當朋友以為我係player，又或者會追多妳一次，
過兩個月後就無事，好可惜推斷錯誤，
我到而家仲係放唔低。
今日maggie帶出一個結論，
「你真係好鍾意佢喎，咁無人幫到你架。」

其實我係唔明點解總係覺得我本行係撈偏，
係花花公子，敗家仔，集所有負面形容詞於一身。

即使技藝升至更高，都無得好似以前咁，
寫詞rap執相影相拍片剪片畫畫砌animation，
我而家，係個地盤佬。
就連阿媽都話我陌生。

近來畫緊幅新畫，
畫到瞓緊覺有個類近滅絕所多瑪嘅畫面出黎，
好自然地同現今處境相連住，
搭車嗰陣一沉澱，爆左段我覺得好有畫面嘅歌詞出黎，
將自己代入為其中一員，諗下當時嘅感受。

淒美、遺憾、斷腸。

或者呢啲就係代價。

有啲代價唔抵比，例如有朋友有事，女朋友又突然黎到話迷路，
到最後大家又反目，女朋友更加無埋，
阿…如果而家仲keep到我都無咁介懷，
問題係兩個都無左，點先？
又或者係人情，借錢比人之類，
風險太高喇，我呢一輩人，太善忘，
借錢呢，要還嘅。
又或者係我入左建築業，有腹肌食到變豬，
唔知逼定受判頭啲小恩小惠，之類。
都係要還。

要上高位代價係要封口，
要帶住一班群雄，要有極高月入，
要有一定智慧先可以保住。

我淨係知我每日都好辛苦，
唔肯放棄理想又要加份正職，攰到唔似人。

又或者，要成為霸王就要咁做呢，
專一樣我就好勉強，
幾樣加埋一齊就可以隻身同出面啲production匹敵。
無嘅，無左好朋友，有幾難頂都唔再直接講出口，
教會唔講，弟兄姊妹會將出賣美化為代禱，
同事唔講，平時我已經夠癲，講有幾辛苦盞有機會入我。

還是作詞代替，畫畫代替，
無論如何也可以表達阿，人們有興趣的可以猜度，
不，多數只有女人有這閒情，也罷，注入魄力完成的話，
失去了健康，捨棄了精神。
畫作內要是畫女角總有幾分像妳，又不可名目，
又有幾分像她，也罷，相似在不過是於氣質上。

下一次失戀的代價，應該是紋身了。