尋日我起左身之後就去左利豐肥老闆個到改車，咁講真zeta就咁玩係好，但係如果可以飛得下既zeta係咪更好呢?
咁我尋日改左些許野，例如大餅、腳踏、手筒、座bar通、座bar通快拆...咁就已經300幾蚊，差不多啦!現階段我想架車係速度與平衡型，舊版淑女係頭輕尾重，而家我個架係新版，前後都好接近，不過個頭都仲係輕!
改完之後，自己再揸埋返工，感覺唔錯!因為大餅改左之後，車仔既max speed加大左，另外就係座bar通換左之後，一黎高度加高左，二黎就係左右傾度明顯比到我想要既反應，即係一入彎，唔洗扭胎太多，輕輕傾則身已經達到完美，腳踏改左，我用個d係大釘踏，省力、抓腳力好好!
不過由於未習慣大餅後既動力同埋過彎幅度，岩岩收工個時，差d有轉向不足既問題，過彎少少overspeed，同埋因為大餅用左長腳，出現「刨踏」情況，不過唔怕「刨踏」係正常情況...
返到屋企，我媽完來放假，不過就冇咁好彩!件事就係咁，尋晚佢收工個時，佢係太平隧道過「死亡彎」，其實呢個彎係好多意外發生過，我試過好細個時bmx brake撞牆，老友納祈踩NEXT用drift過彎後車身爆正神主牌、我細佬撞神主牌、親眼見到子彈撞到粉碎(音響、低燈、包圍爆到一地都係)...小朋友個d迷你bmx更不在話下!
咁尋日都係小雨既情況，我返工都有少少打滑，不過手勢好冇事，但我媽就冇咁好彩，佢踩架13年前買落既大淑女roadway，車身高已經唔在講(balance低)，波子舊(換都換左好幾次，應該到波子膽有爆裂)，後輪不穩(同上)，咁既情況再落「死亡彎」，咪炒到叭係到囉，返到屋企見到阿媽炒到面、眼角都損埋，可知我媽踩左咁多年單車但係都仆成咁，「死亡彎」係好可怕，一炒通常都幾傷...
睇黎架roadway係時候結束佢既生涯，呢架車仔，對我黎講就冇咩大影響力，但對我細佬黎講就多啦!幼稚園、小學都係坐呢架車，由我媽去做司機，細佬係夏天單車尾捉青蜓玩蟬，冬天長週返學懶床唔起身返學都係靠佢飛到學校...阿媽帶細佬學識踩單車都係呢架野!
人有生離死別，車都有去擋車場既時間，睇黎roadway既生命應該到此為止...
|
