尋日，天氣真係幾熱，我同細佬係「又約唔到車友」既情況下出車，其實我地約車友係極為難既事，因為有d車友的確係踩好耐車仲係低B級..有d就神級為港隊打拼!
好啦，兩兄弟傻更更咁就去左科學園練車，老實說尋日基本上無乜人係科學園同埋吐露港，講真天氣咁熱，租車人士通常都去哂消暑，玩水多過出汗，仲邊到有人踩單車?但係咁wo，尋日踩單車既都係女士居多，亦都係女士們係速度控制同方向既判斷都係令人感到糟糕。
題外話，其實每個星期六、日或公眾假期，好多人都會去大埔、沙田、大圍租單車踩，但係問題就係話識踩單車可以有好多，但係注意到交通安全既人又有幾多?第一個問題就係話租單車既人無乜交通常識，呢個好明顯係運輸處集中處理公路同幹線既問題，但係忽視單車徑踩車既危險問題，其實炒私家車同炒單車既危險性基本上係一樣。
第二，識踩單車同唔識踩單車既人共同用同一既單車徑，好危險!因為唔識踩單車既人會隨時炒車，波及既範圍可大可小，輕則自己仆親貼返膠布可以解決到，重則成批炒哂車，有如環法比賽中既場面一樣30幾架炒成一堆。
呢個係政府既問題，講真到咁耐政府從來冇諗過大窩西支既問題，大窩西支好多大小既車輛，但係單車大埔來往上水粉嶺只有呢條路，雖然大窩東係有單車徑，但係d路完全係災難，無保養過既?爆石屎無人問津?唉!結果咪又係要大細車爭路...
講返正題，練習科學園...講真無樹蔭或者有蓋既地方，當頭日係曬死，我地已經選擇係無咁曬既時間進行，不過柏油路面同空曠既環境更加熱，因為柏油路吸引熱能係極強，就咁用手接觸個地面，我可以話係熱辣辣...
細佬尋日係公路既表現都係嘛嘛，可能佢抵受唔到高熱既情況之下運動，的確佢以前行山都好易係高熱既天氣情況不適，呢個我都習慣左佢情況。咁細佬尋日好醒目帶左包餅仔可以踩車頂肚，食完的確感覺係好d既，佢亦都話我爆完計啦，可以再keep going...但我就反對佢咁做，其實咁樣係好危險，因為咁樣硬推化，其實係會有致命既危機，根本個人既體能適應唔到，你就算慢慢踩鬆返條氣，其實無補如事，只會加劇自己身體既負擔!
結果，我叫細佬割禾青唔好再繼續科學園去孖橋休息一下先，之後我就提出鹿頸啦!細佬好開心架，因為佢好鍾意上斜...呢層我都唔知點解佢一聽到鹿頸佢會好興奮?
鹿頸對我黎講係一個練習既好地方，不過我玩既車種太辛苦了，本身TT車唔會咁樣太多車路上斜，主要係下坡同平路多...公路車唔同，因為公路車主要係乜野路面情況都要面對，總之係柏油路啦!
咁我地尋日係孖橋出發個時，見到阿樂，佢買左部新車^^不過唔係小輪，係DIRT JUMP(俗稱彈跳車)...車架係MOREWOOD，唔錯!之後更見到富士佬!我真係好耐冇見到佢，佢踩架FUJI既MOUTAIN，不愧係富士佬，玩單車玩親都係用死FUJI...唔知佢揸私家車係唔係都係用SUBARU(港人叫做掃把佬，正式翻譯名稱為富士)
咁好啦，由兩條友變成一行四人去鹿頸...一開波400米我同細佬以一個爆炸性既速度上左去漁護站，我細佬依然係一枝箭咁就飛左上去，我當然無佢咁快啦!上到去，我地放左兩架MTB飛機，其實我一直係到諗，MTB乜唔係上山輕鬆同快好多咩...原來唔係!MTB既作用其實只係解決好高好斜既山，或者好難行既泥石路...MTB可以快到既既車種，我諗得返XC公路化...
之後我同細佬係到賽車，一路係咁飛，但一上新娘潭汽水機個段斜路，PK...佢即刻放左我飛機!呢個就係公路車係山路既優勢!
最後我係汽水結帳，以約12個車位係細佬車尾!呢個係慣經...因為我細佬本身係上山既才料，體重輕，骨架細!
咁係鹿頸再出粉嶺，我地係聯和分道揚鏢...我細佬約左個seller攞新眼鏡!都係28bike個d人...
我地之後去左花都食米線，23蚊有野飲，真係唔錯...但我地都心癢!又再出返去踩...
出到又再踩返科學園，哈!今晚真係見到d堅料既玩家，個d速度唔係灰銀個級數咁簡單!我見到一個哥仔踩大車唔知係唔係dura ace刀鈴既，個條友踩得都幾快，我本來來都想試下有冇埋身既機會，點知佢起tec爆搖車...個下我諗應該都有55km/h，好快!
細佬比我係第二圈放飛機，我盡keep以40km/h行，細佬完全無還擊之力，比我放左至少25個車位，呢個就係55T既威力...遲下CARBON 餅片到左仲大鑊!
|
