呢封信比阿寶，其實係我內心好多野想表達想話比佢知，不過我同佢感情已過，只可以講既係...同佢相處既時間，有d野唔講既好似放係心到唔安樂...
咁我阿寶相識既方式係論壇加上msn，之後原來發覺兩個人住得咁近，不如出黎見下，之後我地不經不覺就行埋左一齊...
亦都係，我識阿寶耐左我先知，原來佢本身係有索開野既，本身我唔係幾喜歡，因為呢樣野係我腦海中係完完全全不能接受，亦都係曾經我同佢因為呢樣野嘈過。講真我係覺得呢樣野好麻煩，對身體唔好，對個人既前途同埋身邊既人都好大影響...
佢話介毒...得左唔索(以前玩到萬里長城，聽到都比佢嚇壞)
佢話介蒲吧...少左(其實蒲吧我唔介意，但係自己入到去呢d地方應該要節制)
佢話食少d煙...得既...由一日兩包變做一包...(食幾多唔介意，但至少唔好比人一個太差既印象)
其實以上三項講話介乜減乜....呢d都係一個人既基準，唔索k呢個係最重要既項目，講真咁多人索k，又有咁多警察海關掃場，其實佢自己本身已經有沙展follow佢呢個case，只係話佢鋪鋪符碌警方唔踢佢入倉...
至於去蒲吧，其實佢自己本身係未夠歲，呢個都算啦!我未夠歲都入機鋪啦...但係佢飲酒既量係好多，我有幾次打電話比佢，有時比我發現到佢冇同我講之下去左吧飲野，斷估入得去都唔會飲橙汁咁小兒科啦?佢自己都講飲到WING...飲唔係唔比佢飲，但要飲得節制。舉個例，我返工成日見到D客飲到大一大，仆下仆咁返黎!好難頂，一身嘔野已經唔在話下，最攞命既係我要睇住D友仔入升降機，最怕佢「飛白鴒鴿」要埋尾....
煙...我本身唔介意女仔食煙，本身之前自己都有食，不過而家介緊...但係佢又係無節制，我媽本身唔喜歡人食煙，有次大家見面，唉!佢都係唔醒目，仲要係咁駁火...講真我阿媽係即時黑哂面!
呢一刻，我諗...阿寶就算嫁得比我無事...佢對住我媽肯定嘈!到時我左右為難係到數手指都似...
另外，我同阿寶既相處技巧真係好有問題，即係我覺得佢係比唔到我有一份感情上既熱誠，恕我直言...同條食魚無分別!
唔表達、無意見、未有提供背景、唔想人協助、無改善...我只可以咁樣形容，佢自己同屋企關係嘛嘛，算!我肯講野同阿姨溝通都有D好景(對方幾開心)，阿寶係我媽面前都有交流，都攞到D分(係印象打左好多折扣...)，但係兩公婆係好難知道對方想要D乜，起初我都好火滾咁同佢講過，之後化硬為軟去用唔同既方式埋身，都係唔得...算!最後我放棄索性唔做，由佢自己黎...仲衰!零交流...
不過佢都有做得岩既事既，佢好積極同我去機鋪打灣岸、玩BG4...但我發覺既係，佢唔係好由心出發個種積極，我會感覺到佢為左我而去接受一樣事物，但往往佢無表達自己想要D乜...其實我有問過你仲想玩D乜...佢就話:「唔啦」
洗少少錢換來唔少快樂，但係我地當中製做唔到好多開心既片段，但都仲有例外...就係踩單車!
踩單車係佢喚起我玩的，至今我玩到唔停得癮...當中同佢踩單車去過唔少地方，不過都係大埔、河上鄉之類!個時淑女之嘛...不過都有唔少開心既回憶係入面既...例如載住阿寶就圍去玩，又或者同佢就圍踩...
算啦，係一個唔健全既感情，再發展都係無意思，表面快樂...內在失樂，咁拍黎有d咩意思?
無溝通既感情，其實等於兩條咸魚係街上乾曬...曬就係曬所謂既假幸福，其實背後有幾多唔開心又有幾人明白?
寶所講既介乜減乜...介係必須性，減係拉近人地對你既隔閡，達致「被接納既基準」，呢個唔係愛一個人為佢付出幾多，呢個只係想人地愛你而你有比人選擇既條件...
我覺得寶被我感化返回至今日既地步已經幸運，我唔知佢會唔會行返舊路，因失去我呢個「綑綁者」...而變回一個從前的她!不過，有一點好既係，至少佢有改變過...
|
